Ngalatiya 4 - KNTP

¹ Kabiji naamba namba, nswanyi byo akiji mwanyike, kechi wapusana na kalume ne, nangwa ye nkambo wa byonse.

² Mambo byo akiji mwanyike uji na bamulama, ne bamulamina bintu byanji, kufika ne ku kimye kya mutongwela shanji.

³ Po pamo ne atweba byo twakijinga banyike, twajinga mu buzha bwa mu bya bwanyike bya pano pantanda.

⁴ Bino pene po kyafikijile kimye, Lesa watumine Mwananji wasemenwe mu mwanamukazhi, wasemenwe mu mizhilo,

⁵ amba, akebakuule baji mu mizhilo, pakuba amba tutambule bu bwana.

⁶ Kabiji byo muji baana, Lesa watuma Mupashi wa Mwananji mu michima yenu, kasa eeta amba, Abba, Taata.

⁷ Onkao mambo pano mwi aye Lesa kechi wi muzha ne, wi mwana. Kabiji umvwe wi mwana, wi nswanyi.

Kijikila kya Paulo mambo a bena Ngalatiya

⁸ Byonkabyo mu kyokya kimye kyo mwabujile kuyuka Lesa, mwajinga mu buzha bwa babula ba lesa bakine.

⁹ Pakuba pano byo mwamuyuka Lesa, nangwa amba byo mwayukanyikwa kwi Lesa, mwalulukile byepi jibiji ku bya bwanyike byabula buneme ne byatu, ne kusaka kwikala mu buzha bwabyo jibiji?

¹⁰ Mulama moba ne bang'ondo, ne bimye ne myaka.

¹¹ Nji na moyo na mambo a anweba, namba kampe mingilo yami yo naingijilenga mwi anweba ya aluka ke yaatu.

¹² Anweba bakwetu, ne musashijila namba, mwikale byonka byonji amiwa. Mambo ne amiwa naikala byonka byo muji anweba. Kechi mwa ngubilepo kyatama ne.

¹³ Kabiji mwayuka amba, na mambo onka a kunekena kwa mubiji wami po po nemusapwijile Mambo Awama patanshi.

¹⁴ Kabiji nangwa mubiji wami wabujile kumwekana bulongo, kyajinga kya kwimweseka anweba. Kechi mwang'endelekele nangwa kunsuula ne. Bino mwantambwijile nobe malaika wa Lesa, nobe Kilishitu mwine.

¹⁵ Lelo kabiji alwa lusekelo lwenu lujipi? Mambo amiwa ne mushimuna namba, inge kyakonshekele kubiwa, inge mwalobwele meso enu ne kumpa amiwa.

¹⁶ Nanchi pano naaluka ke mulwanyi wenu pa kwimubula bya bukine nyi?

¹⁷ Abo bantu bakwabo bemusaka na mukoyo, bino kechi mu bintu byawama ne. Bakeba kwimushinkila pangye amba mwi balondele abo.

¹⁸ Kabiji kyawama kukebewa na mukoyo mu kintu kyawama moba onse, kechi mu kyonkatu kimye kyonji nenu ne.

¹⁹ Kine anweba twana twami tonaumvwina bisanso jibiji poso Kilishitu amwekeshetu bulongo mwi anweba.

²⁰ Inge najinga nenu mu kyonka kino kimye ne kupimpula ng'ambilo yami inge kyawama. Mambo njibingi na kijikila na mambo a anweba.

Kifwanyikizho kya ba Hegala ne Selai

²¹ Mbulai anweba mwakeba kwikala mu mizhilo, kechi mumvwa byamba mizhilo nenyi?

²² Mambo kyanembwa amba, Abulahama wajinga na baana babalume babiji, umo wasemenwe mu muzha, ne mukwabo wasemenwe mu mwana bene.

²³ Byonkabyo awa mwana wa muzha wasemenwe mwayila buntunshi. Pakuba awa wasemenwe mu mwana bene yewa mu mulaye.

²⁴ Bino bintu biji nobe kishimpi. Mambo bano banabakazhi o malayang'ano abiji. Lumo lwa ku mutumba wa Sinai, kasa lusema baana mu buzha, ye Hegala.

²⁵ Kabiji uno Hegala ye mutumba wa Sinai mu Alabya ye wafwanyikizha Yelusalema ujiipo. Mambo ye uji mu buzha na baana banji.

²⁶ Pakuba Yelusalema uji mwiulu ye mwana bene, ye inetu.

²⁷ Mambo kyanembwa amba: “Sekela, obewa ng'umba ubula kusema. Sangalala ne kubijika, obewa ubula kumvwa bisanso! Mambo baana ba yewa ujitu bunke bavula kukila ba yewa uji na mulume”.

²⁸ Kabiji anweba bakwetu, anweba mwi baana bamulaye, pamo byonka byo ajinga Izaka.

²⁹ Kabiji byonka byo kyajinga ne kala awa wasemenwe mwayila buntunshi wa manyikilenga yewa wasemenwe mwayila Mupashi; byobyo kiji ne pano.

³⁰ Byonkabyo nanchi kinembelo kyaamba amba ka? Amba, “Mupangai awa muzha ne mwananji mambo awa mwana wa muzha kechi akaswane pamo na mwana wa mwana bene ne.”

³¹ Byonkabyo anweba bakwetu kechi twi baana bamuzha ne, twi baana ba mwana bene.