Yoano 18 - KNTP

Kukwatwa kwa Yesu

¹ Yesu byo apwishishe kwamba bino, waabukile kakola ka Kedolona ne baana banji babwanga, ko kwajinga bujimi mo atwelele, aye mwine ne baana banji babwanga.

² Ne Yudasa, yenka wamusolwele, naye wayukileko mambo bimye byavula Yesu ko koayanga na baana banji babwanga.

³ Ponkapo Yudasa, byo atambwile kiombe kya bashilikale, ne bakalama ku bang'anga bakatampe ne Bafaliseo, ke beye konka na malampi ne masoko a mujilo ne bilwilo.

⁴ Yesu byo ayukile byonse bisa kumumwekela, walupukile ne kwibambila amba, “Ing'anyi ye mukeba?”

⁵ Kumvwa abo amba, “Yesu mwina Nazala.” Kepo Yesu ebambijile amba, “Amiwa bano.” Ne Yudasa naye yenka wamusolwele, waimene naabo.

⁶ Kabiji Yesu byo ebambijile amba, “Amiwa bano,” babwelele lumfutwanyuma, ne kupona panshi.

⁷ Kabiji aye wibepwizhe jibiji amba, “Ng'anyi ye mukeba?” Kumvwa abo bamukumbwile amba, “Yesu mwina Nazala.”

⁸ Kumvwa Yesu amba, “Naji kwimubula namba amiwa bano, byonkabyo inge mubena kunkeba amiwa, muleke bano bayenga.”

⁹ (Amba byambo bifike byo a ambile amba, “Aba bomwampele kechi naelelepo nangwa umo ne.”)

¹⁰ Ponkapo Shimona Petelo byo ajinga na mpoko, wiisomwene ne kumukampa kalume wa ng'anga mukatampe, ne kumukopola kutwi kwa kilujo, jizhina janji Malikusa.

¹¹ Ponkapo Yesu wamwambijile Petelo amba, “Somekai mpoko mu kikwa! Katomeno ko bampele bataata kechi nekatome nenyi?”

Yesu kumeso akwa Anasa

¹² Ponkapo kiombe kya bashilikale ne mukulumpe wabo, ne bakalama ba Bayudea, bamukwachile Yesu ne kumukasa,

¹³ ke bamutwale patanshi kwi Anasa, mambo ye wajinga shanjivyala Kaifasa, ng'anga mukatampe mu yewa mwaka.

¹⁴ Kaifasa wajinga yewa wibambijile Bayudea, amba kyafwainwa umo afwile bantu.

Petelo byo amukaine Yesu

¹⁵ Ne aye Shimona Petelo walondejilenga Yesu, ne mukwabo mwana wabwanga. Ne awa mwana wabwanga bamuyukile kwi ng'anga mukatampe, kepo atwelele ne Yesu mu kipango kya ng'anga mukatampe,

¹⁶ pakuba Petelo waimene ku kibelo pangye. Kepo alupukile awa mwana wabwanga mukwabo, ye bayukile kwi ng'anga mukatampe ne kwamba na mwanamukazhi walaminenga kibelo, ne kumutwezha wamutwezhezhe Petelo.

¹⁷ Ponkapo awa kamwale walaminenga kibelo wa ambijile Petelo amba, “Ne anweba mwi mwananji wabwanga uno muntu nyi?” Kumvwa aye amba, “Amiwa ne.”

¹⁸ Kabiji bakalume ne bakalama ba banzhile mujilo wa mashanga na mambo a mashika, ne kwimana baimene konka kasa bota mujilo, ne Petelo naye waimene naabo, kasa ota mujilo.

¹⁹ Ponkapo ng'anga mukatampe waipwizhe Yesu mambo a baana banji babwanga ne a kufunjisha kwanji.

²⁰ Kumvwa Yesu wamwambijile amba, “Amiwa na ambile patoka ku ba pano pantanda, moba onse nafunjishenga mu mashinagoga, ne mu nzubo ya Lesa, mo bapwila Bayudea bonse! Kafwako kyo na ambile kumbaji amiwa ne.

²¹ Mungipwizha ka amiwa? Ipuzhai bang'umvwine byo nebambijilenga. Bo bayuka byo na ambile amiwa.”

