Ngalatiya 6 - KNTP

Kasa mwisendelako bisendwa

¹ Balongo bami, umvwe muntu watanwa na mambo, anweba ba bumupashi mwafwainwa kumubwezha wa byonkabyo na muchima wa bukimote, bino kasa mujimuka, kuchiina amba ne anweba mwakesekwa.

² Isendelaingako bisendwa anweba bene na bene, byonkabyo mukafikizha muzhilo wa Kilishitu.

³ Mambo umvwe muntu wilanguluka mwine amba ne wafwainwa kasa aji watu, wijimbaika mwine.

⁴ Bino bantu bonse pa muntu pa muntu beyeseke mingilo yabo abo bene. Kepo baketotela mu bintu byabo bene, kechi mu bya bakwabo ne.

⁵ Mambo bonse pa muntu pa muntu bakasenda bisendwa byabo bene, au kyanji, au kyanji.

⁶ Kabiji awa ye bafunjisha byambo bya Lesa, wafwainwa kupana mu byonse byawama kwiyewa umufunjsha.

⁷ Kechi mujimbaikwe ne, Lesa kechi ukosamikwa ne. Mambo akya kyonka kyo abyala muntu kyo kyonka kyo akanowa.

⁸ Mambo awa ubyajila buntunshi bwanji mwine ukanowa bubole konka ku buntunshi. Kabiji awa ubyajila Mupashi ukanowa bumi bwa myaka konka ku Mupashi.

⁹ Kabiji kechi tukooke mukuuba byawama ne. Mambo mu kimye kyafwainwa tukanowa umvwe ne kukooka ne.

¹⁰ Byonkabyo kabiji umvwe tuji na mwakuubila, twibobile bantu bonse byawama, pakuba bene bene bonka bakwetu ba mukisemi kya lwitabilo.

Bya kupezhako

¹¹ Talai, byo ne munembela na manembo akatampe na kuboko kwami amiwa mwine!

¹² Bantu bavula basaka kwimukanjikizha amba mutambule mukanda, na mambo a kuchiina kupatwa pa mambo a musalabu wa Kilishitu.

¹³ Mambo ne abo bene batambula mukanda kechi balama Mizhilo ne, bino abo basaka amba anweba mutambule mukanda mambo basaka kwitotela pa mibiji yenu.

¹⁴ Bino amiwa, kechi ngikale na kya kwitotelamo nangwa pacheche ne, posotu mu musalabu wa Nkambo yetu Yesu Kilishitu; ku yeo musalabu pano pantanda pangipayilwa amiwa, kabiji ne amiwa nepepayilwa pano pantanda.

¹⁵ Mambo mukanda yewatu. Nangwa kubulwa mukanda nako ko kwatu. Kana kulengwa kupya kyo kine kintu.

¹⁶ Kabiji mutende ne lusa bikale pa bonse benda mu ye uno muzhilo ne pa bene bena Isalela ba Lesa.

¹⁷ Kufuma ku kino kimye kechi bankatazhe ku muntu nangwa umo ne. Mambo amiwa nasenda nnembo ya Yesu kasa yanembwa pa mubiji wami.

¹⁸ Bupe bwa Nkambo yetu Yesu Kilishitu bwikale na mipashi yenu anweba bakwetu. Amena.