Mateo 8 - KNTP

Kubukwa kwa muntu wa mbumba

¹ Kabiji byo aikijile pa mutumba, mabumba akatampe amulondejile.

² Kabiji ponkapo, kwaishile muntu wa mbumba ko aji ne kumupopwela amba, “Nkambo, umvwe mwaswa, mwayuka kumbuka.”

³ Ne Yesu watanyikile kuboko kwanji ne kumukwata amba, “Naswa, mubukiwe.” Kabiji ponkapotu wabukilwe ku mbumba yanji.

⁴ Kepo Yesu wamwambijile amba, “Kechi mubuule muntu nangwa umotu ne; yaingatu mukemweshe kwi ng'anga wa Lesa ne kulambula mulambu ye akambiizhe Mosesa, kikale ke kiyukilo ku bantu.”

Kubukwa kwa kalume wa mukulumpe wa bashilikale

⁵ Kabiji pa kutwela mu Kapenama, kwaishile mukulumpe wa bashilikale wamusashijile amba,

⁶ “Nkambo, kalume wami walaala mu nzubo yami ubena kubeela kalepu, wamanama bingi.”

⁷ Kumvwa aye amba, “Nsakuya namubuke.”

⁸ Kabiji mukulumpe wa bashilikale wamwambijile amba, “Nkambo, kechi kyafwainwa anweba kutwela mu nzubo yami ne; nanchi ambaitu jiwi, ne kalume wami usakukosa.

⁹ Mambo ne amiwa ne muntu wapewa luusa pa bashilikale baji munshi yami; namwambila umo namba, yanga! Ne aye kaye; ne mukwabo namba, iya! Ne aye kaiye; ne kalume wami namba, uba kikye! Ne aye wikyuba.”

¹⁰ Yesu pakumvwa wakuminye bingi, ne kwibambila bamulondejilenga amba, “Kine ne mwambila namba, kechi namwenepo lwitabilo lukatampe lwa byonkabye nangwa mubena Isalela ne.

¹¹ Kabiji nemwambila namba, bavula bakeya bakafuma ku musela ne ku muzhika, bakekala pamo ne Abulahama, ne Izaka, ne Yakoba, mu bufumu bwa mwiulu.

¹² Bino baana bamu bufumu bakatayiwa mu mfishi ya pangye, amwa mukekala kujila ne kwisuma ku meno.”

¹³ Ne Yesu wamwambijile mukulumpe wa bashilikale amba, “Bwelainga byonka byo mwaitaba bimubilwe.” Kabiji kalume wanji wakosele ponkapotu mu kyonkakyo kimye.

Kubukwa kwa inanjivyala Petelo ne bantu bakwabo

¹⁴ Kabiji Yesu pa kutwela mu nzubo yakwa Petelo, wamwene muko wanji Petelo, kasa alaala ne kubeela kikola kya mashika.

¹⁵ Ne aye wamukwachile kuboko, ponkapo ne kikola kyamulekele, ne kwimana waimene ne kwingila ke ebengijile.

¹⁶ Kabiji juba pakufika mabanga, Yesu bamuletejile bavula banonkelwe ku bademona ne aye wibapangilemo bapashi babipa mu bantu na jiwitu, ne kwibabuka bonse bakolwa.

¹⁷ Amba kifike kya ambile ngauzhi Isaya amba, “Mwine washikwile bulema bwetu, ne kusenda bikola byetu.”

Basaka kwikala ke baana banji babwanga

¹⁸ Kabiji Yesu, pa kumona mabumba akatampe sa amubumba wakambiizhe amba, “Twabukile ku bushiya.”

¹⁹ Kabiji kwaishile munembeshi umo kwi aye, ne kumwambila amba, “Mufunjishi, nkemulondelanga konse konse ko mukaya.”

²⁰ Kumvwa Yesu wamwambijile amba, “Balubwala baji na mimbwa; ne bang'onyi bapita mwiulu nabo baji na binsa; pakuba Mwana Muntu kechi ujipo nangwa na pa kushakamina mutwe wanji ne.”

²¹ Kabiji mukwabo mwana wabwanga wamwambijile amba, “Nkambo, akindekai patanshi nkiye na kuzhiika bataata.”

²² Pakuba Yesu wamwambijile amba, “Ndondelaingatu, mwibaleke bafu bazhiike bafu babo bene.”

Kuzhindamika kwa kipuupu

²³ Kabiji byo a kanjinjile mu bwato, baana banji babwanga bamulondejile.

²⁴ Ponkapo pabuukile kipuupu kikatampe pa kizhiba, kyakuuba ne bwato ke bulobe na manyaki. Pakuba aye mwine wajinga mutulo.

²⁵ Kabiji baishile ko aji, ne kumubuusha amba, “Nkambo tupulushai twafwa!”

²⁶ Kumvwa aye amba, “Mwaubilaka moyo? Anweba ba kalwitabilo kacheche.” Ponkapo waimene, ne kukanya lubesha ne mema; ponkapotu paubile ne nzo!

²⁷ Ne abo bakuminye amba, “Awe ng'anyi musango wa muntu, aye nangwa lubesha ne mema byamukookela?”

Kubukwa kwa baana balume babiji banonkelwe ku bademona

²⁸ Kabiji byo afikile ku bushiya mu kyalo kya ba Ngadalene, kwamusambakene bantu babiji banonkelwe ku bademona, kasa bafuma ku bilende, bajinga na bukaji bukatampe, bwa kuuba kafwako nangwa umo wakonsheshe kwijipita aja jishinda ne.

²⁹ Ponkapo, babijikile amba, “Ikika kyo tusakuuba nenu, anweba Mwana Lesa? Mwaiya kuno na kwitumanyika kimye kasa kikyangye kufika nyi?”

³⁰ Kwajinga ne jitanga jikatampe ja bankumba kwalepa na ko bajinga kasa baja.

³¹ Kabiji bademona bamusashijile amba, “Umvwe mwitupangemo, mwitutume tukatwele mu jitanga ja bankumba.”

³² Ponkapo aye wibambijile amba, “Yainga,” Ne abo bafuminemo, ne kukatwela mu bankumba. Ponkapo kisaka kyonse kyavundumukile ne kukunkuluka mukolo lubilo ne kwitaya mu kizhiba, chu! Ne kufwa bafwile monka mu mema.

³³ Kabiji bajishishenga bankumba banyemene, ne kuya mu muzhi, bakabulang'ene byonse, ne akya kibamwekejile banonkelwe ku bademona.

³⁴ Kepo bena muzhi baimene na kumutundaila Yesu, ne pa kumumona bamusashijile amba, afumemo mu kyalo kyabo.