Yoano 10 - KNTP

Kishimpi kya kafunga wawama

¹ “Kine, kine, nemwambila namba, awa ubula kutwelela pa kibelo mu kipaka kya mikooko, pakuba ukanjijila pangi ye ngivi kabiji ye kapondo.

² Pakuba aye utwelela pa kibelo, ye kafunga wa mikooko.

³ Aye, bamushinkwilako ku ulama kibelo, ne mikooko yumvwa jiwi janji, kabiji wiita pa jizhina mikooko yanji mwine, ne kwiitangijila pangye.

⁴ Pa kwiilupula pangye yonse yanji mwine, aye wiitangijila, ne ayo mikooko imulondela, mambo yayuka jiwi janji.

⁵ Pakuba mwenyi kechi imulondele ne, isa kumunyema mambo kechi yayuka jiwi ja mwenyi ne.”

⁶ Yesu wibambijile kino kishimpi, pakuba abo kechi bebyumvwine mo byayila ne.

⁷ Kepo Yesu ebambijile jibiji amba “Kine, kine nemwambila namba, amiwa yami kibelo kya mikooko.

⁸ Bonse batangijilepo kala bo bangivi ne tupondo, pakuba mikooko kechi ibomvwine ne.

⁹ Amiwa yami kibelo. Inge muntu watwelela pe amiwa ukapuluka, kabiji ukatwelanga ne kulupuka, kasa amona bya kuja.

¹⁰ Ngivi kechi wiyatu ne, poso kwiba, ne kwipaya, ne konauna. Amiwa naishile namba bamone bumi, kabiji namba bekale naabo bwavula.

¹¹ “Amiwa ne kafunga wawama, kafunga wawama welela mikooko mweo wanji.

¹² Pakuba ye bafweta, kechi kafunga ne, ne mikooko kechi yanji ne, pa kumona musuka kasa eya, wiileka mikooko, ne kunyema, ne musuka wiikwata, ne kwiipalang'anya.

¹³ Unyema mambo ye wa mfweto, kechi utesha muchima ku mikooko ne.

¹⁴ Amiwa ne kafunga wawama, bami nebayuka, ne bami nabo bangyuka.

¹⁵ Monka mwangyukila bataata amiwa, ne amiwa nebayuka bataata, ne amiwa neyelela mikooko mweo wami.

¹⁶ Kabiji mikooko ikwabo nji nayo, kechi ya ku kyo kino kipaka ne. Nayo amiwa nafwainwa kwiileta, ne ayo ikomvwa jiwi jami, kabiji ikekala ke kisaka kimo, ne kafunga umo.

¹⁷ “Kyo bantemenwa bataata, mambo amiwa ngela mweo wami, namba, nkamutambule jibiji.

¹⁸ Kafwako ung'angataye ne, pakuba na mwela amiwa mwine. Nji na luusa lwa kumwela, kabiji nji na luusa lwa kumutambula jibiji. Uno ye mukambizho ye bankambizhizhe bataata.”

¹⁹ Ponkapo mu Bayudea mwabuukile lwabano jibiji na mambo a bino byambo.

²⁰ Ne bavula ba ambile amba, “Uji na mudemona! Wakonya! Mumumvwina ka?”

²¹ Bakwabo amba, “Bino kechi byambo bya wanonkwa ku mudemona ne! Nanchi mudemona akonshe kulabisha meso a mpofu nyi?”

Yesu byo bamukaine ku Bayudea

²² Ku Yelusalema mu kimye kya mashika kwajinga kijiilo kya Nzhijikisho.

²³ Ne aye Yesu wapitang'enenga mu nzubo ya Lesa mu bukonde bwa Solomone.

²⁴ Ne Bayudea bamuzhokolokele ne kumwipuzha amba, “Nanchi moba anga o uketuzhinaukishanga? Tubujishai kya kine, yenu Kilishitu nyi?”

²⁵ Kumvwa Yesu wibakumbwile amba, “Nemubujile, ne anweba kechi mwaitaba ne. Mingilo yo nguba mu jizhina ja bataata yo inshimuna.

²⁶ Pakuba anweba kechi mwaitaba ne, mambo anweba kechi mwi mikooko yami ne.

²⁷ Mikooko yami yumvwa jiwi jami, ne amiwa neiyuka, ne ayo indondela.

²⁸ Ne amiwa neipa bumi bwa myaka, ne ayo kechi ikonaike myaka yonse nangwa pachechetu ne. Kabiji kafwako nangwa umo ukeinsompola mu kuboko kwami ne.

²⁹ Bataata beimpele bakila bonse, kafwako wakonsha kwiisompola mukuboko kwa bataata ne.

³⁰ Amiwa ne bataata twi umo.”

³¹ Ponkapo Bayudea batolele jibiji mabwe amba bamwase.

³² Ne Yesu wibambijile amba, “Mingilo yavula yawama yo nemumwesheshe yafumine kwi bataata, nanchi ye wepi ye mungashila mabwe?”

³³ Bayudea bamukumbwile amba, “Kechi twimwashila mambo a mwingilo wawama ne, twimwashila mambo a kumuba mwenga Lesa kabiji mambo obewa mwine muntutu, wipa bu Lesa.”

³⁴ Kumvwa Yesu wibambijile amba, “Nanchi mu buku wenu wa mizhilo kechi kyanembwa amba, ‘Anweba mwi ba lesa nenyi?’

³⁵ Inge aye wi bateela bo bafikizhizha mambo a Lesa amba, ba lesa (ne kinembelo kechi kyayuka kuzhilulwa ne.)

³⁶ Anweba munena ye bazhijika, watumwa kwi bataata pano pantanda amba, wamuuba mwenga Lesa byo najikwamba namba, amiwa ne Mwana Lesa nyi?

³⁷ Inge kechi nguba mingilo ya bataata ne, kechi mungitabile ne.

³⁸ Kabiji inge neyuba nangwa kechi mwangitabila amiwa ne, nanchi itabilaiko mingilo yami, namba muyukishetu amba, bataata baji mwi amiwa, ne amiwa nji mwi bataata.”

³⁹ Ponkapo ke basake kumukwata jibiji, pakuba aye wibaposomokele mu maboko abo.

⁴⁰ Ponkapo wayile jibiji ku bushiya bwa Yodano, kwabatizhilenga Yoano kala, ko koakekajile.

⁴¹ Ne bavula bamupwijile ne kwamba amba, “Yoano kine kechi waubile kiyukilo nangwa kimo ne, pakuba byonse bya ambile Yoano bya ye uno muntu byaji bya kine.”

⁴² Ne bavula bamwitabijile konkakwa.