Mateo 9 - KNTP

Kubukwa kwa muntu wakolwa kalepu

¹ Kabiji Yesu wayile mu bwato, wa abukijile bushiya ku muzhi wanji mwine.

² Kabiji talai, bamuletejile mwanamulume wakolwa kalepu, kasa alaala pa mwanya. Ne aye Yesu pa kumona lwitabilo lwabo, wamwambijile wakolwa kalepu amba, “Mwanami ikizhai muchima, mambo enu alekelwa.”

³ Ponkapo bamo banembeshi ba ambilenga mu michima yabo amba, “Uno muntu ubena kumuba mwenga Lesa.”

⁴ Yesu byo ayukile mwayila michima yabo, wibambijile amba, “Mambo ka anweba mulangulukila bibi mu michima yenu?

⁵ Nanchi kyepi kyapeela kwamba amba, mambo enu alekelwa nyi, inyi amba, imanai mwende?

⁶ Nanchi namba muyuke amba, Mwana Muntu uji na luusa pano pantanda lwa kulekela mambo(ponkapo wamwambijile ukolwa kalepu amba), imanai, shikulai mwanya wenu, muyenga ku nzubo yenu!”

⁷ Ne aye waimene kaye ku nzubo yanji.

⁸ Pakuba mabumba pa kwikimona ke moyo, ke bamutumbijike Lesa yenka wapaine luno luusa ku bantu.

Kwitwa kwa Mateo

⁹ Kabiji Yesu byo apichilenga pa kufuma kokwa, wamwene mwanamulume, jizhina janji Mateo, kasa aikala po basonkesesha. Wamwambijile amba, “Ndondelai.” Ne aye waimene kamulondele.

¹⁰ Kabiji Yesu byoaikajile mu nzubo yakwa Mateo na kuja, basonkeshi bavula ne bandengamambo baishile ne kwikala baikajile pamo ne Yesu ne baana banji babwanga.

¹¹ Bamo Bafaliseo pa kwikimona, bebambijile baana banji babwanga amba, “Mambo ka mufunjishi wenu kyoajiila na basonkeshi ne bandengamambo?”

¹² Pakuba aye pakumvwa, wa ambile amba, “Batuntulu kechi basaka shayuka wa michi ne, poso bakolwa.

¹³ Nanchi yainga, kafundai mwayila kino amba nsaka lusa, kechi kitapisho ne. Mambo kechi naiya na kwita baoloka ne, poso bandengamambo.”

Kuzhikilwa na nzala

¹⁴ Ponkapo baana babwanga ba kwa Yoano baishile kuji Yesu ne kumwipuzha amba, “Mambo ka atweba ne Bafaliseo tuzhikilwa na nzala javula, pakuba baana benu babwanga kechi bazhikilwa na nzala ne?”

¹⁵ Kumvwa Yesu wibakumbwile amba, “Lelo bakabaala ba musongoshi bakonshe kujila, mwine musongoshi kasa akiji naabo nyi? Pakuba moba akeya o bakebangata musongoshi, kabiji mu oa moba kepo bakazhikilwa na nzala.

¹⁶ Kafwako muntu utupikapo kikamba kipya pa kivwalo kya kala ne; mambo akya kikamba kyafwainwa kuzhikapo, kyondobola kivwalo kya kala ne patabuka ke pabayisha.

¹⁷ Kabiji kechi balonga binyu bya katataaka mu bafukuta ba biseba bakala ne, kuchiina amba, bafukuta bakasabika, ne binyu bikechika, ne bafukuta bakonaika. Pakuba balonga binyu bya katataaka mu bafukuta bapya ne byonse bibiji bikala bulongo.”

Mwana Yelusa ne mwanamukazhi wakwachile ku kivwalo kya Yesu

¹⁸ Byo akibambijilenga bino, ponkapo kwaishile mukulumpe umo wa kyalo, ne kumupopwela amba, “Mwanami wamukazhi wafwatu katataaka, mwane mwiye mumukwate kuboko kwenu, usakwikala na bumi.”

¹⁹ Ne Yesu waimene kamulondele ne baana banji babwanga pamo.

²⁰ Kabiji ponkapo, kwaishile mwanamukazhi kunyuma yanji, wajinga na kikola kya kupita mashi myaka jikumi na ibiji, ne aye wakwachile kunsa ya kivwalo kya Yesu.

²¹ Mambo wiambijile mu muchima wanji amba, “Kana nkwatetu nangwa ku kivwalo kyanji, nsa kubukwa.”

²² Kabiji Yesu pa kufutuluka ne kumumona wamwambijile amba, “Mwanami, ikizha muchima, lwitabilo lobe lwa kupulusha.” Ponkapotu mwanamukazhi wabukilwe ke mutuntulu.

²³ Kabiji Yesu pa kutwela mu nzubo ya mukulumpe wa kyalo, wibamwene bang'omba ba mitolilo, ne jibumba kasa jiwowakana na majilo,

²⁴ ne aye wibambijile amba, “Fumaimo! Mambo mushimbi kechi wafwa ne, walaala tulo!” Pakuba abo bamusekelenga mwenga.

²⁵ Kabiji pa kulupulamo jibumba, aye watwelele ne kumukwata pa kuboko, ne mushimbi wabuukile.

²⁶ Ne nkuwa yakyo yayile monse mu kyokya kyalo.

Kubukwa kwa bampofu babiji

²⁷ Kabiji Yesu byo apichilenga pa kufuma kokwa, bampofu babalume babiji bamulondejilenga kasa babijika amba, “Betubileko lusa, anweba mwana Davida!”

²⁸ Ne Yesu byo atwelele mu nzubo, ne bampofu nabo baishile mo ajinga, kepo ebepwizhe amba, “Mwaitaba amba, nakonsha kwimubuka nyi?” Baitabile amba, “Ee Nkambo!”

²⁹ Ponkapo wakwachile pa meso abo ne kwamba amba, “Kimumwekele monka mwayila lwitabilo lwenu!”

³⁰ Ne meso abo alabile. Kabiji Yesu wibafunjile kyakosa amba, “Talai, kechi mubuulepo muntu nangwa umo ne!”

³¹ Bino abo pa kulupuka, bakumbenye akya kyalo kyonse na nkuwa yanji.

Kubukwa kwa muntu ubula kwamba

³² Kabiji byo bafumineko, bamuletejile mwanamulume kamaama, wanonkelwe ku mudemona.

³³ Ne mudemona byo bamupangilemo, kamaama ka ambe ne kwamba, ne mabumba akuminye amba, “Kechi kyamwekelepo kala kya bibye mubena Isalela ne.”

³⁴ Pakuba Bafaliseo ba ambile amba, “Wibapangamo bademona na bulume bwa mukulumpe wabo.”

Yesu byo ebobijile bantu lusa

³⁵ Kabiji Yesu wapitang'enenga mu mizhi yonse ikatampe ne icheche, kasa ebafunjisha mu mashinagoga abo, ne kwibasapwila Mambo Awama a bufumu, ne kubuka bikola bya misango yonse ne bulema bwa misango yonse.

³⁶ Kabiji pa kumona jibumba, wibobijile lusa mambo basubakene ne kupelelwa, pamo nobe mikooko yabula kafunga.

³⁷ Kepo ebambijile baana banji babwanga amba, “Bujimi bwa kunowa bwabayisha, pakuba bamingilo bakepa.

³⁸ Onkao mambo lombai ku mwina bujimi atume bakwingila mu bujimi bwanji.”