Mateo 4 - KNTP

Kwesekwa kwa Yesu

¹ Ponkapo Mupashi wamutwajile Yesu mungye amba bamweseke kwi Diabola.

² Kabiji pa kuzhikilwa na nzala moba makumi ana mute ne bufuku, kepo aumvwine nzala.

³ Ne Diabola pa kwiya wamwambijile amba, “Umvwe mwi Mwana Lesa, ambilai ano mabwe aluke ke bashinkwa.”

⁴ Kumvwa Yesu amba, “Kyanembwa amba, muntu kechi ukamwena bumi ku shinkwa yenka ne, poso ku byambo byonse bifuma mu kanwa ka Lesa.”

⁵ Ponkapo Diabola wamutwajile Yesu ku muzhi wazhila, kabiji wamubiikile peulu ya jikonka ja nzubo ya Lesa,

⁶ ne kumwambila amba, “Umvwe wi Mwana Lesa, witaye obewa mwine panshi, mambo kyanembwa amba, “Ukakambizha bamalaika banji, na mambo a obewa amba bakakusenda mu maboko abo, kuchiina amba waketuntula kuulu kobe ku jibwe.”

⁷ Kumvwa Yesu wamwambijile amba, “Kabiji kyanembwa amba, kechi umweseke Nkambo Lesa wobe ne.”

⁸ Ponkapotu Diabola wamutwajile ku mutumba walepesha bingi, ne kumumwesha bufumu bonse bwa pano pantanda, ne lukumo lwabo.

⁹ Ne kumwambila amba, “Bino byonse nsakwimupa, umvwe mundambile ne kumpopwela.”

¹⁰ Kumvwa Yesu wamwambijile amba, “Fumako, Satana! Mambo kyanembwa amba,” “Ukamupopwela Nkambo Lesa wobe ne kumwingijila aye yenka.”

¹¹ Ponkapo Diabola wamulekele; kabiji bamalaika baishile ke bamwingijile.

Yesu byo atatwile mwingilo wanji mu Ngalilea

¹² Kabiji Yesu pakumvwa amba, Yoano uji mu kaleya, Yesu wafumineko ne kuya ku Ngalilea.

¹³ Ne pa kufuma mu Nazala, waishile na kwikala mu Kapenama uji ku kizhiba, mu kyalo kya Zebuluna ne Nafitali.

¹⁴ Mukufikizha akya kya ambile ngauzhi Isaya amba,

¹⁵ “Kyalo kya Zebuluna ne kya Nafitali, mukwakwa wa ku kalunga ka mema, bushiya bwa Yodano, Ngalilea wa bantu ba mitundu yapusanapusana!

¹⁶ Bantu bekala mu mfishi bakamona kyeya kikatampe. Kabiji kwi aba baikala mu kyalo ne mu kimvule kya lufu, kyeya kikebasamina.”

¹⁷ Kufuma pa kyokya kimye Yesu watatwile kusapwila amba, “Lapilai, mambo bufumu bwa mwiulu bwafwenya ke pepi!”

Yesu byo ebechile baana banji babwanga batanshi

¹⁸ Kabiji Yesu byo a sezhezhenga kizhiba kya Ngalilea, wamwene baana bankazhi babiji, Shimona yebateela amba Petelo, ne Andeleo mulongo wanji, kasa bata bukonde mu mema, mambo baingilanga mwingilo wa kukwata masabi.

¹⁹ Ne aye wibambijile amba, “Ndondelai, kabiji nkemwalula ke bamwingilo wa kukwata bantu.”

²⁰ Kabiji ponkapotu bashiile makonde abo ke bamulondele.

²¹ Byo a endeleko pacheche wamwene baana bankazhi bakwabo babiji, Yakoba mwana Zebede, ne Yoano mulongo wanji, bajinga pamo mu bwato ne shabo Zebede, na kununga makonde abo. Kabiji ne abo wibechile,

²² ponkapotu ne abo nabo bashiile bwato ne shabo, ke bamulondele.

Yesu byo a ingijile mu Ngalilea

²³ Kabiji Yesu wapitang'enenga monse mu Ngalilea, na kufunjisha mu mashinagoga abo, kasa asapwila Mambo Awama a bufumu, ne kubuka misango yonse ya bikola ne ya bulema mu bantu.

²⁴ Kabiji ne nkuwa yanji yakumbene monse mu Silya, kabiji bamuletejile bonse bakolwa, bajinga na bikola ne misongo ya misango ne misango, ne banonkelwe ku bademona, ne ba kishimu ne ba kalepu, ne abo nabo wibabukile.

²⁵ Kabiji kwa mulondejilenga mabumba akatampe afumine mu Ngalilea ne mu Ndekapolisa, ne mu Yelusalema, ne mu Yudea, ne ku musela wa Yodano.