Yoano 11 - KNTP

Lufu lwa kwa Lazalasa

¹ Kabiji kwajinga muntu wakolelwenga, jizhina janji Lazalasa, mwina Betani, muzhi mwaikalanga Maliya ne Maata mulongo wanji.

² Maliya yenkawa washingile Nkambo manyi, ne kumushiimuna ku maulu na nsuki yanji, ye mwina mulongo wanji Lazalasa wakolelwenga.

³ Ponkapo banyenga yanji batumine jiwi kwi aye Yesu amba “Nkambo, awa ye mwatemwisha ubena kukolwa.”

⁴ Yesu byo a umvwine byo byo wa ambile amba, “Bino bikola kechi bya ku lufu ne, byo bya lukumo lwa Lesa, amba Mwana Lesa atumbijikilwemo.”

⁵ Yesu watemenwe Maata ne Maliya mulongo wanji ne Lazalasa.

⁶ Byo a umvwine amba Lazalasa wakolwa, waikajile konka ko ajinga moba abiji.

⁷ Kabiji palutwe wa ambijile baana banji babwanga amba, “Twayai tubwele ku Yudea.”

⁸ Baana banji babwanga ba mwambijile amba “Laabi, katataaka Bayudea basakile kwimwasa mabwe, kabiji ke musake kubwelako jibiji?”

⁹ Yesu wibakumbwile amba, “Nanchi kechi muji ma awala jikumi na abiji mu juba jimo nenyi? Inge muntu kapitang'ane mute, kechi wituntula ne, mambo umona kyeya kya pano pantanda.

¹⁰ Pakuba inge muntu kapitang'ane bufuku wituntula, mambo mwi aye kechi muji kyeya ne.”

¹¹ Kabiji byo apwishishe kwamba bino, wibambijile amba, “Mukwetu Lazalasa walaala tulo, pakuba amiwa ngya, nkamubushe mutulo.”

¹² Baana banji babwanga ba ambile amba, “Nkambo, inge walaala tulo, usakukosa.”

¹³ Nanchi Yesu wikitwajile mukuuba amba Lazalasa wafwa. Pakuba abo amba wanena tulo twa kukokoloka.

¹⁴ Ponkapo Yesu wibambijile patoka amba, “Lazalasa wafwa,

¹⁵ bino amiwa nasekela byo nabujilweko na mambo a anweba, namba mwitabile. Nangwa byonkabyo twayai ko aji.”

¹⁶ Ponkapo Tomase yebatela amba Didimasa, wa ambijile bakwabo baana babwanga amba, “Ne atweba twayai tukafwe nanji!”

Yesu ye lusanguko ne bumi

¹⁷ Yesu byo afikileko, wamutaine sa aji mu kilende moba ke ana.

¹⁸ Bino ku Betani kwajinga kwipi na ku Yelusalema, kwaji misinso jikumi ne itanu,

¹⁹ ne bavula Bayudea baishile kwi Maata ne Maliya, na kwibajijishapo mulongo wabo.

²⁰ Ponkapo Maata, byo a umvwine amba Yesu ubena kwiya, wayile na kumutundaila, pakuba Maliya washajile mu nzubo.

²¹ Maata wamwambijile Yesu amba, “Nkambo inge mwajinga kuno, mulongo wetu inge kechi wafwile ne.

²² Bino nayuka namba nangwatu pano Lesa usa kwimupa kyonka kyo musa kumulomba.”

²³ Kumvwa Yesu wamwambijile amba, “Mulongo wenu ukasanguka.”

²⁴ Ne Maata wamwambijile amba, “Nayuka byo akasanguka mu lusanguko lwa mu juba jikapelaako.”

²⁵ Kumvwa Yesu wamwambijile amba, “Amiwa yami lusanguko ne bumi. Awa wangitabila amiwa, nangwa afwe, ukamona bumi,

²⁶ ne bonse baji na bumi ne kungitabila amiwa kechi bakafwe myaka yonse nangwa pacheche ne. Wibitabila bino nyi?”

²⁷ Aye wa mukumbwile amba, “Ee, Nkambo! Amiwa naitaba namba, anweba yenu Kilishitu, Mwana Lesa, yenka walayilwe amba ukeya pano pantanda.”

Yesu wajijile

²⁸ Byo a ambiletu byo byo, wayile na kwita mulongo wanji Maliya kwa bunke, ne kumwambila amba, “Mufunjishi waiya, ubena kukwita.”

²⁹ Ponkapo pa kumvwatu byo byo, waimene bukiji, ne kuya konka ko ajinga.

³⁰ (Yesu waji ukyangye kufika mu muzhi, wakijingatu konkakwa kwamutaine Maata.)

³¹ Ponkapo Bayudea bajinga nanji mu nzubo na kumujijishapo, byo bamwene Maliya waimana bukiji ne kulupuka, ke bamulondele, sa balanguluka amba, ubena kuya ku kilende na kukajijilako.

