Titusa 2 - KNTP

Lufunjisho lwalumbuluka

¹ Pakuba obewa, wambenga byonka bintu byafwainwa lufunjisho lwalumbuluka.

² Wibambile banabalume bakulumpe bekale bashing'ama, ba kwikanya, balumbuluka mu lwitabilo, ne mu butemwe, ne mu butekanye.

³ Ne banabakazhi bakulumpe nabo pamo, wibambile bekale byafwainwa bazhijikwa, kechi babang'ana ne, nangwa banonkwa buzha ku binyu ne, bekale ba kufunjisha byawama,

⁴ namba be bafunjishe banabakazhi banyike batemwe bamwata wabo, ne kutemwa baana babo.

⁵ Bekale ba kwikanya ne balumbuluka, bengila bulongo ku mazubo abo, ba lusa, kasa be banekenena bamwata wabo abo bene, kuchiina amba, mambo a Lesa akanenwa bibi.

⁶ Bansongwalume nabo pamo, wibafunjishe bekale ba michima yatekanya.

⁷ Mu bintu byonse wimweshe obewa mwine ke wa kumwenako mu mingilo yawama. Wikale wakishinka ne wasumininwa mu lufunjisho lobe.

⁸ Wa byambo bya lumbuluka, bibula kukonsheka kwibizhachisha, amba awa ulengulula amone bumvu pakubula kumona kintu kibi nangwa kimo kya kwitunenenako.

⁹ Wibafunjishe bazha banekenene ba nkambo yabo abo bene, ne kwibatokesha pa muchima mu bintu byonse. Ne kwibalengulula ne,

¹⁰ nangwa kwiba ne. Bamweshenga butekanye bwalumbuluka mu byonse, namba balengele lufunjisho lwa Lesa, Mupulushi wetu, kumwekana bulongo mu bintu byonse.

¹¹ Mambo bupe bwa Lesa bwamweka, bwaleeta lupulukilo ku bantu bonse.

¹² Bwitufunjisha atweba amba, tukaane bumbulwa kwakamwa Lesa ne bya lwiso lwa pano pantanda, twikale ba kwikanya, baoloka, ne ba kunemeka Lesa pano pantanda.

¹³ Kasa tutengela alwa luketekelo lwa lusekelo, ko kumweka kwa lukumo lwa Lesa mukatampe, ne Mupulushi wetu Yesu Kilishitu.

¹⁴ Ye wipaine mwine pe atweba mu kwitukuula ku bubi bonse, ne kwitokeshesha aye mwine bantu banji mwine, bamukoyo mu kwingila mingilo yawama.

¹⁵ Wibifunjishenga bino bintu, kasa wibatundaika ne kwibalengulula na luusa lonse. Kechi uleke nangwa umo akusuule ne.