Mateo 3 - KNTP

Lusapwilo lwa kwa Yoano Mubatishi

¹ Kabiji mu oa moba kwaishile Yoano Mubatishi, kasa asapwila mungye mu ntanda ya Yudea amba,

² “Lapilai mambo bufumu bwa mwiulu bwafwenya ke pepi!”

³ Yoano i ye ye a ambile Isaya ngauzhi amba, “Jiwi ja umo ubijika mungye amba, nengezhezhai jimo jishinda ja Nkambo, ololai mashinda anji.”

⁴ Kabiji aye Yoano wavwajilenga kivwalo kyalengwa na boya bwa ngamela, ne mukwandala wa kiseba mukifuka kyanji, ne kajo kanji kajinga nzhiye ne buki bwa mungye.

⁵ Ponkapo bamupwijilenga bamu Yelusalema, ne bamu Yudea bonse, ne bonse bamu musezho wa Yodano.

⁶ Kabiji ba batizhilwe kwi aye mu mukola wa Yodano, kasa besolola mambo abo.

⁷ Kabiji pa kwibamona Bafaliseo bavula ne Basadusea ke beye ku lubatizhilo lwanji, wibambijile amba, “Anweba kisaka kya milolo! Ing'anyi wimujimuna amba munyeme bukaji bubena kwiya?

⁸ Byonkabyo pangai bipangwa byafwainwa lulapilo.

⁹ Kechi mulanguluke mu michima yenu amba, muji na shenu Abulahama ne. Pakuba amiwa nemwambila namba, Lesa wakonsha kwalula ano mabwe ke baana ba Abulahama!

¹⁰ Kabiji kapasa bekakungika kala ku mizhazhi ya bichi. Onkao mambo bichi byonse bibula kupanga bipangwa byawama, bebitema ne kwibitaya mu mujilo.

¹¹ Amiwa nemubatizha mu mema, lubatizhilo lwa lulapilo, pakuba ao undondela panyuma yami wankila bulume, amiwa kechi nafwainwa nangwatu kumusendela makwabilo anji ne. Aye ukemubatizha na Mupashi Wazhila ne na mujilo.

¹² Aye uji na kya kululwilako mu kuboko kwanji, kabiji ukatokesha bulongo pa kipujilo kyanji, ne kubungizha kajo mu butala bwanji, pakuba makunzhi ukeasoka na mujilo ubula kuzhima.”

Kubatizwa kwa Yesu

¹³ Pa kyokya kimye Yesu wafumine mu Ngalilea, waishile kwi Yoano ku mukola wa Yodano na kubatizhiwa kwi aye.

¹⁴ Pakuba Yoano wamukainye amba, “Amiwa yami nafwainwa kubatizhiwa kwi anweba, bino kabiji anweba mwaiya byepi kwi amiwa?”

¹⁵ Bino Yesu wamukumbwile amba, “Byonkabyo pano swai, pakuba momo kitufwainwa tufikizhe bololoke bonse.” Ponkapo Yoano waswile.

¹⁶ Ne Yesu byo abatizhilwe, ponkapotu watuntukile mu mema, kabiji talai, mwiulu mwashinkukile ne aye wamwene ne Mupashi wa Lesa kasa ekila pamo nobe nkunda, ne kumwikijila.

¹⁷ Kepo jiwi jafumine mwiulu amba, “Uno ye mwanami ye natemwa, mo namwena lusekelo.”