³² Ponkapo Maliya, byo afikile kwi Yesu, pa kumumona, waponene ku maulu anji, ne kumwambila amba, “Nkambo, inge mwajinga kuno, mulongo wetu inge kechi wafwile ne!”

³³ Ne Yesu byo a mumwene kasa ajila, kabiji ne Bayudea bo aishilenga naabo nabo kasa bajila, ne muchima wa mupile munda, ne aye kumvwa bulongo ne.

³⁴ Kepo aipwizhe amba, “Nanchi mwamutula kwepi?” Kumvwa abo ba mukumbwile amba, “Nkambo, twayai mukamone.”

³⁵ Yesu kajile ne mipolo,

³⁶ Ponkapo Bayudea ba ambile amba, “Talai, byo amutemwisha!”

³⁷ Kumvwa bamo ba ambile amba, “Lelo uno walabishe meso a mpofu, kechi wakonsheshe kukanya uno muntu kufwa nenyi?”

Kusanguka kwa Lazalasa

³⁸ Ponkapo Yesu kasa afichishiwa ku muchima, kaiye ne kwiya ku kilende, kya jiyengo kyo babikileko jibwe.

³⁹ Ne Yesu wakambiizhe amba, “Fumyaiko jibwe!” Kumvwa Maata, nyenga ya wafwa, wamwambijile amba “Nkambo, pano kanunke. Mambo poafwijile papita pano ke moba ana!”

⁴⁰ Kumvwa Yesu wamwambijile amba, “Amiwa kechi naji kwimwambila namba, umvwe mwitabile, musakumona lukumo lwa Lesa nenyi?”

⁴¹ Kepo bafumisheko jibwe. Ponkapo Yesu wainwine meso anji, ne kwamba amba, “Taata, nemusanchila byo mwang'umvwa.

⁴² Kabiji nayuka byo mukelwa kung'umvwa, pakuba na mambo a bantu baimana pano ko kwamba ko naamba namba betabile byo mwantuma.”

⁴³ Byo a ambile bino, wabijikile na jiwi jikatampe amba, “Lazalasa, lupukaimo!”

⁴⁴ Ponkapo aye wafwile walupukilemo kasa akaswa ku maboko ne ku maulu na bisapi bya lufu, ne pa meso napo pakashilwe na kitambala. Ne Yesu wibambijile amba, “Mukasululai, ayenga.”

⁴⁵ Ponkapo Bayudea bavula, bonkaba baishile kwi Maliya, byo bamwene byo aubile Yesu bamwitabijile.

⁴⁶ Pakuba bamo bayile ku Bafaliseo, na kwibabula byaubile Yesu.

⁴⁷ Ponkapo bang'anga bakatampe ne Bafaliseo baikajile kije, ne kwamba amba, “Tube byepi? Mambo uno muntu ubena kuba biyukilo byavula!

⁴⁸ Inge twamulekatu byonkabye, bantu bonse bakamwitabila, ne bena Loma basa kukeya na kwitwangata ntanda yetu ne kisaka kyetu pamo!”

⁴⁹ Pakuba umo wa mwi abo, jizhina janji Kaifasa, ye wajinga ng'anga mukatampe mu yewa mwaka, aye wibambijile amba, “Anweba kafwako ne kyo mwayuka ne!

⁵⁰ Kechi mwayuka amba anweba kimuwamina, amba muntu umo afwile bantu, ne kisaka kyonse kechi kyonaike ne”

⁵¹ Abino byo a ambile kechi wibyambile mwine ne, pakuba byo ajinga ng'anga mukatampe mu yewa mwaka, waawile na Mupashi mambo a Yesu byo akafwila kyokya kisaka,

⁵² kabiji kechi kyonkakyatu kisaka ne, poso akapwizhe pamo baana ba Lesa bapalang'ena monse, monse.

⁵³ Kabiji kufuma ku joja juba baumvwang'ene mwa kumwipayila Yesu.

⁵⁴ Onkao mambo Yesu kechi wapitang'enenga patoka mu Bayudea ne, wafumineko kaye mumande pepi na mungye, ku muzhi yebateela amba, Efelaimu waikele konka na baana banji babwanga.

⁵⁵ Kijiilo kya Bayudea kya Lupitailo kyajinga pepi, ne bavula bamu mande bayile ku Yelusalema, kijiilo kasa kikyangye, betokesheshe jimo abo bene.

⁵⁶ Ponkapo bamukebelenga Yesu, ne kwambang'ana abo bene na bene byo baimene mu nzubo ya Lesa amba, “Mwalanguluka byepi? Kechi akeye ku kijiilo nenyi?”

⁵⁷ Byonkabyo bang'anga bakatampe ne Bafaliseo bakambizhizhe kala amba, inge muntu wayuka ko aji, etubuule tukamukwate.