Titusa 1 - KNTP

¹ Paulo, kalume wa Lesa, kabiji mutumwa wa Yesu Kilishitu. Nasalulwilwe monka mwayila lwitabilo lwa basalululwa ba Lesa, mu kwibayukisha bukine, mwayila munema wa kunemeka Lesa,

² mu luketekelo lwa bumi bwa myaka, boalayile Lesa ubula kubepa, ntendekelo ya myaka kasa ikyangye kwikalako,

³ kabiji pa kimye kyafwainwa mwine wikimwesheshe mu byambo byanji kupichila mu kusapwila ko napelwe amiwa monka mwayila mukambizho wa Lesa Mupulushi wetu.

⁴ Kwi Titusa, mwanami wa kine wa mu lwitabilo lumo ne amiwa. Bupe ne mutende, bifuma kwi Lesa Taata ne kwi Kilishitu Yesu Mupulushi wetu, bikale ne obewa.

Mwingilo wa kwa Titusa mu Keleta

⁵ Na onka ano mambo ona kushijiile mu Keleta, namba unengezhe bintu byashajilepo, ne kutongola bakulumpe mu mizhi yonse, monka mo nakulaijiile namba,

⁶ kyafwainwa kana muntu wabula mambo, uji na mukazhi umo, uji na baana baitabila, babula kaneneno amba bancha, nangwa amba, bamilengulwila.

⁷ Mambo mukulumpe ulama kipwilo wafwainwa kwikala wabula mambo byo aji kalama wa mwingilo wa Lesa. Kechi usakatu monka mwaswila muchima wanji mwine ne, nangwa uzhingila bukiji ne, nangwa upendwa maalwa ne, nangwa upumang'ana ne, nangwa wa lwiso lwa mali ne.

⁸ Kana watemwa kutambwila benyi, watemwa byawama, watekanya, waoloka, wazhila, wikanya mu byonse.

⁹ Wafwainwa kukwachisha ku mambo a kishinka, mwayila lufunjisho, namba akakonshe kwibatundaika na mafunjisho alumbuluka, ne kwibashiina balengulula.

¹⁰ Mambo ko baji bavula bamilengulwila, ba kyabauki, bajimbijimbi, bino bamukanda bo bene bakilaamo.

¹¹ Abo kyafwainwa kwibazhindamika, bo bantu bavulang'anya bisaka byonse pa kufunjisha bintu byabula kufwainwa, na mambo a kuuba amba bamwenemo.

¹² Umo wa mwi abo bene, yenka ngauzhi wabo wa ambile amba, “Bena Keleta moba onse bo ba bubela, bantu babi, bankope babula kutondwa.”

¹³ Kuno kushimuna ko kwa kine. Na onka ano mambo wibalengulule na lupata amba, bekale ke balumbuluka mu lwitabilo,

¹⁴ ne kutaako muchima ku bishimi bya Bayudea ne, nangwa ku mikambizho ya bantu bavundamina ku bya bukine ne.

¹⁵ Ku bamichima yatoka bintu byonse byatoka; pakuba ku batamishiwa kala ne babula kwitabila, kafwako nangwa ka kintu kamo katoka ne, pakuba maana abo ne jiwi ja mu michima yabo byatamishiwa kala.

¹⁶ Abo bamba amba, Lesa twamuyuka, bino mu mingilo yabo bamukana, byo baji batamishatu, ne bamilengulwila, ne mingilo yonse yawama kechi ibafwainwa ne.