Mateo 5 - KNTP

Lusapwilo lwa Yesu pa Mutumba

¹ Yesu pa kwiamona mabumba, wakanjijile pa mutumba. Byo aikajile panshi baana banji babwanga baishile kwi aye,

² ponkapo aye watatwile kwamba ne kwibafunjisha amba.

Batokwa

³ “Ba michima yapelelwa bo batokwa; mambo bufumu bwa mwiulu bo bwabo!

⁴ Bajila majilo bo batokwa; mambo bakatekeneshiwa!

⁵ Bakimote bo batokwa; mambo bakaswana ntanda!

⁶ Baumvwa nzala ne kilaka kya kusakisha bololoke bo batokwa; mambo bakekuta!

⁷ Boba lusa bo batokwa; mambo bakobilwa lusa!

⁸ Ba michima yatoka bo batokwa; mambo bakamumona Lesa!

⁹ Bapwanya bantu bo batokwa; mambo bakatelwa amba; baana ba Lesa!

¹⁰ Bobapata na mambo a bololoke bo batokwa; mambo bufumu bwa mwiulu bo bwabo!

¹¹ “Mwatokwa anweba umvwe bantu bemwambila mwenga, ne kwimushikwa, ne kwimubepela mu misango yonse ya bubi na mambo a amiwa.

¹² Sekelai ne kusangalala, mambo mfweto yenu yo ikatampe mwiulu, mambo byo byo bebapachilenga ne bangauzhi ba batangijilepo kala.”

Mukele ne kyeya

¹³ “Anweba mwi mukele waba pano pantanda. Kabiji umvwe mukele wa aluka ke wasamuka, ukamubwezha byepi mu bu mukele bwanji? Kechi wafwainwa kintu ne, kana kumutayatu pangye ne kunyantaulapo bantu.

¹⁴ “Anweba mwi kyeya kya ba pano pantanda. Muzhi ye bashimikila pa mutumba kechi bakonsha kumufya ne.

¹⁵ Nangwa lampi, kechi bamwambula ne kumutuula munshi ya kilukwa ne, poso ponka pa kitulwapo lampi, kabiji usaamisha kyeya ku bonse ba munzubo.

¹⁶ Byonkabyo kyeya kyenu kimweke ku meso a bantu; bamone mingilo yenu yawama, ne kumutumbijika Shenu uji mwiulu.”

Lufunjisho pa mambo a mizhilo

¹⁷ “Kechi mulanguluke amba, naiya na kufumyapo bya mu buku wa mizhilo nangwa bya mu buku wa bangauzhi ne. Kechi naiya na kwibifumyapo ne, poso namba nebifikizhe.

¹⁸ Mambo kine amiwa nemwambila namba, poso jiulu ne ntanda bikapite, kafwako nangwa kajilembo kamo nangwa kakinshabu kamo ka mu mizhilo kakapita ne, poso byonse bikafike.

¹⁹ Byonkabyo awa ukazhilulula kamo ka tuno tumikambizho tucheche, ne kwibafunjisha bakwabo nabo kwikazhilulula bakamutela amba, ye mucheche mu bufumu bwa mwiulu. Kabiji awa uketulama ne kwibafunjisha bakwabo nabo kwitulama bakamutela amba, ye mukatampe mu bufumu bwa mwiulu.

²⁰ Mambo amiwa nemwambila namba, mukatwela mu bufumu bwa mwiulu inge kyakuuba bololoke bwenu bwakila bololoke bwa banembeshi ne Bafaliseo.

Mambo a bukaji

²¹ “Anweba mwaumvwine byo bebabujile bashakulu bakala amba, kechi wipayang'ana ne; kabiji wa kwipayang'ana ukaletwa mukije.

²² Pakuba amiwa nemwambila namba, awa wamubukila bukaji mulongo wanji, aye naye wafwa nao a kuletwa mukije, kabiji awa wa mwambila mulongo wanji amba, wakosama, aye naye wafwa nao a kuletwa mukije kikatampe, pakuba awa wa amba bya kufing'ana wafwa nao a kutayiwa mu Ngehena ya mujilo.

²³ Byonkabyo umvwe keulambule mulambu wobe ku kyakusokelapo bitapisho, ne kuvuluka amba, mulongo wami njinanji na mambo,

²⁴ sha mulambu wobe konka ku kyakusokelapo bitapisho, kabangijile jimo kupwana na mulongo wobe, bino ubwele ulambule mulambu wobe.

