Tesalonika 5 - KNTP

Bya kwinengezha na mambo a kwiya kwa Nkambo

¹ Kabiji anweba bakwetu, mwayila bimye ne myaka, kechi kyafwainwa kwimunembelamo kintu ne.

² Mambo anweba bene mwayukisha amba, juba ja Nkambo jikeya nobe ngivi byo eya bufuku.

³ Bantu byo bakyamba amba, kwatalalatu bulongo, byonse byaikala bulongo, ponkapo lonaiko lukebasolomokela nobe bisanso bimufikila mwanamukazhi uji na jiimi, kabiji kechi bakapuluka nangwa pacheche ne.

⁴ Pakuba anweba bakwetu, kechi muji mu mfishi amba, aja juba jikemutaane nobe ngivi ne.

⁵ Mambo anweba bonse mwi baana ba kyeya, mwi baana bamute. Kechi twi ba bufuku nangwa ba mfishi ne.

⁶ Onkao mambo kechi tulaale tulo byo balaala bakwabo ne, nanchi tulabenga ne kukenkenta kasa twatekanya.

⁷ Mambo bantu, tulo balaala bufuku, kabiji a ba bapendwa, nabo bapendwa bufuku.

⁸ Kabiji atweba byotuji bamute, twikale batekanya, tuvwale kyela kya pa kyaji kya lwitabilo ne butemwe, ne kya ku mutwe kya luketekelo lwa lupulukilo.

⁹ Mambo Lesa kechi witutongwejile bukaji ne, poso kumona lupulukilo mwi Nkambo yetu Yesu Kilishitu,

¹⁰ ye witufwijile amba, nangwa twafwa nangwa twi bomi, tukekalanga nanji na bumi pamo.

¹¹ Onkao mambo ikoseshainga anweba bene na bene ne kwikomesha anweba bene na bene monka momubiila.

Bya kupezhako ne lwimu

¹² Kabiji anweba bakwetu twimusashijila namba, kasa mwi banemeka a ba bengila kyakosa mwi anweba, bo bemulama mwi Nkambo ne kwi mufunjisha.

¹³ Kasa mwi banemekesha na mushingi wakila mu butemwe na mambo a mwingilo wabo. Ikalainga na mutende anweba bene na bene.

¹⁴ Kabiji anweba bakwetu twimufunda namba, mwibafunjishe ba nkope, koseshai ba michima ya pungila, kwashai banekena, mwikale bakooka michima ku bonse.

¹⁵ Kechi muleke muntu abwezhe kibi mu kibi kikwabo ne, bino moba onse kasa mulonda mwa kwiubila byawama anweba bene na bene, ne ku bantu bonse bakwabo.

¹⁶ Sekelai moba onse,

¹⁷ lombai na kubula kuzhikilwa,

¹⁸ mu byonse santai, kyo kyaswa muchima wa Lesa mwi Kilishitu Yesu kwi anweba.

¹⁹ Kechi muzhime Mupashi ne,

²⁰ nangwa kusuula bya aulwa na Mupashi ne,

²¹ esekai bintu byonse, kakachilai byonse byaoloka

²² zhilai misango yonse ya bubi.

²³ Pano aye Lesa wa mutende, yenkaye mwine, emuzhijiketu, kabiji mipashi yenu ne michima yenu ne mibiji yenu yonse ilamwe na kubulwa mambo ne byo akabwela Nkambo yetu Yesu Kilishitu.

²⁴ Ye wakishinka wimwita kabiji ukekyuba.

²⁵ Anweba bakwetu tulombelelai.

²⁶ Imunai bakwetu bonse na lwimu lwazhila.

²⁷ Nemwambila kya kine mwi Nkambo namba ino nkalata itangwe ku bakwetu bonse.

²⁸ Bupe bwa Nkambo yetu Yesu Kilishitu bwikale ne anweba.