Yakoba 2 - KNTP

Lujimuno na mambo a kutala ku bilungi

¹ Balongo bami, byo mwaikala na lwitabilo lwa mwi Nkambo yetu Yesu Kilishitu Nkambo wa lukumo, kechi mutale ku bilungi bya bantu ne.

² Umvwe mu kipwilo kyenu mwaiya muntu umo uji na kambalaminwe ka ngolode ne bivwalo byawamisha, kabiji mwaiya ne muyanji naye na bivwalo byatama.

³ Ne anweba mwanemekako awa wavwala bivwalo byawamisha, ne kumwambila amba, “Ikalai pa kino kipona kyawama,” ne aye muyanji mwa amba amba, “Imana kokwa, nangwa amba, ikala panshi ya kipona kya maulu ami,”

⁴ nanchi pano kechi mwiabanya anweba bene, ne kwikala ba mitonyi baji na milanguluko yatama nenyi?

⁵ Umvwai balongo bami batemwe! Aye Lesa kechi wasalulwile abo bayanji ba pano pantanda ba lwitabilo amba bekale banswanyi ba bufumu boalayile kwi abo bamutemwa nenyi?

⁶ Pakuba anweba mwamusuula muyanji! Banonshi kechi ibo bemukatazha ne kwimutwala ku bije nenyi?

⁷ Kechi ibo bejineena bya mwenga aja jizhina janeema jo mwatelwa nenyi?

⁸ Byonkabyo umvwe mwalama awa muzhilo wa bufumu, monka mwayila kinembelo amba, “Ukatemwa mukwenu pamo byonka byowitemwa obewa mwine,” abyo mwauba bulongo.

⁹ Pakuba umvwe mwatala ku bilungi bya bantu, mwalenga mambo, ne kuzhatwa ku mizhilo ke muji bazhilulula mizhilo.

¹⁰ Mambo awa ulama mizhilo yonse ne kuzhilululapo umo, wazhilulula yonse.

¹¹ Mambo aye wa ambile amba, “Kuuba bukende ne,” ye yenka wa ambile ne kikwabo amba, “Kwipayang'ana ne.” Kabiji umvwe obewa kechi uba bukende ne, bino wipayang'ana, wazhilulula mizhilo.

¹² Byonkabyo kasa mwamba ne kuuba pamo byonka byafwainwa kwamba ne kuuba nobe bantu bakachibilwa mambo ku mizhilo ya bwana bwa bene.

¹³ Mambo kuchiba mambo kukekala kwakubula lusa kwi yewa ubula kwibobila lusa bakwabo. Lusa lushinda luzhachisho.

Lwitabilo ne mingilo

¹⁴ Balongo bami, kyokya byepi umvwe umo wa amba amba uji na lwitabilo, bino mingilo ufwayo? Kana lonkalwa lwitabilo lukamupulusha nyi?

¹⁵ Kabiji Umvwe mulongo nangwa nyenga uji na bwamba kabiji kechi uji na kajo ka pa juba pa juba ne.

¹⁶ Ne umo wa mwi anweba wibambila amba, “Mwende mu mutende! Mube kyuya kabiji muje ne kwikuta!” Kwakubula kwibapa bintu bikebewa ku mibiji yabo ne, kino kyawamina mwepi?

¹⁷ Byonkabyo ne lwitabilo, umvwe lwabula mingilo, lwafwa, byo luji bunke.

¹⁸ Pakuba umo ukamba amba, “Obewa uji na lwitabilo, ne amiwa nji na mingilo. Mbuule biji lwitabilo lobe kwabula mingilo, ne amiwa nkakubuula lwitabilo lwami monka mu mingilo yami.”

¹⁹ Obewa waitaba amba Lesa ye umo, wauba bulongo! Bademona nabo byobyo baitaba, kasa bazakama.

²⁰ Bino obewa kilubi wasaka kuyuka amba, lwitabilo lwabula mingilo lo lwatu nyi?

²¹ Aye Abulahama mushakulu wetu, kechi wabingishiwe na mingilo byo alambwile Izaka mwananji pa kyakusokelapo bitapisho nenyi?

²² Mwamona lwitabilo byo lwaingijilenga na mingilo yanji, ne monka mu mingilo lwitabilo lwalumbulukile.

²³ Ne kinembelo kyafikile kyaamba amba, “Abulahama wamwitabijile Lesa, kabiji kyamutongwejilwe amba waoloka.” Ne aye bamutelele amba mulunda na Lesa.

²⁴ Pano mwamona byo abingishiwa muntu na mingilo, kechi na lwitabilo lonka ne.

²⁵ Kabiji byonkabyo ne aye Lehaba awa pite, kechi wabingishiwe na mingilo, byo ebatambwijile baluwe, ne kwibalupwila mu jishinda jingi nenyi?

²⁶ Mambo byonka byo afwa mubiji kwakubula mupashi, ne lwitabilo nalo pamo, kwakubula mingilo lwafwa.