Tesalonika 4 - KNTP

Bwikalo bwa kutokesha Lesa pa muchima

¹ Kyapelaako anweba bakwetu, twimusashijila ne kwimutundaika mwi Nkambo Yesu namba, monka mo twimufunjishishe atweba mwakwikela na kumutokesha Lesa pa muchima, monka mo mubena kwikajila. Namba pano mukijishemo ne ku kijishamotu.

² Mambo anweba mwayuka mikambizho yo twimulayile mwi Nkambo Yesu.

³ Mambo kino kyo kyaswa muchima wa Lesa amba mwikale bazhila, muzhile bulalelale.

⁴ Kabiji amba anweba bonse pa muntu pa muntu, muyuke mwafwainwa kwikela na bakazhi benu anweba bene monka mu buzhile ne mu butemwe,

⁵ kechi mu kusakasaka kwa lwiso ne kwa lunkumbwa pamo na Bangentila babula kuyuka Lesa ne.

⁶ Kabiji kechi pekale muntu nangwa umo, azhilulule muzhilo ne kumuba bibi mulongo wanji mu ano mambo ne. Mambo aye Nkambo ye ushinkanya mu bino bintu byonse, byonka byo twimujimwine ne kwimubujisha.

⁷ Mambo Lesa kechi witwichile ku bubipisho ne, kana mu kuzhijikwa.

⁸ Onkao mambo aye ulengulula kechi ulengulula muntu ne, ulengulula Lesa yenka aye wimupa Mupashi wanji wazhila.

⁹ Pano na mambo a butemwe bwa kutemwa balongo kechi musake muntu emunembele ne. Mambo anweba bene mwafunjishiwa kwi Lesa kwitemwa anweba bene na bene.

¹⁰ Mambo kine mwibatemwa balongo bonse baji mu Makedonya monse. Kabiji anweba bakwetu twimufunda namba mukijishemo ne ku kijishamotu.

¹¹ Kabiji muteshe michima kwikala mu mutende ne kwingila mingilo yenu anweba bene, kasa mwingila na maboko enu monka mo twimulayijile.

¹² Namba mwikale na bwikalo bwa kubula kukajilwa kintu ne, kabiji babula kwitabila bakemupa mushingi.

Kwiya kwa Nkambo

¹³ Kabiji bakwetu, kechi twasaka namba mulube na mambo a boba baafwa ne, mwakekala na bulanda pamo na bakwabo babula luketekelo.

¹⁴ Mambo twaitaba namba Yesu wafwile ne kusanguka, byonkabyo ne abo baafwa kasa baitabila mwi Yesu, Lesa ukebaleeta pamo ne aye mwine.

¹⁵ Mambo kino twimwambila mu byambo bya Nkambo namba, atweba tukatanwa bomi pa kwiya kwa Nkambo, kechi tukatangilapo ne aba bafwila mwi Nkambo bakashale panyuma ne.

¹⁶ Mambo Nkambo mwine ukekila mwiulu na mbila, na jiwi ja malaika mwine mukatampe, ne na ntolompita ya Lesa. Ne bafu ba mwi Kilishitu bakasanguka patanshi.

¹⁷ Ponkapo ne atweba tukatanwa bomi tukashikulwa naabo pamo mu makumbi, na kusambakana nanji Nkambo mwiulu. Byonkabyo tukekala ne Nkambo myaka ne myaka.

¹⁸ Onkao mambo ikoseshainga anweba bene na bene na bino byambo.