Yoano 19 - KNTP

¹ Ponkapo Pilato wamutwajile Yesu na kumututaula.

² Kabiji bashilikale nabo balukile munchinya wa miba ne kumuvwika ku mutwe wanji, kabiji bamuvwikile ne kivwalo kichila

³ ne kwiya ko aji ne kwamba amba, “Mutende, Mfumu wa Bayudea!” Ne kumupuma mapi.

⁴ Ne Pilato walupukile pangye jibiji, ne kwibambila amba, “Talai mbena kumuleeta kwi anweba, namba muyuke amba, amiwa kechi namonamo mambo mwi aye ne.”

⁵ Ponkapo Yesu walupukile, kasa avwala munchinya wa miba ne kivwalo kichila. Ne Pilato naye wibambijile amba, “Talai! Muntu we!”

⁶ Abo bang'anga bakatampe ne bakalama pa kumumona, babijikile amba, “Mupopai pa musalabu, mupopai pa musalabu!” Pilato wibambijile amba, “Musendai anweba, mukamupope pa musalabu. Pakuba amiwa kechi namonamo mambo mwi aye ne.”

⁷ Kumvwa Bayudea ba ambile amba, “Atweba tuji na muzhilo, kabiji mwayila muzhilo wetu aye wafwainwa kufwa, mambo aye wipele bu Mwana Lesa.”

⁸ Ponkapo Pilato byo a umvwine byo byo, wa umvwine moyo mukatampe.

⁹ Ne aye watwelele jibiji mu kipango ne kumwipuzha Yesu amba, “Nanchi obewa wafuma pi?” Pakuba Yesu kechi wamukumbwile ne.

¹⁰ Kabiji Pilato wamwambijile amba, “Ne kunkumbula amiwa nenyi? Obewa kechi wayuka byo nji na luusa lwa ku kukasulula, nangwa lwa kukupopa pa musalabu nenyi?”

¹¹ Kumvwa Yesu wamwambijile amba, “Kechi uji na luusa pe amiwa ne, poso wapewalo kwiulu. Onkao mambo awa wamfikizha kwi anweba ye uji na mambo akila.”

¹² Pakumvwa kino, Pilato wakebelenga kumukasulula. Pakuba Bayudea babijikile amba, “Inge umukasulule uno, kechi wi mulunda na Kesala ne! Bonse bepa bufumu bo bamusatukila Kesala!”

¹³ Ponkapo Pilato byo a umvwine bino byambo, wamulupwile Yesu pangye, ne kwikala pa kipona kya kije, ponka po batelelenga amba, “Kyalanta,” Mu Kihebelu amba, “Ngabata.”

¹⁴ Jajinga ke juba ja kunengezhezha jimo bya kijiilo kya Lupitailo, ne juba jaubile jaseela kala. Aye wa ambijile Bayudea amba, “Talai, Mfumu wenu!”

¹⁵ Ne abo babijikile ne kwamba amba, “Bamutwale! Bamutwale! Kamupopai pa musalabu!” Kumvwa Pilato amba, “Mfumu wenu namupope pa musalabu nyi?” Kumvwa bang'anga bakatampe ba ambile amba, “Kechi tuji na mfumu ne, poso yenka Kesala!”

¹⁶ Ponkapo wibapeleye amba, bakamupope pa musalabu. Kepo bamutwajile Yesu.

Kupopwa kwa Yesu pa musalabu

¹⁷ Ne aye walupukile, kasa esendela ne musalabu wanji, kuya ko batela amba, “Kuntu kwa Kiboyongolo,” Mu Kihebelu batongolako amba, “Ngolongota.”

¹⁸ Ko bamupopele pa musalabu, ne bakwabo babiji pamo ne aye, umo ku lubaji lumo, mukwabo naye ku lubaji lukwabo, ne aye Yesu pakachi.

¹⁹ Pilato wanembele kiyukilo ne kwikibika pa musalabu. Kyanembelwe amba, “YESU MWINA NAZALA, MFUMU WA BAYUDEA.”

²⁰ Byonkabyo kino kiyukilo Bayudea bavula bekitangile, mambo ko bapopele Yesu pa musalabu kwajinga ku bwipi na muzhi. Kabiji kyanembelwe mu Kihebelu, ne mu ki Latini, ne mu kigiliki.

²¹ Ponkapo bang'anga bakatampe ba Bayudea ba ambijile Pilato amba, “Kechi munembe amba, ‘Mfumu wa Bayudea’ ne, poso amba, aye mwine wa amba amba, amiwa ne Mfumu wa Bayudea.”

