Ngalatiya 5 - KNTP

Kilishitu witukasulula

¹ Na mambo a bwana bwa bene kyo kyo etukasulwijile Kilishitu. Onkao mambo mwikale bakosa amba, kechi mubwele ku kikonkoji kya buzha ne.

² Umvwai, amiwa Paulo ne mwambila namba, nangwa mutambule mukanda kechi mukamwenamo kintu mwi Kilishitu ne.

³ Kine ne mujimuna ne jikwabo anweba mubena kutambula mukanda, namba mwafwainwatu kulama mizhilo yonse.

⁴ Kabiji mwa abana ne Kilishitu anweba musaka kubingila mu mizhilo. Mwafumako ku bupe.

⁵ Mambo atweba mo mu Mupashi mo tutengela na lwitabilo akya kyo twaketekela kumona, kikeshila mu bololoke.

⁶ Mambo mwi Kilishitu Yesu mukanda yewatu, ne kubulwa mukanda nako ko kwatu, kana lwitabilo lwingila mu butemwe.

⁷ Mwaendelenga bulongo! Ng'anyi wimukanya kukookela bya bukine?

⁸ Ano mafunjisho kechi afuma kwi aye wimwichile ne.

⁹ Tumbizho tucheeche tututumusha mushinshi yense.

¹⁰ Amiwa nemuketekela bulongo mwi Nkambo namba, kechi mukekala na muchima ungi ne. Pakuba awa wimukatazha nangwa ng'anyi, ukamona kuzhatwa kwanji.

¹¹ Anweba bakwetu, amiwa umvwe nkisapwila mambo a mukanda, mambo ka o nkimanyikilwa? Abyo nanchi kya kwituntulako kya musalabu kyazhimang'ana.

¹² Nasaka namba abo bemukatazha inge bechiba abo bene, inge kyawama.

¹³ Anweba bakwetu, mo mu bwana bwa bene mo mwaichilwa. Bino bwana bwa bene bwenu kechi bwikale ke bwa kubilamo bya buntunshi ne. Poso mu butemwe, mwikale ba kwiingijila anweba bene na bene.

¹⁴ Mambo mizhilo yonse yapwila mu kyambo kimo, kyokyo kino amba, “Ukamutemwa mukwenu byonka byo witemwa obewa mwine.”

¹⁵ Pakuba umvwe mubena kwikozha ne kwiuba byatama, jimukai kuchiina amba mwakeonauna anweba bene na bene.

Bipangwa bya Mupashi ne mingilo ya buntunshi

¹⁶ Kabiji naamba namba, endai mu Mupashi, abyo kechi mukooba bya lwiso lwa buntunshi ne.

¹⁷ Mambo buntunshi bulwang'ana na Mupashi, ne Mupashi naye ulwang'ana na buntunshi, mambo bino bintu bikosakena bine. Amba kechi mube abya bintu byo musaka ne.

¹⁸ Bino umvwe bemutangijila ku Mupashi, kechi muji mu Mizhilo ne.

¹⁹ Kabiji mingilo ya buntunshi yamweka. Yoyo ino; bulalelale ne bubipisho ne bya bunya;

²⁰ ne kupopwela bankishi ne bung'anga bwa lubuko ne mafika ne lutobo ne kichima ne bukaji ne bongozhi ne mabano ne mepatulo;

²¹ ne bikonkoma ne kupendwa ne kusangalala kubi ne bikwabotu bya musango uno. Mambo a bino bintu ne mujimuna pamo byonka byo nemujimwine kala, namba aba boba bya byonkabyo kechi bakaswana bufumu bwa Lesa ne.

²² Pakuba bipangwa bya Mupashi bo butemwe ne lusekelo ne mutende ne kukooka muchima ne lusa ne buwame ne bukishinka,

²³ ne bukimote ne kwikanya. Ku bya byonka bino kechi kuji muzhilo ne.

²⁴ Kabiji abo bakwa Kilishitu Yesu bapopa kala pa musalabu buntunshi bwabo ne bya kusakasaka kwabo ne bya lwiso lwabo byonse pamo.

²⁵ Umvwe twamwena bumi mu Mupashi, twendenga monka mu Mupashi.

²⁶ Kechi twikale ba bwitote bwatu, nangwa kwiteteka ne kwiumvwina kichima atweba bene na bene ne.