Ngalatiya 2 - KNTP

Paulo waitabilwa ku batumwa bakwabo

¹ Kabiji pakupita myaka jikumi ne ina nayile jibiji ku Yelusalema ne Banabasa, nasendele ne Titusa naye pamo.

² Nayileko mambo Lesa mwine wansolwejilekyo. Kabiji ne babuujile bulongo ao mambo o nsapwila ku Bangentila, bino nalumbulwijile bantangi bonka kwa bunke, mambo a kuchiina amba, nangwa na kya byepi kwingila kwami kombena kwingila ne ko naingijilenga kwakekala ke kwatu.

³ Kabiji Titusa ye naishile nanji nangwa waji mugiliki, kechi bamukanjikizhe amba atwele mu mukanda ne,

⁴ bino kwajinga bamo basakile amba kyafwainwe kubiwa, balongo ba bubela batwelele kumbaji bonka befwanyikizhatu nobe balongo betu mwi Nkambo, mambo a kusakatu kumona byotwaikala mu bwana bwa bene botuji naabo mwi Kilishitu Yesu amba, betutwale mu buzha.

⁵ Abo kechi twibakokejile nangwa pachechetu ne, namba bukine bwa Mambo Awama bwikajikwe na mambo a anweba.

⁶ Kabiji kwi abo bantangi batumbalala, (kwi amiwa kutumbalala kwabo kechi kyo kintu ne, mambo Lesa kechi utala ku bilungi bya bantu ne), abo bantangi batumbalala kechi bambikijilepo kintu ne.

⁷ Bino bekimwene amba aye Lesa wampele Mambo Awama a kusapwila ku babula mukanda monka mobamupejile Petelo kusapwila ku bamukanda.

⁸ Mambo Lesa waingijilenga mwi Petelo mu kumupa butumwa bwa ku bamukanda ye waingijilenga ne mwi amiwa mu kumpa butumwa bwa ku Bangentila.

⁹ Kabiji abo ba Yakoba ne Kefasa ne Yoano, bonkaba batumbalele amba mapanda, byo bamwene bupe bo napelwe kwi Lesa, amiwa ne Banabasa twapakene naabo maboko a kilujo a lumvwang'ano amba, anweba muyenga ku Bangentila ne atweba tuye ku bamukanda.

¹⁰ Kabiji basakile kino kyonka amba, mwibavuluke balanda; kyonka kintu kyo nateshesheko muchima kwikyuba amiwa mwine.

Paulo byo amulengulwile Petelo ku Antioka

¹¹ Kabiji byo aishile Kefasa ku Antioka, amiwa namulengulwile pa meso anji, mambo kine watamishe.

¹² Mambo kasa bakyangye kwiya bafumine kwi Yakoba, aye wajilenga pamo na Bangentila. Pakuba byo baishile wipatwiileko ne kwabana naabo mambo a kuchiina bamukanda.

¹³ Ne Bayudea bonse nabo bajimbaikilwe pamo ne aye. Onkao mambo ne Banabasa naye watwajilwe mungi na bujimbijimbi bwabo.

¹⁴ Pakuba amiwa byo namwene byo babujile kwenda mu bololoke bwa mwayila bukine bwa Mambo Awama, na mwambijile Kefasa ku meso a bonse namba anweba byo muji mu Yudea, mwikala nobe mungentila, kechi pamo nobe Bayudea ne, mambo ka mwi bakanjikizha Bangentila amba bekale nobe Bayudea?

Kubingishiwa na lwitabilo kwa Bayudea ne Bangentila

¹⁵ Atweba twi bene Bayudea, kechi twi bandengamambo bamu Bangentila ne.

¹⁶ Nangwa byonkabyo, byo twayuka namba muntu kechi ubingila mu mingilo ya mizhilo ne. Poso mu lwitabilo lwa mwi Yesu Kilishitu. Ne atweba twaitabijile mwi Kilishitu Yesu amba, tubingile mu lwitabilo lwa mwi Kilishitu. Kechi mu mingilo ya Mizhilo ne. Mambo mu mingilo ya Mizhilo kafwako muntu nangwa umo ukabinga ne.

¹⁷ Pakuba byo twakebele kubingila mwi Kilishitu, ne atweba bene twamwekele ke tuji bandengamambo. Nanchi aye Kilishitu ye wamwingilo wa bundengamambo nyi? Ine kabiji akyo ne.

¹⁸ Mambo umvwe nashimika jibiji abya byo na kundwile, ne mweesha amiwa mwine ke wa kuzhilulula mizhilo.

¹⁹ Mambo mo mu Mizhilo mo nafwijile ku Mizhilo namba, ngikale na bumi mwi Lesa. Napopelwe pa musalabu pamo ne Kilishitu,

²⁰ kabiji amiwa kechi nakiikala na bumi ne, kana Kilishitu ye waikala na bumi mwi amiwa. Kabiji ne abwa bumi bonaikala naabo pano mu mubiji, naikala naabo monka mu lwitabilo lwa mu Mwana Lesa, yenkaye wantemenwe ne kwipana mwine na mambo a amiwa.

²¹ Amiwa kechi na alula bupe bwa Lesa ke bwatu ne, mambo umvwe bololoke bwishila mu Mizhilo, nanchi Kilishitu wafwile kyatu.