Ngalatiya 3 - KNTP

Mizhilo nyi? Inyi lwitabilo?

¹ Anweba bena Ngalatiya ba bilubi, ng'anyi wimulowele anweba bo bamwesheshe Yesu Kilishitu ku meso enu patoka kasa apopwa pa musalabu?

² Kyonka kino kyo kyo nasaka kumvwa kwi anweba namba, mwatambwile Mupashi mu mingilo ya Mizhilo nyi, Inyi mu kwitabila mambo?

³ Nanchi mwaikala ke bantu babula maana nyi? Byo mwatatwile na Mupashi kabiji pano mulumbulukile mu buntunshi nyi?

⁴ Lelo abya byavula byo mwamwene bimumwekejile kyatu nyi? Kana kine kyajinga kyatu nyi?

⁵ Byonkabyo awa upana Mupashi kwi anweba, ne kwingila mingilo ya bulume mukachi kenu, nanchi wikyuba mu mingilo ya Mizhilo nyi, inyi mu kwitabila mambo?

⁶ Byonka byo kyajinga kwi Abulahama “byo aitabijile Lesa kabiji kyamutelejilwe amba waoloka”.

⁷ Onkao mambo yukai amba bonkaba ba lwitabilo, bo baana bakwa Abulahama.

⁸ Kabiji ne kinembelo kyamwenejile jimo amba, Lesa ukebabingisha Bangentila mu lwitabilo, kya sapwijile jimo Mambo Awama kwi Abulahama amba, “Mwi obewa mikoka yonse ya bantu ikamwenamo bibusa.”

⁹ Byonkabyo aba ba lwitabilo bo baubilwa bibusa pamo ne Abulahama wa lwitabilo.

¹⁰ Mambo bonse mobavujila baketekela mu mingilo ya mu Mizhilo bafingwa mafingo. Mambo kyanembwa amba, “Bafingwa mafingo bonse babula kukelwa mu byonse byanembwa mu buku wa Mizhilo ne kwibyuba.”

¹¹ Bino kyamwekeshatu patoka amba, kafwako nangwa umo ubingila mu Mizhilo ku meso a Lesa ne. Mambo “mololoke ukamwena bumi mu lwitabilo”.

¹² Lwitabilo ne Mizhilo kechi byayila mumo ne, mambo “Mizhilo yaamba amba muntu ukamwena bumi pa kwiilama”.

¹³ Kilishitu witukuujile ku mafingo a Mizhilo, byo aalukile ke wafingwa na mambo a atweba, mambo kyanembwa amba, “Bafingwa mafingo bonse bo bakobeka ku bichi.”

¹⁴ Amba kibusa kya Abulahama kibafikile Bangentila mwi Kilishitu Yesu. Amba tutambule mulaye, ye Mupashi monka mu lwitabilo.

Mizhilo ne mulaye

¹⁵ Balongo bami mwayila ng'ambilo ya bantu naamba namba, mulaye nangwa ekale wa muntu, umvwe waikajikwa kafwako nangwa umo ukamwalula ke watu ne, nangwa kubiikapo kikwabo ne.

¹⁶ Bino kwi Abulahama ne ku lukunwa wanji ko kwalayilwe milaye. Kechi wa amba amba “Ku nkunwa”, nobe yavula ne poso umo amba, “Kabiji ku lukunwa wobe”, awa ye Kilishitu.

¹⁷ Pano kyo naamba ke kino, alwa lulayang'ano lo baikajikile kala kwi Lesa, mizhilo yaishile panyuma pakupita myaka bitota bina ne myaka makumi asatu, kechi yakonsha kulengulula mulaye amba ekale ke waatu ne.

¹⁸ Mambo umvwe buswanyi bumwekela mu mizhilo, kechi bo bwa mu mulaye ne. Bino aye Lesa wibupaine kwi Abulahama mu mulaye.

¹⁹ Nanchi mizhilo yayila muka? Yabikilweko na mambo a mizhilulwila poso byo akeya awa lukunwa ye balayile mulaye. Kabiji yatongwelwe na bamalaika ne kuleetwa mu maboko a kwa ng'ambi.

²⁰ Kabiji ng'ambi kechi wayikelako muntu umotu ne, bino Lesa ye umo.

Kyo yaikelako mizhilo

²¹ Nanchi kabiji mizhilo ilengulula milaye ya Lesa nyi? Ine kabiji akyo ne, mambo umvwe kwapainwe muzhilo wayuka kupana bumi, inge kine kabiji bololoke bwaishijile mu mizhilo.

²² Bino kinembelo kibishinkila bintu byonse mu bundengamambo amba, akya kyalayilwe na lwitabilo lwa mwi Yesu Kilishitu kipanwe ku baitabila.

²³ Kabiji lwitabilo byo lwaji lukyangye kwiya, twalaminwe bukaili ne kushinkilwa ku mizhilo kufika ne ku kimye kikamwekana lwitabilo.

²⁴ Onkao mambo mizhilo yaikajile kalama wetu wa kwituleta kuji Kilishitu amba, tubingile mu lwitabilo.

²⁵ Kabiji lwitabilo byolwaiya, kechi tukiji na kalama ne.

²⁶ Mambo anweba bonse pano mwi baana ba Lesa monka mu lwitabilo lwa mwi Kilishitu Yesu.

²⁷ Mambo anweba bonse monka mo mwavujila mwabatizhilwe mwi Kilishitu, mwavwala Kilishitu.

²⁸ Pano kechi kuji mu Yudea nangwa mugiliki ne. Kechi kuji muzha nangwa mwana bene ne, kechi kuji mwanamulume nangwa mwanamukazhi ne. Mambo bonse mwiumo mwi Kilishitu Yesu.

²⁹ Kabiji umvwe mwi bakwa Kilishitu, mwi ba nkunwa ya Abulahama, mwi banswanyi ba monka mwayila mulaye.