Yoano 1 - KNTP

Bya kutatwilako

¹ Mu ntendekelo mwajinga ao Mambo, ne ao Mambo ajinga na Lesa, ne ao Mambo ajinga Lesa.

² Ye wajinga na Lesa mu ntendekelo.

³ Byonse byalengelwe kwi aye, kabiji kafwako nangwa kimo kyalengelwe kwa kubula aye ne.

⁴ Mwi aye mwajinga bumi, ne abwa bumi bwajinga Kyeya kya bantu.

⁵ Ne akyo Kyeya kisaamina mu mfishi, ne mfishi kechi ikishinda ne.

⁶ Kwaishile muntu ye batumine kwi Lesa, jizhina janji Yoano.

⁷ Ye waishile na kushimuna, ne kupana bukamonyi na mambo a kyokya Kyeya, amba bonse betabile kupichila mwi aye.

⁸ Aye kechi wajinga kyokya Kyeya ne, waishile na kushimuna mambo a kyokya Kyeya.

⁹ Akyo kyajinga kyeya kya kine, kisaamina bantu bonse, pa kwiya pano pantanda.

¹⁰ Aye wajinga pano pantanda, ne pano pantanda palengelwe kwi aye, bino ba pano pantanda kechi bamuyukile ne.

¹¹ Waishile ku ba kwanji mwine, bino bantu banji mwine kechi bamutambwile ne.

¹² Pakuba bonse mobavujila bamutambwile, ne kwitabila mu jizhina janji, ibo bo apeele luusa lwa kwikala ke baana ba Lesa.

¹³ Bo basemekelwe, kechi ku mashi ne, nangwa ku kyaswa muchima wa buntunshi ne, nangwa ku kyaswa muchima wa muntu ne, kana konka kwi Lesa.

¹⁴ Kabiji ao Mambo aalukile ke muntu, ne kwikala waikajilenga muno mwetu. Kabiji twamwene lukumo lwanji, lukumo nobe lwa yewa Mwana umo yenka wafuma kwi Shanji, kasa ayula bupe ne bukine.

¹⁵ Yoano wamushimwine ne kusansula jiwi janji amba, “Uno i ye, ye na ambile namba, kunyuma yami kubena kwiya uji kulutwe kwami, mambo aye wajinga mutanshi.”

¹⁶ Pakuba mo mu kuyula kwanji mo twatambwijile atweba bonse, bupe pa bupe bukwabo.

¹⁷ Mambo Mizhilo yapainwe mwi Mosesa, bino bupe ne bukine bwaishile mwi Yesu Kilishitu.

¹⁸ Kafwako muntu wamwenepo Lesa ne. Yenkawa Mwana umo uji mu kyaji kya Shanji, ye wamulumbulwile.

Byambo bya kwa Yoano Mubatishi

¹⁹ Kushimuna kwa Yoano ko ko kuno, Bayudea byo batumine kwi aye bang'anga ne bena Levi bamu Yelusalema na kumwipuzha amba, “Nanchi anweba mwi bang'anyi?”

²⁰ Aye wisolwele, kechi wifiile ne. Wisolwele amba, “Kechi yami Kilishitu ne.”

²¹ Kabiji bamwipwizhe amba, “Pano nanchi mwi bang'anyi? Mwi ba Elaija nyi?” Kumvwa aye amba, “Ine kechi ye amiwa ne.” “Nanchi mwi ngauzhi nyi?” Kumvwa aye amba, “Ine.”

²² Ponkapo abo amba, “Lelo mwi bang'anyi? Tutwale mukumbu ku betutuma. Nanchi mwiteela amba ka anweba bene?”

²³ Aye amba, “Amiwa ne jiwi ja umo ubijika mungye amba, ololai jishinda ja Nkambo! Monka mwa ambijile ngauzhi Isaya!”

²⁴ Abano bantu batuminwe ku Bafaliseo,

²⁵ kabiji bamwipwizhe amba, “Nanchi mambo ka o ubatizhila byo wabula Kilishitu, nangwa Elaija, nangwa Ngauzhi?”

²⁶ Kepo Yoano wibakumbwile amba, “Amiwa mbatizha na mema, pakuba mukachi kenu mwaimana umo ye mwabula kuyuka anweba,

²⁷ ye yewa undondela panyuma, mikanda ya makwabilo anji kechi nafwainwa kwiikasulula ne.”

²⁸ Bino byaubilwe mu Betani ku bushiya bwa Yodano, kwabatizhilenga Yoano.