²⁵ “Pwana bukiji ne ye uji nanji na mambo, byo ukiji nanji mu jishinda ja ku kutwala ku kije; kuchiina amba, wa kukukenda mambo wakakufikizha ku mutonyi, ne mutonyi wakakufikizha ku muota, ne obewa wakatayiwa mu kaleya.

²⁶ Kine amiwa nemwambila namba, kechi ukafumamo ne, poso wafuta mali onsetu.

Mambo a bukende

²⁷ “Anweba mwaumvwine byo kyaambilwe amba, kuuba bukende ne.

²⁸ Pakuba amiwa nemwambila namba, awa utala mwanamukazhi na lunkumbwa, wauba nanji bukende monka mu muchima wanji.

²⁹ Kabiji umvwe jiso jobe ja ku kilujo jakulengesha kulenga mambo, wijilobolemo ne kwijitaya! Mambo kyakuwamina umvwe kimo kya mubiji wobe kyaonaika, bino mubiji wobe yense kutayiwa mu Ngehena ne.

³⁰ Kabiji umvwe kuboko kobe kwa ku kilujo kwa kulengesha kulenga mambo wikuchibeko ne kwikutaya! Mambo kyakuwamina umvwe kimo kya mubiji wobe kyaonaika, kukila mubiji wobe yense kuya mu Ngehena.

Mambo a kwikana

³¹ “Kabiji kyaambilwe amba, wa kumukana mukazhanji, amupe nkalata ya kwikana.

³² Pakuba amiwa nemwambila namba, awa ukana mukazhanji, pakubula mambo a bukende, wamulenga ke nkende, ne aye wamusongola awa ye bakana aye naye wauba bukende.

Mambo a kuchipa

³³ “Kabiji mwaumvwine byo bebambijile bashakulu baakala amba, kechi uchipa bubela ne, kabiji ukamubile Lesa monka mo wachipila.

³⁴ Pakuba amiwa nemwambila namba, kechi uchipatu nangwa pacheche ne, nangwa kuteela mwiulu ne, mambo jo jitanda ja Lesa;

³⁵ nangwa kuteela pano panshi ne, mambo po poatuula maulu anji, nangwa kuteela Yelusalema ne, mambo ye muzhi wa mfumu mukatampe.

³⁶ Nangwa kuchipa mutwe wobe ne, mambo kechi wakonsha kwalulula lusuki umo ke utoka nangwa ke ufiita ne.

³⁷ Nanchi kwamba kwenu kwikaletu amba, ‘Ee, Ee;’ nangwa, ‘Ine, Ine,’ mambo kyakila kwamba pa bibye, kifuma ku bubi.

Mambo a kushinkanya

³⁸ “Mwaumvwine byo kyaambilwe amba, jiso jifwile pa jiso jikwabo, ne jiino najo mo monka.

³⁹ Pakuba amiwa nemwambila namba, kechi umukosele mubi ne. Kabiji awa wakupuma ku jibuta ja ku kilujo, mwalwile ne ja ku kipiko.

⁴⁰ Kabiji awa usaka kukuleeta mukije, ne kukwangata mukangyo wobe, muleke atambule ne munkukumba pamo.

⁴¹ Kabiji awa wa kukanjikizha kwenda nanji musinso umo, enda nanji misinso ibiji.

⁴² Kabiji wa kukulomba, mupeepo, ne aye wasaka kukongola kwi obewa kechi umushibuluke ne.

Kutemwa balwanyi

⁴³ “Mwaumvwine byo kyaambilwe amba ukamutemwa mukwenu, ne mulwanyi wobe ukamushikwa.

⁴⁴ Pakuba amiwa nemwambila namba, kasa mwibatemwa balwanyi benu ne kwibalombelela bemushikwa,

⁴⁵ namba mwikale baana Bashenu wa mwiulu. Mambo aye useelesha juba janji pa babi ne ku bawama pamo, ne kunokesha mvula pa baoloka ne pa babula koloka pamo.

⁴⁶ Kabiji umvwe mwibatemwatu bonka bemutemwa, mumwenamo ng'anyi mfweto? Basonkeshi nabo kechi boba byonkabyo nenyi?

⁴⁷ Kabiji umvwe mwibemuna balongo benu bonka, po mwakijila bakwabo po pepi? Bangentila nabo kechi boba byonkabyo nenyi?

⁴⁸ Byonkabyo mwikale balumbuluka, byonka byo alumbuluka Shenu wa mwiulu.”