Mateo 28 - KNTP

Lusanguko

¹ Kabiji juba ja Sabado pakupita ke buye na kukya mu juba jitanshi ja mulungu, baishile ba Maliya wa ku Magadala ne Maliya mukwabo na kumona kilende.

² Kabiji ponkapo kwajinga kitentanshi kikatampe, mambo malaika wa Nkambo waikijile mwiulu kwiya na kwalumunako jibwe, waikajile ne ponka pa jibwe.

³ Wamwekelenga nobe kubeesha kwa mvula, kabiji kivwalo kyanji kyatokele pamo nobe sino.

⁴ Kabiji na mambo a kumuchiina bakalama bazakaminenga, ne kwaluka ba alukile pamo nobe bafwa.

⁵ Ne malaika wibambijile banabakazhi amba, “Kechi mube moyo ne mambo nayuka namba mubena kumukeba Yesu, ye bapopele pa musalabu.

⁶ Kechi uji muno ne. Wasanguka, monka mo a ambijile. Iyai mumone poalaajile Nkambo.

⁷ Kabiji yainga lubilo, mukebabule baana banji babwanga amba wasanguka mu bafu, kabiji umvwai, watangilako ku Ngalilea. Akwa ko mukamumona, umvwai byo nemubuula.”

⁸ Kabiji bafumineko bukiji ku kilende, bino bajinga na moyo ne lusekelo lukatampe pamo, bayile lubilo na kwibabuula baana banji babwanga.

⁹ Kabiji ponkapo, Yesu wibasambakene amba, “Mutende!” Kabiji baishile na kumukwata ku maulu, ne kumupopwela bamupopwejile.

¹⁰ Kepo Yesu ebambijile amba, “Kechi mube moyo ne, yainga kebabuulai balongo bami bayenga ku Ngalilea, ko ko bakantaana.”

¹¹ Byo bakiilenga, ponkapo bamo bakalama baishile mu muzhi, ne kwibabula bang'anga bakatampe bintu byonse byamwekele.

¹² Kabiji byo bapwijile pamo na bakulumpe bachibile kije, ne kwibapa bakalama mali avula,

¹³ amba “Mukambe amba, baana banji babwanga baji kwiya bufuku, ne kumwiba kasa twalaala.

¹⁴ Kabiji umvwe jikafike mu matwi a ndamakyalo, tukamukanjikizha ne kwimulamwina.”

¹⁵ Kepo batambwile mali, baubile monka mo bebambijile. Ne ano mambo akumbene monse mu Bayudea ne buji leelo.

Yesu byo amwekele ku batumwa banji

¹⁶ Pakuba baana banji babwanga jikumi na umo bayile ku Ngalilea, konka ku mutumba ye ebalayile Yesu.

¹⁷ Kabiji pa kumumona, bamupopwejilenga, pakuba bamo bazhinaukilenga.

¹⁸ Kabiji Yesu waishile ko baji ne kwibambila amba, “Luusa lonse napewalo, lwa mwiulu ne lwa pano panshi.

¹⁹ Onkao mambo yainga na kulenga baana babwanga muba mikoka yonse ya bantu, muke babatizhenga mu jizhina ja Taata ne ja Mwana ne ja Mupashi Wazhila,

²⁰ ne kwibafunjisha balamenga byonse byo nemukambizhizhe. Kabiji talai, amiwa nji nenu moba onse, kufika ne ku juba jikapelaako.”