Mwana Mukooko wa Lesa

²⁹ Byo bwakiile lukelo Yoano wamwene Yesu kasa eya ko aji, kabiji wa ambile amba, “Talai, Mwana Mukooko wa Lesa, ye ufumya bundengamambo bwa ba pano pantanda!

³⁰ Uno i ye, ye na ambile namba, kunyuma yami kubena kwiya muntu uji kulutwe kwami, mambo aye wajinga mutanshi.

³¹ Ne amiwa kechi namuyukile ne, bino amiwa naishile na kubatizha na mema pakuba amba, aye akayukanyikwe kubena Isalela.”

³² Kabiji Yoano washimwine amba, “Namwene Mupashi kasa ekila mwiulu nobe nkunda, ne kumwikala aye.

³³ Ne amiwa kechi namuyukile ne, pakuba awa wantumine na kubatiza na mema, wang'ambijile amba, ‘Awa yenka ye ukamona kasa bamwikijila ku Mupashi, ne kwikala pe aye, ye yenka ubatizha na Mupashi Wazhila.’

³⁴ Ne amiwa namwene, ne kushimuna nashimuna namba uno ye Mwana Lesa.”

Baana babwanga batanshi ba kwa Yesu

³⁵ Kabiji byo bwakiile lukelo aye Yoano waimene na baana banji babwanga babiji,

³⁶ wamwene Yesu byo apichilenga ne kwamba amba, “Talai, ye Mwana Mukooko wa Lesa!”

³⁷ Abo baana babwanga babiji bamumvwine byo a ambile, ne abo bamulondejile Yesu.

³⁸ Kabiji Yesu byo a futulukile ne kwibamona kasa bamulondela, wibepwizhe amba, “Ikika kyo musaka?” Kumvwa abo amba, “Laabi, (pa kulumbulula ko kuuba amba, ‘Mufunjishi,’) mwikala kwepi?”

³⁹ Aye wibambijile amba, “Twayai, mukamone.” Kimye kyaubile ke mabanga. Kepo baishile, bamwene ko aikajilenga, ne abo baikajile nanji aja juba.

⁴⁰ Umo wa mu boba babiji baumvwine Yoano, ne kumulondela Yesu, wajinga Andeleo mulongo wanji Shimona Petelo.

⁴¹ Uno wabangijile kutaana mulongo wanji Shimona, wamubujile amba, “Twataana Mesiasa” (pa kulumbulula ko kuuba amba, Kilishitu.)

⁴² Ne aye wamuletele kwi Yesu. Ne Yesu wamutajile ne kumwambila amba, “Anweba mwi ba Shimona mwana Yona, musakukateelwa amba, Kefasa.” (Pa kulumbulula ko kuuba amba Petelo.)

Yesu byo aichile ba Filipa ne Natanela

⁴³ Kabiji byo bwakiile lukelo, aye Yesu wasakile kuya ku Ngalilea. Wataaine Filipa kabiji wamwambijile amba, “Ndondelai.”

⁴⁴ Aye Filipa wajinga wa ku Betesaida, muzhi wabo umo ne Andeleo ne Petelo.

⁴⁵ Ne aye Filipa wataaine Natanela, wamwambijile amba, “Twamutaana, ye banembele kwi Mosesa mu buku wa mizhilo, ne ku bangauzhi, Yesu mwina Nazala, mwana Yosefwa.”

⁴⁶ Kumvwa Natanela wamwambijile amba, “Nanchi mu Nazala mwakonsha kufuma kintu kyawama nyi?” Filipa wamukumbwile amba, “Twayai, mukamone.”

⁴⁷ Aye Yesu wamumwene Natanela kasa eya ko aji, wamwambijile amba, “Talai, mwina Isalela wa kine wabula bujimuku.”

⁴⁸ Natanela wamwambijile amba, “Mwangyukila pi?” Kumvwa Yesu amba, “Filipa kasa akyangye kwimwita, amiwa kasa nemumona munshi ya mukuyu.”

⁴⁹ Kumvwa Natanela amba, “Laabi, anweba mwi Mwana Lesa; anweba mwi Mfumu wa bena Isalela.”

⁵⁰ Yesu wamwambijile amba, “Ponka po nemubuula namba, ‘Kasa nemumona munshi ya mukuyu’ ko kwitabila ko mwaitabila nyi? Mukamona byakila bino.”

⁵¹ Kabiji wamwambijile amba, “Kine, kine amiwa nemwambila namba, Musakukamona jiulu jashinkuka, ne bamalaika ba Lesa kasa bakanjila ne kwikijila pa Mwana Muntu.”