²² Kumvwa Pilato wa ambile amba, “Akya kyo nanemba kyo kyonka.”

²³ Ne bashilikale, byo bamupopele Yesu pa musalabu, bashikwile bivwalo byanji, ne kwibyabanya pana, mushilikale kyanji, mushilikale kyanji. Ne mukangyo naye, bino mukangyo kechi wajinga na mifumo ne, bamulukiletu kufuma kwiulu ne kufika kunshi.

²⁴ Ponkapo abo ba ambang'ene bene na bene amba, “Kumutabula ne, kilekai, tutaye bubale, kana usakwikala wa kwa ng'anyi.” Amba, kinembelo kifike kyaamba amba, “Be abenya bene na bene bivwalo byami, kabiji batayile bubale pa mukangyo wami.” Bino bintu byo byo baubile bashilikale.

²⁵ Kabiji ku musalabu wa Yesu kwaimene inanji, ne mulongo wa inanji, ne Maliya muka Kileopasa, ne Maliya wa ku Magadala.

²⁶ Yesu pa kumona inanji, ne yewa mwana wabwanga ye atemenwe, kasa baimana konka, wa ambijile inanji amba, “Mama, talai mwanenu!”

²⁷ Kabiji wa ambijile yewa mwana wabwanga, amba, “Talai inenu!” Kufuma ku joja juba awa mwana wabwanga wamutwajile kwanji.

Lufu lwa Yesu

²⁸ Bino byo byapwile, Yesu wayukile amba, pano byonse byapwa, wa ambile amba, “Nafwa kilaka,” mambo a kuuba amba kinembelo kifike.

²⁹ Kabiji kwajinga ne nsanyi yo batujile konka yayula binyu byasasa, kepo basomekele shipanja wayula binyu byasasa ku kakichi ka isopi, ne kumubika ku kanwa kanji.

³⁰ Ponkapo Yesu, byo atambwile binyu byasasa, wa ambile amba, “Kyapwa!” Wanyengekele mutwe wanji ne kuleka ku mweo.

Yesu byo bamwashile mu mbavu

³¹ Aja juba byo jajinga ja kunengezhezha jimo bya kijiilo ponkapo Bayudea balombele Pilato amba, bebachimaune maulu, bebafumyepo, mibiji yabo kechi ikale pa musalabu mu juba ja Sabado ne (mambo aja juba ja Sabado jajinga janeema).

³² Ponkapo bashilikale baishile, bachimwine maulu a mutanshi, ne a mukwabo wapopelwe nanji pa misalabu.

³³ Pakuba byo bafikile pe Yesu, pa kumona amba, wafwa kala, kechi bamuchimwine maulu anji ne.

³⁴ Bino mushilikale umo wamwashile jifumo mu mbavu, ponkapotu mwafumine mashi ne mema.

³⁵ (Kino wikishimuna aye wikimwene, ne kushimuna kwanji ko kwa kine. Kabiji ne aye wayuka amba, abya byo mbena kwamba byo bya kine, amba ne anweba mwitabile.)

³⁶ Mambo bino bintu byaubilwe amba, kinembelo kifike, amba, “Bikupa byanji kechi pakachimunwa nangwa kimo ne.”

³⁷ Kabiji ne kinembelo kikwabo amba, “Bakamumona awa ye baashile.”

Kubiikwa kwa Yesu mu kilende

³⁸ Pa kupwisha bino, Yosefwa mwina Alimatea, mwana wabwanga wa Yesu, bino wifiile mambo a kuchiina Bayudea, walombele Pilato amba, asende mubiji wa Yesu, ne aye Pilato waswile. Ponkapo waishile kusenda mubiji wanji.

³⁹ Nikodema naye waishile, yenkawa waishile patanshi kwi Yesu bufuku, waletele ne byo bavwangakanya na mola ne maalo, byafikile mapaunji kampe kitota kimo.

⁴⁰ Kepo bashikwile mubiji wa Yesu, ne kumuvungila mu kisapi kya linenyi ne binunka bulongo, mwayila bisela bya kuzhiika kwa Bayudea.

⁴¹ Byonkabyo ko bamupopele ku musalabu kwajinga ne bujimi, kabiji mu bobwa bujimi mwajinga ne kilende kya katataka, mo babujile kuzhika muntu nangwa umo ne.

⁴² Mo mo bamubikile Yesu, mambo kilende kyajinga pepi ne aja juba jajinga ja kunengezhezha jimo bya kijiilo kya Bayudea.