Yoano 13 - KNTP

Yesu byo a ovwele maulu a baana banji babwanga

¹ Pano kijiilo kya Lupitailo kasa kikyangye kufika, Yesu wayukile amba, kimye kyami kyafika kya kufuma pano pantanda ne kuya kwi bataata. Byo atemenwe ba kwanji bajinga pano pantanda, aye wibatemenwe ne kumpelo.

² Byo bajilenga kijiilo kya mulajilo, Diabola kasa ekibika kala mu muchima wa kwa Yudasa Isakaliota, mwana Shimona, kya kumusolola.

³ Yesu nangwa wayukile amba, bataata bampa bintu byonse mu maboko ami, kabiji nafuma kwi Lesa, kabiji nkaya kwi Lesa.

⁴ Waimene ku kijiilo, ne kutuula bivwalo byanji bya peulu, washikwile taulo, ne kwinyinga.

⁵ Ponkapo waitulwijile mema mu nsanyi, kaovwe ne baana banji babwanga ku maulu abo, ne kwibashiimuna na taulo yenka ye ekashile.

⁶ Byo aishile kwi Shimona Petelo, aye wamwambijile amba, “Nkambo, anweba mungovwe maulu ami nyi?”

⁷ Kumvwa Yesu wamwambijile amba, “Anweba kechi mwikiyuka kyombena kuuba amiwa ne, bino mukekiyuka palutwe.”

⁸ Ne Petelo wamwambijile amba, “Kechi mungovwe maulu ami nangwa kacheche ne.” Kumvwa Yesu wamwambijile amba, “Inge kechi nemovwe ne, kechi muji ne amiwa nangwa pacheche ne.”

⁹ Kumvwa Shimona Petelo amba, “Nkambo, kechi mungovwetu ku maulu ami onka ne! Nanchi mungovwe ne ku maboko ami ne ku mutwe wami pamo!”

¹⁰ Kabiji Yesu wamwambijile amba, “Awa waowa kala, kechi usakiwa kowa jibiji ne, kana konka ku maulu, mambo watokatu yense. Ne anweba mwatoka, bino kechi bonsetu ne.”

¹¹ Ke pakuba aye wamuyukile ukamusolola, o mambo oa ambijile amba, “Kechi mwatoka bonse ne.”

¹² Pa kupwisha kwibovwa ku maulu abo, washikwile bivwalo byanji, ne kwikala jibiji, wibambijile amba, “Mwayuka kyo nauba kwi anweba nyi?

¹³ Anweba muntela amiwa amba, Mufunjishi, kabiji amba Nkambo, mwambatu bulongo mambo byo byo nji.

¹⁴ Kabiji inge amiwa, Nkambo yenu ne Mufunjishi wenu, nemovwa maulu enu, ne anweba mwafwainwa kwiovwa ku maulu enu anweba bene na bene.

¹⁵ Mambo amiwa nemushiila mwa kulondela, amba ne anweba mubenga byonka byo nemubila.

¹⁶ Kine, kine, nemwambila namba, muzha kechi wakila nkambo yanji ne, nangwa yewa ye batuma kechi wakila wamutuma ne.

¹⁷ Inge anweba mwibiyuka bino, mwatokwa inge mwibyuba.

¹⁸ “Amiwa kechi mbena kwamba mambo a anweba bonse ne, amiwa nayuka ne bo nasalulula. Pakuba nanchi amba kinembelo kifike, amba, ‘Yenka uja shinkwa ne amiwa ye wansobwela kashiko kanji.’

¹⁹ Ponka pano nemubujila jimo kasa kikyangye kufika namba, byo kikafika, mukangitabile amba, ‘Yami, i ye.’

²⁰ Kine, kine, ne mwambila namba, watambula ye ntuma amiwa wantambula amiwa, kabiji wantambula amiwa watambula ne aye wantuma.”

Yesu byo atongwele ukamusolola

²¹ Ponkapo Yesu byo apwishishe kwamba bino, wakatazhiwe mu mupashi, ne aye washimwine amba, “Kine, kine, nemwambila namba, umo wa mwi anweba ukansolola.”

²² Ponkapo baana babwanga ke betale ne kwitala, ne kuzhinauka ye aneena.

²³ Mwananji wabwanga umo, yenka ye atemenwe Yesu, wajinga ku tebulu, kasa asendalela mu kyaji kya Yesu.

²⁴ Shimona Petelo wamulabwile na meso, ne kumwambila amba, “Tubuulai ye abena kunena.”

²⁵ Kabiji aye byo asendalele byonkabyo pa kyaji kya Yesu, wamwambijile amba, “Nkambo, ye ng'anyi?”

²⁶ Kumvwa Yesu wa ambile amba, “Awa ye nsakutanchila kitolo, ne kumupa, i ye.” Ponkapo byo a tanchile kitolo, wamupele Yudasa, mwana Shimona Isakaliota.

²⁷ Panyuma ya kutambula kitolo ponkapo ne Satana wamutwelele. Ne Yesu wamwambijile amba, “Akya kyo musaka kuba, kyubai bukiji!”

²⁸ Ku tebulu kafwako nangwa umo wayukile kyo a mwambijile kino ne.

²⁹ Pakuba byo ajinga nafukuta wa mali, aye Yudasa, bamo balangulukile amba, Yesu wamwambijile amba, akapote byo basakile bya kijiilo, nangwa amba, akebape bintu balanda.

³⁰ Kabiji aye byo atambwile kitolo walupukile ponkapo. Bwajinga ke bufuku.

Mukambizho mupya

³¹ Ponkapo Yudasa byo alupukile, Yesu wa ambile amba, “Pano Mwana Muntu watumbijikwa, ne Lesa watumbijikilwa mwi aye.

³² Umvwe Lesa watumbijikilwa mwi aye, Lesa naye uka mutumbijika mwi aye mwine, uka mutumbijika ponkapotu.

³³ Anweba twana nji ne anweba pa kakimye kacheche. Musa kukankeba, kabiji byonka byo naambijile Bayudea, pano nemwambila ne anweba namba, akwa kongya amiwa, anweba kechi mwakonsha kuyako ne.

³⁴ Mukambizho mupya ye nemupa anweba, namba mwitemwe anweba bene na bene, byonka byo nemutemwa amiwa, ne anweba mwitemwe anweba bene na bene.

³⁵ Pa kyo kino po po bakayukila bonse amba anweba mwi baana bami babwanga, inge mwitemwa anweba bene na bene.”

Yesu byo a mwambijile jimo Petelo amba ukankana

³⁶ Kumvwa Shimona Petelo wamwambijile amba, “Nkambo, mubena kuya kwepi?” Kumvwa Yesu amba, “Kongya amiwa, kechi mukonshe kundondela pa kino kimye ne, pakuba musa kuka ndondela palutwe.”

³⁷ Kumvwa Petelo wamwambijile amba, “Nkambo, pa kino kimye mambo ka kyo nakonsha kubujila kwimulondela? Nsa kukemwelela mweo wami!”

³⁸ Kumvwa Yesu amba, “Kine mukangelela mweo wenu nyi? Kine, kine, nemwambila namba, Shikombwe kasa akyangye kukookola, musakunkana jisatu.”