Yoano 17 - KNTP

Yesu byo ebalombejile baana banji babwanga

¹ Yesu byo apwishishe kwamba bino bintu, wainwine meso anji ne kutala mwiulu ne kwamba amba, “Taata, kimye kyafika. Mu mutumbijike Mwanenu, amba, Mwana naye emutumbijike.

² Mambo mwamupele luusa lwa pa bantu bonse, pakuba amba akapane bumi bwa myaka ku bonse bo mwamupele.

³ Kabiji buno bo bumi bwa myaka, amba bemuyuke anweba, Lesa yenka wa kine, ne Yesu Kilishitu ye mwatumine.

⁴ Amiwa nemutumbijika pano panshi, byo napwisha mingilo yo mwampele amba neyube.

⁵ Pano, anweba Taata! Muntumbijike ko muji anweba bene na lonkalwa lukumo lo najinga naalo ko muji, pano pantanda kasa pakyangye kulengwa.

⁶ “Nasolwele jizhina jenu kwi aba bantu bomwampele mu ba pano pantanda. Bajinga ba kwenu, ne anweba mwibampele ne abo balama mambo enu.

⁷ Pano bayuka amba, byonse byo mwampele, byafuma kwi anweba.

⁸ Mambo nebapele byambo byo mwampele, kabiji bebitambula, ne kuyuka bayuka kine byo nafumine kwenu, kabiji baitaba amba, yenu mwantumine.

⁹ “Amiwa mbena kwibalombelela abo. Kechi nebalombelela ba pano pantanda ne, poso bonka bomwampele, mambo bo benu.

¹⁰ Kabiji ne byonse byami byo byenu, ne byenu byo byami, kabiji ne amiwa natumbijikilwa mwi abo.

¹¹ Pakuba pano kechi nkiji pano pantanda ne, pakuba bano bo baji pano pantanda, kabiji amiwa mbena kwiya kwenu. Taata Wazhila! Mwibalame mu jizhina jenu jo mwampele, bekale ke umo, byonka byo tuji atweba.

¹² Byo najinga naabo, amiwa nebalaminenga mu jizhina jenu jo mwampele. Nebasungile, kabiji kafwako nangwa umo waonaika ne, poso yenka awa mwana wa lonaiko, amba kinembelo kifikizhiwe.

¹³ Pakuba pano mbena kwiya kwi anweba, kabiji bino nebyamba pano pantanda namba, bekale na lusekelo lwami kasa lwafikila mu michima yabo.

¹⁴ Amiwa nebapele mambo enu, ne ba pano pantanda bebashikwa, mambo abo kechi bo ba pano pantanda ne, byonka byo nji amiwa kechi ne wa pano pantanda ne.

¹⁵ Kechi nalomba namba mwibafumye pano pantanda ne, poso namba mwibalame kwi yewa mubi.

¹⁶ Abo kechi bo ba pano pantanda ne, byonka byo nji amiwa kechi ne wa pano pantanda ne.

¹⁷ Mwibazhijike na bukine, byambo byenu bo bukine.

¹⁸ Byonka byo mwantumine pano pantanda, byonkabyo ne amiwa nebatuma pano pantanda.

¹⁹ Kabiji nezhijika na mambo a abo, namba ne abo bene nabo bazhijikwe mu bukine.

²⁰ “Kabiji kechi nebalombelela abo bonka ne, pakuba ne abo bakangitabila amiwa na byambo byabo.

²¹ Namba bonse bekale ke umo. Taata! Byo muji mwi amiwa ne amiwa mwi anweba, byonkabyo ne abo nabo bekale mwi atweba, namba ba pano pantanda betabile amba, anweba yenu mwantumine.

²² Kabiji ne lukumo lo mwampele amiwa, ne amiwa nebapaalo, be kale ke umo byonka byo tuji umo atweba.

²³ Amiwa monka mwi abo, ne anweba mwi amiwa, namba balumbuluke ke umo, namba ba pano pantanda bayuke amba, yenu mwantumine, ne kwibatemwa abo byonka byo mwantemwa amiwa.

²⁴ “Taata! Aba bomwampele, nasaka namba, konji amiwa, ne abo nabo bakekale ne amiwa, namba bakamone lukumo lwami, lo mwampele mambo anweba mwantemenwe amiwa ne ntanda kasa ikyangye kulengwa.

²⁵ Anweba Taata waoloka! Ba pano pantanda kechi bemuyuka ne, pakuba amiwa nemuyuka, ne bano bayuka amba mwantumine.

²⁶ Ne amiwa nebayukisha jizhina jenu, kabiji nkejiyukanyikisha namba butemwe bo mwantemwa amiwa bwikale mwi abo, ne amiwa monka mwi abo.”