²² Ponkapo byo a ambile bino, umo kalama waimene kwipi wapumine Yesu lupi, ne kwamba amba, “Umukumbwila ka byo byo ng'anga mukatampe?”

²³ Yesu wamukumbwile amba, “Inge naamba byatama, bishimunai, pakuba inge byawama, nanchi mwampumina ka?”

²⁴ Ponkapo Anasa wamutumine kwi Kaifasa, ng'anga mukatampe, kasa akaswa.

Petelo byo amukaine Yesu ja bubiji

²⁵ Ne Shimona Petelo waimene kasa ota mujilo. Ponkapo abo ba mwambijile amba, “Anweba kechi mwi mwananji wabwanga nenyi?” Ne aye wakaine amba, “Amiwa ne.”

²⁶ Umo kalume wa ng'anga mukatampe, mulongo wa yewa ye akopwele kutwi kwanji Petelo, wamwambijile amba, “Kechi naji kwimumona nanji mu bujimi nenyi?”

²⁷ Ne Petelo wakaine jikwabo. Ponkapotu ne shikombwe wakokweele.

Yesu ku meso a Pilato

²⁸ Kabiji Yesu bamufumishe kwi Kaifasa, ne kumutwala mu kipango kya ndamakyalo. Pano kwaji ke kumakya, pakuba abo bene kechi batwelele mu kipango kya ndamakyalo ne, bachiine kwizhilulula, kabiji amba, bakaje kijiilo kya Lupitailo.

²⁹ Ponkapo Pilato walupukile kwi abo ne kwibambila amba, “Ng'anyi mambo o mwamulobela uno muntu?”

³⁰ Kumvwa abo ba mwambijile amba, “Inge kechi wauba byatama ne, inge kechi twamuleeta kwi anweba ne.”

³¹ Kumvwa Pilato wibambijile amba, “Musendai anweba bene, mukamuchibile mambo mwayila mizhilo yenu.” Kumvwa Bayudea amba, “Kechi tuji na luusa lwa kwipaya muntu ne.”

³² (Amba abya byambo bya Yesu, byo a ambile byo atongwele musango wa lufu lo akafwa bifike.)

³³ Ponkapo Pilato watwelele jibiji mu kipango, ne kumwita wamwichile Yesu, ne kumwambila amba, “Obewa yobe Mfumu wa Bayudea nyi?”

³⁴ Kumvwa Yesu amba, “Anweba bene mwiambila kino kintu nyi, inyi bakwabo bemubulakyo?”

³⁵ Kumvwa Pilato amba “Nanchi amiwa ne mwina yudea nyi? Mukoka wobe obewa mwine, ne bang'anga bakatampe bo bakufikizha kwi amiwa. Nanchi kyo wauba ki ka?”

³⁶ Kumvwa Yesu amba, “Bufumu bwami kechi bwa pano pantanda ne, inge bufumu bwami bwajinga bwa pano pantanda, inge bakalume bami baji kundwilanga amba, kechi bamusolole ku Bayudea ne. Pakuba pano bufumu bwami kechi bwa pano ne.”

³⁷ Kumvwa Pilato wamwambijile amba, “Nanchi obewa wi mfumu nyi?” Kumvwa Yesu amba, “Anweba mwafikilapotu amba, ‘Wi mfumu.’ O mambo o nasemenwe, ne o naishijile pano pantanda, namba nshimune bya bukine. Ne bonse ba bukine bomvwa jiwi jami.”

³⁸ Kumvwa Pilato wamwambijile amba, “Nanchi bukine bo buka?” Byo a ambile byo bino, Pilato walupukile jibiji kwiya ku Bayudea, ne kwibambila amba, “Amiwa kechi namona mambo mwi aye ne.

Yesu byo bamuzhachishishe amba afwe

³⁹ Pakuba anweba muji na kisela, kyo nemukasulwila umo pa kijiilo kya Lupitailo. Mwasaka nemukasulwile Mfumu wa Bayudea nyi?”

⁴⁰ Kumvwa bonse babijikile jibiji amba, “Kechi uno ne! Twasaka Balabasa!” Bino Balabasa wajinga kapondo.