Yakoba 4 - KNTP

Bulunda na ino ntanda

¹ Nanchi makondo ne bulwi bifuma paka mwi anweba? Bifuma monka mu bya kusakasaka byenu bilwa na bya mibiji yenu.

² Mukumbwa bintu bino kechi mwikala nabyo ne, byonkabyo mwipayang'ana, mukumbwa ne kukonsha kwibimona ne, kabiji mubena kulwa ne kutoboka. Kechi muji na bintu byo musaka ne, mambo kechi mulomba ne.

³ Mulomba ne kutambula ne, mambo mulomba kyatama, byo mulomba bintu bya kusangajikatu michima yenu.

⁴ Anweba bankende! Kechi mwayuka amba bulunda na bya pano pantanda bo bulwanyi ne Lesa nenyi? Byonkabyo awa usaka kwikala ke mulunda na bya pano pantanda wialula mwine ke mulwanyi ne Lesa.

⁵ Nanchi mwalanguluka amba, binembelo byaamba kyatu nyi? Byo byaamba amba, “Aye witusakisha atweba na butemwe kaube ne kichima na mambo a Mupashi yeaikazha mwi atweba.”

⁶ Bino aye Lesa upana bupe bwavula. Monka mo kyanembelwa amba, “Lesa ukanya betota, pakuba upana bupe ku bepelula.”

⁷ Byonkabyo nekenenai Lesa. Pakuba Diabola, mukanyai ne aye ukemunyema.

⁸ Fwenyai kwipi ne Lesa, kabiji ne aye ukafwenya kwipi ne anweba. Ovwai maboko enu, anweba bandengamambo! Tokeshai michima yenu, anweba ba michima ibiji.

⁹ Ubai bulanda ne kujila mabingo ne mipolo, tuseko twenu twaluke ke mabingo, ne lusekelo lwenu lwaluke ke bulanda.

¹⁰ Ipelulai ku meso a Nkambo, ne aye ukemutumbijika.

Kuzhachisha bakwenu ne.

¹¹ Anweba bakwetu, kechi mwineene bibi anweba bene na bene ne. Awa umuneena bibi mulongo wanji, nangwa kumuzhachisha mulongo wanji, wiineena bibi Mizhilo, ne kwiizhachisha Mizhilo. Bino umvwe uzhachisha Mizhilo, kechi wiulama Mizhilo ne, wiuchiba mambo.

¹² Kuji umo yenka upana Mizhilo, ye uchiba ne mambo, yenka aye wakonsha kupulusha ne konauna. Pakuba obewa yobe ng'anyi byo uzhachisha mukwenu?

Kwi bajimuna na mambo a bwitote

¹³ Akyumvwai anweba mwamba amba, “Lelo nangwa kesha tukaya kuyewa muzhi, tukekalako mwaka umo ne kupota ne kupotolola, tukamwenamo nsubo.”

¹⁴ Pakuba bino kechi mwayuka bikamweka keesha ne. Nanchi bumi bwenu buji byepi? Buji nobe bwishi bumweka kakimye kacheche ponkapo bwazhimang'ana.

¹⁵ Pakuba mwafwainwa kwamba amba, “Umvwe Nkambo waswa, tukekala bomi, tukooba kikye nangwa kyokya.”

¹⁶ Pano bino mubena kwitota na kwitakaika kwenu kwatu, kwitota konse kwa byonkabyo kwatama.

¹⁷ Byonkabyo awa wayuka kuuba kyawama, umvwe ne kwikyuba ne, walenga mambo.