Tesalonika 3 - KNTP

¹ Onkao mambo byotwabujile kumona mwa kwikezha michima bulongo, twalangulukile namba kyawama tushale bunke bwetu ku Atene,

² kabiji twatumine Timoti, mulongo wetu wa mwingilo wa Lesa mu Mambo Awama a Kilishitu, namba emukwashe ne kwimukosesha mu lwitabilo lwenu,

³ amba muntu nangwa umo kechi asunkene ku bino bya malwa ne, mambo anweba bene mwayuka amba bitutongwelwa.

⁴ Mambo byotwajinga nenu, twimubujijile jimo namba kumona bya malwa ko kwetu, monka mo kyamwekejile, kabiji ne anweba mwayuka.

⁵ Onkao mambo ne amiwa byo nabujile kumona mwa kwikizhizha muchima bulongo, natumine muntu namba ngyuke lwitabilo lwenu, kuchiina amba, wa kwimweseka apo kampe wimweseka, ne mwingilo wetu wakaaluka ke watu.

⁶ Pakuba byo abwelele Timoti kwi atweba kufuma kwi anweba, ne kwituletela mambo a lusekelo a lwitabilo lwenu ne a butemwe bwenu, ne byo mwitulanguluka bulongo moba onse, ne kusaka kwitumona na meso, byonka byotusaka kwimumona ne atweba.

⁷ Onkao mambo, anweba bakwetu, mu byakatazha byetu byonse ne bya malwa, lwitabilo lwenu lwitutekenesha,

⁸ mambo pano twaikala na bumi, umvwe anweba mwakoselamo mwi Nkambo.

⁹ Mambo ng'anyi sante ye tukasanta kwi Lesa na mambo a lusekelo lotuji naalo ku meso a Lesa wetu na mambo a anweba.

¹⁰ Bufuku ne mute kasa tulombesha namba tukemumone na meso, ne kulumbulula akya kyabula kulumbuluka mu lwitabilo lwenu.

¹¹ Pano Lesa wetu Taata, aye mwine, ne Nkambo yetu Yesu, betunengezhezhe jishinda ja kwiya ko muji.

¹² Kabiji Nkambo ebuvuzhe butemwe bwenu buvujishe, bwa kwitemwa anweba bene na bene, ne bwa kutemwa bantu bonse, monka mo twimutemenwa atweba.

¹³ Namba, akoseshe michima yenu ikale yabula mambo monka mu buzhile ku meso a Lesa Taata wetu pa kwiya kwa Nkambo yetu Yesu na bazhijikwa banji bonse.