Tesalonika 1 - KNTP

¹ Paulo, ne Silivanusa ne Timoti. Ku kipwilo kya bena Tesalonika kya mwi Lesa Taata ne mwi Nkambo Yesu Kilishitu. Bupe ne mutende bikale ne anweba.

Bwikalo ne lwitabilo lwa bena Tesalonika

² Tusanta kwi Lesa moba onse na mambo a anweba bonse kasa twimuteela mu milombelo yetu.

³ Kasa twimuvuluka ne kuvulama ne, konka ku meso a Lesa Taata wetu, mambo a mwingilo wenu wakosa wa butemwe ne butekanye bwenu bwa luketekelo lwa mwi Nkambo yetu Yesu Kilishitu.

⁴ Kasa twayuka kusalululwa kwenu, anweba bakwetu boatemwa aye Lesa.

⁵ Mambo etu awama kechi aishile kwi anweba mu byambo byonka ne, bino aishile mu bulume, ne mu Mupashi Wazhila, ne mu kuyukisha kwa kine kukatampe. Byonka byo mwayuka ne anweba bene musango yetwaikajilemo mwenu na mambo a anweba.

⁶ Kabiji mwaalukile ke bakwitulondela atweba ne aye Nkambo pamo, byo mwiatambwile mambo na bya lumanamo byavula, na lusekelo lwa Mupashi Wazhila.

⁷ Byonkabyo mwaalukile ke kya kumwenako bonse baitabila mu Makedonya ne mu Akaya.

⁸ Mambo konka kwi anweba mambo a Nkambo aya nkuwa, kechi mu Makedonya ne mu Akaya monkatu ne, pakuba lwitabilo lwenu lwa mwi Lesa lwakumbana monse monse. Onkao mambo kechi tuji na bya kwamba ne.

⁹ Mambo abo bene babulang'ana motwaikajile mwenu, ne byo mwaalulukijile kwi Lesa ne kuvundamina ku bankishi, mu kwingijila Lesa mumi ne wa kine

¹⁰ ne kutengela Mwananji kufuma mwiulu, ye asangwile mu bafu, yenka Yesu ye witupokolola ku bukaji bukeya.