Tesalonika 2 - KNTP

Mwingilo wa kwa Paulo ku Tesalonika

¹ Mambo anweba bene bakwetu, mwayuka kwiya kwetu ko muji kechi kwajinga kwatu ne.

² Nangwa twamanamine ne kubiwa byatamisha bya bumvu ku Filipai, monka mo mwayukila ne anweba bene, twachinchikile mwi Lesa wetu na kwimusapwila Mambo Awama a Lesa monka mu bulwi bwavula.

³ Mambo kusapwila kwetu kechi kwafumine mu bya bubela ne, nangwa mu byabiipa ne, nangwa mu kujimbaika ne.

⁴ Pakuba tusapwila monka mo twaitabilwa kwi aye Lesa amba, twikale ba ketekelwa mu kusapwila Mambo Awama, imo mo twambila. Kechi mu kutokesha bantu pa muchima ne, kana Lesa yenka weseka michima yetu.

⁵ Mambo kechi twatainwe na kwamba byambo bya mulambisha nangwa jimotu ne, ne anweba bene mwayuka, nangwa kwamba byambo amba tumwenemo bintu ne, Lesa ye kamonyi wetu.

⁶ Nangwa kukeba kutumbijikwa ku bantu ne, nangwa kwi anweba nangwatu ku bakwabo ne,

⁷ nangwa twajinga na luusa lwakuuba amba, anweba mwitukwashe, byotuji batumwa ba Kilishitu. Bino twaikajile ba lusa mukachi kenu nobe inabo ubukata twana twanji mwine.

⁸ Byonkabyo byo twimutemwisha kechi twimupeletu byambo bya Lesa byonka ne, nanchi twimupele ne myeo yetu pamo. Mambo mwaalukile ke batemwe betu.

⁹ Mambo anweba bakwetu, mwayuka mingilo yetu yakosa ne malwa etu byo twimusapwijile Mambo Awama a Lesa, kasa twingila bufuku ne mute kuchiina amba, twakeya kwimukatazha pa kwitumwena mwa kwikeela.

¹⁰ Anweba mwi batumonyi betu, ne aye Lesa pamo, motwaikajiile ne anweba baitabila, mu buzhile ne mu bololoke ne mu kubulwa mambo.

¹¹ Mwayuka mo twimubijile anweba bonse, monka muubila shabo na baana banji mwine.

¹² Kasa twimufunda, ne kwimukosesha, ne kwimulaya namba mwendenga mwafwainwa kwi Lesa, yenkaye wimwita mu bufumu bwanji mwine ne mu lukumo.

¹³ Kabiji na mambo a ano mambo o nsanchila kwi Lesa kwakubula kuzhikilwa. Mambo byo mwatambwile kwi amiwa mambo a Lesa, kechi mwiatambwile nobe mambo a bantu ne, poso byonka byo aji kine mambo a Lesa. Kabiji oengila mwi anweba baitabila.

¹⁴ Anweba bakwetu, mwaalukile ke bapashang'ana na bipwilo bya Lesa bya mwi Kilishitu Yesu biji mu Yudea. Mambo ne anweba bemumwesheshe bya malwa bimo byonka ku bakwenu bamu mukoka wenu, monka mo bamanamine ne abo ku Bayudea,

¹⁵ ibo bamwipayile Nkambo Yesu ne bangauzhi, ne kwitumanyika ne atweba. Bobabula kutokesha Lesa pa muchima, kabiji beabanya na bantu bonse.

¹⁶ Ne kwitukanya atweba kwibambila Bangentila amba bapuluke. Mu kuyuzha kipimo kya mambo abo moba onse. Kabiji kuno kumpelo bukaji bwa malwa bwibafikila.

Paulo byo asakishe kwibamona jikwabo

¹⁷ Pakuba anweba bakwetu, atweba byo twaabana ne anweba ku meso kimye kicheche, bino kechi ku muchima ne, twaesekelenga ne kusakisha bingi kwimumona na meso!

¹⁸ Mambo twasakile kwiya ko muji. Amiwa Paulo nasakile kwiya jitanshi ne ja bubiji, bino Satana witukainye.

¹⁹ Nanchi luketekelo lwetu, nangwa munchinya wetu wa kwitotelamo kyokika? Ke anweba ku meso a Nkambo yetu Yesu byo akeya.

²⁰ Mambo kine anweba mwi lukumo lwetu ne lusekelo lwetu.