Mateo 6 - KNTP

Kupana bya bupe ku bakajilwa

¹ “Jimukai! Kechi mube byaoloka byenu ku meso a bantu amba betumone ne. Abyo kechi mu mwenemo mfweto kwi Shenu wa mwiulu ne.”

² “Kabiji byonkabyo pa kupana bya bupe, kechi wimbe ntolompita palutwe yobe byo boba ba kamfutumfutu mu mashinagoga ne mu mikwakwa, amba bantu betutote. Kine amiwa nemwambila namba batambwila jimo mfweto yabo.

³ Kabiji obewa pa kupana bya bupe, kuboko kobe kwa ku kipiko kechi kuyuke kyo kuuba kwa ku kilujo ne.

⁴ Namba bumpanyi bobe bwikale bwa kumbaji. Kabiji Shobe umona kumbaji ukakufweta.”

Mambo a kulomba

⁵ “Kabiji pa kulomba, kechi mupashang'ane naba kamfutumfutu ne. Mambo abo batemwa kwimana na kulomba mu mashinagoga ne ku mansanga a mikwakwa amba tumweke ku bantu, kine nemwambila namba, batambwila jimo mfweto yabo.

⁶ Kabiji obewa pa kulomba, utwele mu kazubo kobe ka mukachi, ne pa kushinka kibelo, ulombe kwi Shobe wa kumbaji, kabiji Shobe umona kumbaji ukakufweta.”

⁷ “Kabiji pa kulomba, kechi kulomba kilombelombe byo boba Bangentila ne. Mambo balanguluka amba, tusakumvwanyika pa kuvuzha byambo.

⁸ Kabiji byonkabyo kechi mupashang'ane naabo ne. Mambo Shenu wayukila jimo byo mwakajilwa, kasa mukyangye kumulomba.”

⁹ Byonkabyo kasa mulomba byonka bino amba, “Taata wetu wa mwiulu, jizhina jenu jizhile.

¹⁰ Bufumu bwenu bufike. Kyaswa muchima wenu kyubiwe pano panshi, byonka byo kyubiwa mwiulu.

¹¹ Mwitupeko kajo ketu ka leelo.

¹² Ne kwitulekelako mambo etu, byonka byo twibalekela betulenga mambo.

¹³ Kabiji kechi mwitutwale mu lweseko ne, mwitupokolole kwi yewa mubi.”

¹⁴ “Mambo umvwe mwibalekelako bantu mambo abo, ne Shenu wa mwiulu naye ukemulekelako ne mambo enu pamo.

¹⁵ Kabiji umvwe kechi mwibalekelako bantu mambo abo ne, ne Shenu wa mwiulu naye kechi ukemulekela mambo enu ne.”

Mambo a kuzhikilwa na nzala

¹⁶ “Kabiji pa kuzhikilwa na nzala, kechi mwikale na bilungi bya bulanda byonka byo boba ba kamfutumfutu ne. Mambo abo baalula bilungi byabo ke bingi amba, bantu bebamone amba bazhikilwa na nzala. Kine nemwambila namba, batambwila jimo mfweto yabo.

¹⁷ Pakuba obewa, pa kuzhikilwa na nzala, wishinge manyi ku mutwe wobe, ne kowa mu meso

¹⁸ amba, kechi kiyukanyikwe ku bantu amba, wazhikilwa na nzala ne, poso konka kwi Shobe wa kumbaji. Ne Shobe umona kumbaji, ukakufweta.”

Bunonshi mwiulu

¹⁹ Kechi mwitujile anweba bene nsabo pano panshi ne, paji bilongolo ne ndalabwa byonauna, paji ne bangivi basaba mazubo ne kwiba.

²⁰ Kabiji itujilai nsabo mwiulu, mwabula bilongolo ne ndalabwa byonauna, ne bangivi kechi basaba mazubo ne kwiba ne.

²¹ Mambo kuji nsabo yobe, ko kuji ne muchima wobe.

Kyeya kya mubiji

²² “Jiso ye lampi wa mubiji. Byonkabyo umvwe jiso jobe jijitu, ne mubiji wobe yense usakwikala mu kyeya;

²³ bino umvwe jiso jobe jabipa, ne mubiji wobe yense usakwikala mu mfishi. Byonkabyo umvwe kyeya kiji mobe yo mfishi, kine aya mfishi yo ine ikatampe!”

Lesa ne nsabo

²⁴ “Kafwako muntu wakonsha kwingijila bankambo babiji ne. Mambo ukashikwapo umo, ne kutemwapo mukwabo; nangwa ukepana ku umo, ne kusuula mukwabo. Kechi mwakonsha kwingijila Lesa ne nsabo ne.

²⁵ “Onkao mambo kyokyo nemwambila namba, kechi mubambishe muchima na mweo wenu na byomukaja, nangwa nabyo mukatoma; nangwa na bivwalo bya mibiji yenu ne. Nanchi mweo kechi wakila kajo nenyi? Ne mubiji kechi wakila bivwalo nenyi?

²⁶ Talai ku bang'onyi, kechi ba byala nangwa kunowa ne, nangwa kulonga mu matala ne; kabiji Shenu wa mwiulu wibajisha, nanchi anweba kechi mwakijishatu bang'onyi mu kuneema nenyi?

²⁷ Kabiji ng'anyi mukwenu pa kubambisha muchima wakonsha kunungako nangwa kacheche ku kimino kyanji?

²⁸ “Kabiji mambo ka mubambisha michima na bivwalo? Langulukai buluba bwa mungye byo bukoma, kechi bwingila mwingilo, nangwa kuluka kisapi ne.

²⁹ Pakuba nemwambila namba, nangwa Solomone mu lukumo lwanji lonse kechi wavwajilenga pamo ne abo ne.

³⁰ Nanchi umvwe Lesa wiivwika byonkabyo nsono ya mungye, ikalatu leelo, kesha yatayiwa mu mujilo, leelo nanchi kechi akakizhepo kwimuvwika anweba ba kalwitabilo kacheche nenyi?

³¹ “Byonkabyo kechi mubambishe michima yenu amba, Leelo tusakuja ka? Nangwa amba, Leelo tusakutoma ka? Nangwa amba, leelo tusakuvwala ka?

³² Mambo abye bintu byonse bebisaka Bangentila; pakuba Shenu wa mwiulu wayuka amba, bino bintu byonse bimufwainwa.

³³ Nanchi kebeshai bufumu bwanji, ne bololoke bwanji; ne bino bintu byonse bikemubikilwapo.

³⁴ Byonkabyo kechi mubambishe michima yenu na ja kesha ne; mambo ja kesha jine jikebambisha na byajo. Bibi bya leelo bijiwaina leelo.”