Ngalatiya 1 - KNTP

¹ Paulo, mutumwa kechi watumwa na bantu ne, nangwa kutongolwa ku muntu ne, poso kwi Yesu Kilishitu, ne kwi Lesa Taata, wamusangwile Yesu mu bafu,

² ne balongo betu bonse bonji naabo, ku bipwilo bya mu Ngalatiya.

³ Bupe kwi anweba ne mutende bifuma kwi Lesa Taata ne kwi Nkambo yetu Yesu Kilishitu.

⁴ Ye wipaine mwine na mambo a bubi bwetu, mu kwitupokolola ku bya pano pantanda pa katataka pabiipa, monka mwayila muchima wa Lesa Taata wetu.

⁵ Kwi aye kwikale lukumo myaka ne myaka. Amena.

Kechi kuji Mambo Awama akwabo ne

⁶ Nakumya byomubena kupondoka bukiji kufuma kwi aye wimwichile mu bupe bwa Kilishitu ne kuya ku Mambo Awama angi.

⁷ Bino kechi kuji Mambo Awama akwabo ne. Bino kobaji bamo bemukatazha, basaka kwalulula Mambo Awama a Kilishitu.

⁸ Pakuba nangwa atweba, nangwatu malaika wafuma mwiulu, inge wimusapwila mambo angi, nangwa a byepi, apusana na o twimusapwijile atweba, afingwe mafingo.

⁹ Byonka byo na ambile kala momo mbena kwambila nepano namba umvwe muntu, nangwa ng'anyi wimusapwila mambo awama angi nangwa a byepi apusana na o mwatambwile, afingwe mafingo.

¹⁰ Nanchi pano nasaka namba bantu bantale bulongo nyi, inyi Lesa? Nangwa mbena kukeba kwibatokesha bantu pa muchima nyi? Kabiji inge nkibatokesha bantu pa muchima inge kechi ne kalume wa Kilishitu ne.

Kwitwa kwa Paulo mu butumwa

¹¹ Kabiji anweba balongo bami, nasaka namba muyuke amba, Mambo Awama ona sapwijile amiwa, kechi afumine ku bantu ne.

¹² Mambo kechi neatambwile ku muntu ne, nangwa kufunjishiwao ne, bino neatambwile mu lumwekesho lo a mmwesheshe Yesu Kilishitu.

¹³ Mambo anweba mwaumvwine musango wa bwikalo bwami bwa mu kimye kya kala bwa mu kupandawila kwa Bayudea, byo na kijishemo kwikipata kipwilo kya Lesa ne kwi kipalang'anya.

¹⁴ Kabiji mu kupandawila kwa Bayudea amiwa ne bakijile bakwetu bavula bona esakene naabo bamu mukoka wetu, byo naubishetu mukoyo wa ku bisela bya bashakulu betu.

¹⁵ Bino byo kyamutokejile aye Lesa ku muchima, wantogwejile jimo kasa nkyangye kusemwa munda mwa bamaama, ne kungita monka mu bupe bwanji,

¹⁶ kunsolwela mwananji amiwa, amba nkasapwile mambo anji ku Bangentila, ponkapo kechi nakepwizhe bakwetu ba ku mubiji wa nyama ne mashi ne.

¹⁷ Nangwa kuya ku Yelusalema kwi abo bajinga batanshi mu butumwa ne. Nayile ku Alabya, kabiji nabwelele ku Damasakasa.

¹⁸ Kabiji pakupita myaka isatu nayile ku Yelusalema na ku mupempula Kefasa, kabiji naikajile nanji moba jikumi ne atanu

¹⁹ Pakuba batumwa bakwabo kechi ne bamwene ne. Poso yenka Yakoba mulongo wanji Nkambo.

²⁰ Kabiji mambo a bino bintu byo mbena kwimunembela, aye Lesa wayuka amba kechi mbena kubepa ne.

²¹ Kabiji naishile mu byalo bya Silya ne Kilikya,

²² kabiji na kibujilwe kuyukanyikwa pa kilungi ku bipwilo bya mu Yudea bya mwi Kilishitu.

²³ Ba umvwinengatu amba, awa witupachilenga kala pano ubena kusapwila alwa lwitabilo lo apalang'enyenga

²⁴ kabiji bamutumbijikile Lesa na mambo a amiwa.