Yoano 14 - KNTP

Yesu ye jishinda ja kuya kwi Taata

¹ “Michima yenu kechi ilukute ne, itabilai mwi Lesa, kabiji mwitabile ne mwi amiwa.

² Mu nzubo ya Bataata muji mwa kwikala mwavula, inge kechi kyaji byo byo ne, inge nemubuula. Pakuba mbena kuya na kwimunengezhezha mpunzha kwa kwikala.

³ Kabiji inge naya na kwimunengezhezha mpunzha, nkabwela jibiji, ne kwimutwala kwami amiwa mwine, namba akwa konji amiwa, ne anweba mukekale konka.

⁴ Kabiji ne anweba mwayuka jishinda ja kombena kuya amiwa.”

⁵ Tomase wamwipwizhe amba, “Nkambo, kechi twayuka ko mubena kuya ne, twakonsha kwijiyuka byepi jishinda?”

⁶ Yesu wamukumbwile amba, “Amiwa ne jishinda, ne bukine, ne bumi, kafwako wakonsha kwiya kwi Bataata ne, poso pe amiwa.

⁷ Inge mwangyukile amiwa, inge mwibayuka ne Bataata. Kabiji kufuma ku kyo kino kimye mwibayuka, ne kwibamona.”

⁸ Kepo Filipa a mwambijile amba, “Nkambo, tubulai bashenu, kabiji ne atweba kituwamine.”

⁹ Kumvwa Yesu wamukumbwile amba, “Nabanda nenu byonkabye, ne anweba Filipa ne kungyuka nenyi? Awa wammona amiwa wamona ne bataata, ne anweba mwa ambilaka amba, ‘Tubulai bashenu’?

¹⁰ Kechi mwaitaba byo nji mwi bataata, ne bataata byo baji mwi amiwa nenyi? Byambo byo nemwambila kechi nebyamba bunke bwami ne. Pakuba Bataata bekala mwi amiwa bo boba mingilo yabo.

¹¹ Ngitabilai byo nji mwi bataata, ne Bataata byo baji mwi amiwa, nangwa ngitabilai na mambo a mingilo yonka.

¹² Kine, kine nemwambila namba, awa wangitabila amiwa, mingilo yo nguba amiwa naye ukeyuba, ne yakila ino ukeyuba, mambo mbena kuya kwi Bataata.

¹³ Kabiji byonse byo mukalomba mu jizhina jami, nangwa bya byepi, amiwa nkebyuba, namba Bataata batumbijikilwe mu Mwana.

¹⁴ Kabiji inge mukalomba kintu mu jizhina jami, nangwa kya byepi, amiwa nkekyuba.”

Mulaye wa kutuma Mupashi Wazhila

¹⁵ “Inge mwantemwa, mukalama mikambizho yami.

¹⁶ Ne amiwa nkalomba Bataata, ne abo bakemupa Nkwasho mukwabo, ye ukekala nenu myaka yonse.

¹⁷ Ye Mupashi wa bukine, ye babula kukonsha kutambula ba pano pantanda, mambo kechi bamumona ne, nangwa kumuyuka ne. Anweba mwamuyuka, mambo aye wikala nenu, kabiji ukekalanga mwi anweba.”

¹⁸ “Kechi nkemusha bwana bwa kishale ne, nkeya jibiji ko muji.

¹⁹ Kwashala ka kimye kacheche ba pano pantanda kechi bakammona jibiji ne, pakuba anweba mukammonanga, byo naikala na bumi amiwa, ne anweba mukekalanga naabo.”

²⁰ “Mu joja juba anweba mukayuka byo nji mwi bataata, ne anweba mwi amiwa, ne amiwa monka mwi anweba.”

²¹ “Awa uji na mikambizho yami ne kwiilama ye wantemwa, ne awa wantemwa ye bakatemwa kwi bataata, ne amiwa nkamutemwa, ne kwimwesha amiwa mwine kwi aye.”

²² Kumvwa Yudasa (kechi Isakaliota ne) wamwipwizhe amba, “Nkambo, mambo ka o mukemweshesha kwi atweba, bino ku ba pano pantanda ne?”

²³ Yesu wamukumbwile amba, “Inge muntu wantemwa, ukalama byambo byami ne bataata bakamutemwa, ne atweba tukeya ko aji, ne kwikala monka mwi aye.

²⁴ Awa wabula kuntemwa kechi ulama byambo byami ne, kabiji ne byambo byo nemufunjishe kechi byami amiwa mwine ne, byo bya bataata bantumine.”

²⁵ “Bino bintu nemwambila byonkiji nenu.

²⁶ Pakuba Nkwasho, aye Mupashi Wazhila, ye bakatuma Bataata mu jizhina jami, ye ukemufunjisha bintu byonsetu, ne kwimuvulula byonse byo na ambile nenu.”

²⁷ “Nemushiila mutende, nemupa mutende wami. Kechi mpana byo bapana ba pano pantanda ne. Michima yenu kechi ilukute ne, nangwa kuuba moyo ne.”

²⁸ “Anweba mwaji kumvwa byo naji kwimwambila namba, ‘Amiwa mbena kuya, kabiji nkabwela kwi anweba.’ Inge mwantemwa, inge mwasekela, mambo mbena kuya kwi Bataata, mambo Bataata bo bankila.

²⁹ Pano nemubujila jimo kasa kikyangye kumweka, namba byo kikamweka muketabile.

³⁰ Pano kechi ng'ambe nenu byavula ne, mambo mfumu wa pano pantanda kaiye. Aye kechi uji na luusa pe amiwa ne,

³¹ pakuba amiwa nguba byonka byankambizha Bataata namba, ba pano pantanda bayuke byo nebatemwa Bataata.” “Imanai, twayai tufume pano.”