Yakoba 3 - KNTP

Lujimi

¹ Anweba balongo bami, mwi anweba kechi mwikale bafunjishi bavula ne, byo mwayuka amba atweba bafunjishi tukachibilwa bunchiba mambo bwakila mu kukatazha.

² Mambo atweba bonse tupusa mu bintu byavula. Umvwe muntu wabula kupusa mu byo amba, ao muntu walumbuluka, wakonsha kulama ne mubiji wanji yensetu pamo.

³ Umvwe twabiika byela mutunwa twa bambili amba betukookele, twiyalulula ne mibiji yabo pamo.

⁴ Talai pamo ne maato akatampe nao beendesha na luvula mukatampe, bino bealulula na kakyalululo kacheche, monka mo asakila mwine walulula bwato.

⁵ Byonkabyo ne lujimi naye kyo kintu kicheche kya ku mubiji, kabiji witoota bintu bikatampe. Langulukai kiundu byo kyabaya kyambuka na kamujilo kachechetu!

⁶ Kabiji lujimi naye uji nobe mujilo, ntanda ya bubi ya mu bya mibiji yetu ye lujimi, ye utamisha mubiji yense, ne kwambula bwikalo bonse bwa bumi bwetu, kabiji mwine wambulwa ku ngehena.

⁷ Mambo misango yonse ya banyama ne ya bang'onyi, ne ya bikalaba panshi, ne bilengwa biji mu mema bantu bebilenga amba bibakookele.

⁸ Pakuba lujimi kafwako nangwa umo wakonsha kumunekenya ne. Ye mubi ubula kukokoloka, wayula bulembe bwa lufu.

⁹ Iye yetutotako Nkambo ne Taata; kabiji iye yenka ye tufingako bantu balengwa mu kipasha kya Lesa.

¹⁰ Monka mu kanwa kamo mulupuka mapesho ne mafingo. Balongo bami, bino bintu kechi byafwainwa kwikala byonkabyo ne.

¹¹ Nanchi mu jiso jimo ja nsulo, mutupauke mema atobala ne alula nyi?

¹² Balongo bami, kichi kya mukuyu kipange maolivi nyi? Nangwa mung'anzang'anza apange makuyu nyi? Nangwa mu mema a mukele kechi mukonshe kufuma atobala ne.

Maana a mwiulu

¹³ Ng'anyi wa mwi anweba uji na maana, wafunjishiwa bulongo? Amweshe na bwikalo bwanji bwawama, ne na byubilo byanji mu bukimote bwa maana.

¹⁴ Pakuba umvwe muji na kichima ne bululu ne bongozhi mu michima yenu, kechi mwitote ne kwibubepela bukine ne.

¹⁵ Ano kechi o maana afuma mwiulu ne, pakuba oa pano panshi a buntunshi, a bademona.

¹⁶ Kabiji kuji kichima ne bongozhi, ko kuji ne byamfulumfulu ne byubilo byonse byatama.

¹⁷ Pakuba maana afuma mwiulu, patanshi oa wamishatu, kabiji oa mutende, oa kooka, oa peela kusanshijilwa, oa yula lusa ne bipangwa byawama, oa bula misalululo, oa bula bujimbijimbi.

¹⁸ Kabiji bipangwa bya bololoke bibyalwa mu mutende kwi boba baleta mutende.