Mateo 27 - KNTP

Yesu byo bamutwajile kwi Pilato

¹ Kabiji pa kukya lukeelo, bang'anga bakatampe bonse ne bakulumpe ba bantu bamuchibijile kije Yesu amba bamwipaye.

² Kepo bamukashile kabiji bamutwajile ne kumupana kwi Pilato, ndamakyalo.

Lufu lwa Yudasa

³ Ponkapo Yudasa awa wamusolwele, pakuyuka amba wazhatwa walapijile, wibabwezhejile bang'anga bakatampe ne bakulumpe aa mali makumi asatu.

⁴ Amba, “Nalenga mambo byo napana ku lufu muntu wabula mambo.” Kumvwa abo amba, “Na ka mambo obe.”

⁵ Ne aye watayile mali mu nzubo yazhila ya Lesa kabiji wafuminemo wakekujikile mwine.

⁶ Kabiji bang'anga bakatampe bashikwile mali amba, “Kizhila kwiataya mu kilambwilo, mambo oa lupoto lwa mashi.”

⁷ Kabiji pakumvwang'ana bapotele bujimi bwa mbumbi wa mapuki amba bazhiikengamo benyi.

⁸ Onkao mambo ne leelo abwa bujimi bebutongola amba, “Bujimi bwa mashi.”

⁹ Ponkapo kyafikile akya kya ambile Yelemiya ngauzhi amba, “Kabiji bashikwile mali makumi asatu, lupoto lwa yewa ye banengezhejile lupoto bamo bena Isalela,

¹⁰ kabiji bapotele bujimi bwa mbumbi wa mapuki, monka mo ankambizhizhe Nkambo.”

Yesu ku meso a Pilato

¹¹ Kabiji Yesu waimene ku meso a ndamakyalo; kepo ndamakyalo amwipwizhe amba, “Obewa wi mfumu wa Bayudea nyi?” Kumvwa Yesu amba, “Mwafikilapotu.”

¹² Kabiji byo bamushinawijile ku bang'anga bakatampe ne bakulumpe, wazhindaminepotu.

¹³ Ponkapo Pilato wamwambijile amba, “Kechi waumvwa byavula byo babena kukushinawina nenyi?”

¹⁴ Kabiji aye ne kukumbulapo nangwa ka kyambo kamotu ne. Onkao mambo ndamakyalo wakuminye bingi.

¹⁵ Kabiji mu moba a kijiilo aye ndamakyalo wakelelwenga kwijikasulwila jibumba kaili umo, ye basakile abo bene.

¹⁶ Kabiji bajinga na kaili wayukanyikilwe ku bonse, jizhina janji Balabasa.

¹⁷ Kepo byo bapwijile pamo bonse, Pilato wibepwizhe amba, “Mwasaka nemukasulwile ng'anyi? Balabasa nyi, inyi Yesu yebateela amba, Kilishitu?”

¹⁸ Pakuba aye wayukile amba, bamufikizha kuno na mambo a kichima.

¹⁹ Kabiji byo aikajile pa kipona kya kije, mukazhanji watumine jiwi kwi aye amba, “Mumuleketu ao muntu waoloka, mambo leelo namulabukila byatama byavula.”

²⁰ Kabiji bang'anga bakatampe ne bakulumpe beakanjikiizhe mabumba amba, “Tulombelai Balabasa, Yesu tumonaune.”

²¹ Kabiji ndamakyalo wibepwizhe amba, “Ng'anyi wa pabano babiji ye musaka nemukasulwile?” Kumvwa abo amba, “Balabasa!”

²² Pilato wibambijile amba, “Nanchi ikika kyo nsakumuuba Yesu, yebateela amba, Kilishitu?” Kumvwa bonse amba, “Bamupope pa musalabu.”

²³ Kumvwa aye amba, “Nanchi, leelo kyabipa kyo auba ikika?” Kepo babijikishe bingi kyakila amba, “Bamupope pa musalabu!”

²⁴ Kabiji Pilato pa kumona amba kechi wamona mwa kwibakayinya ne, kabiji kiwowo kikatampe ke kibuuke, watambwile mema ka owe ku maboko ku meso a jibumba amba, “Nefungako mu ano mashi a yiwe muntu waoloka! Mambo enu anweba bene!”

²⁵ Kabiji bantu bonse baitabile amba, “Mashi anji etushinkamane atweba ne baana betu.”

²⁶ Ponkapo wibakasulwijile Balabasa, pakuba Yesu wamututawile, ne kumupana amba, bamupope pa musalabu.

Yesu byo bamwendelekele ku bashilikale

²⁷ Ponkapo bashilikale bakwa ndamakyalo, bamutwajile Yesu mu kipango kya ndamakyalo, ne kwita bonse bamu kiombe kyabo.

²⁸ Kabiji bamuvujile bivwalo byanji, ne kumuvwika kivwalo kyachijisha.

²⁹ Kabiji balukile munchinya wa miba ne kumuvwika ku mutwe wanji, ne jitete mu kuboko kwanji kwa kilujo, kabiji bamufukamijilenga panshi, ne kumwendeleka amba, “Mutende, Mfumu wa Bayudea!”

³⁰ Kabiji bamushipijile mate, ne kumwangata jitete ne kumupumajo mu mutwe.

³¹ Ne pa kupwisha kumwendeleka, bamuvujile kivwalo, ne kumuvwika bivwalo byanji mwine, ke bamutwale na kumupopa pa musalabu.

Yesu byo bamupopele pa musalabu

³² Kabiji byo balupukile, bamwene muntu mwina Kilene, jizhina janji Shimona, ye bakanjikizhe amba, “Tuye ne obewa usende musalabu wanji,”

³³ Kabiji pakufika kuntu kobateela amba Ngolongota, ko kuuba amba, “Kuntu kwa kiboyongolo.”

³⁴ Bamupele binyu byavwangakana na ndulu amba, atome kabiji pa kutompapo, kechi waswile kutoma ne.

³⁵ Kabiji bamupopele pa musalabu, kasa bataaya bubale bwa kwiabenya bivwalo byanji.

³⁶ Kabiji baikajile konka na kumutala.

³⁷ Kabiji babikile peulu ya mutwe wanji kishinawino kyanji kyanembelwe amba, “UNO YE YESU MFUMU WA BAYUDEA.”

³⁸ Kepo bapopeleko pa misalabu pamo nanji batupondo babiji bapukula bintu, umo ku kilujo, mukwabo ku kipiko.

³⁹ Kabiji abo bapichilenga konka bamubilenga mwenga kasa benauna ku mitwe yabo ne kwamba amba,

⁴⁰ “Obewa onauna nzubo yazhila ya Lesa, ne kwiishimikulula mu moba asatu! Ipulushe obewa mwine umvwe wi Mwana Lesa, ikila ku musalabu!”

⁴¹ Byonkabyo ne bang'anga bakatampe nabo bamwendelekelenga pamo ne banembeshi ne bakulumpe amba,

⁴² “Wibapulwishenga bakwabo; bino mwine kechi wakonsha kwipulusha ne. Ye Mfumu wa Isalela; pano ekile pa musalabu bino tumwitabile!

⁴³ Wamuketekejile Lesa pano amupokolole umvwe wamuswa, mambo wa ambilenga amba, ‘Ne Mwana Lesa!’”

⁴⁴ Ne batupondo bapopelwe nanji, nabo bamwendelekelenga.

Lufu lwa Yesu

⁴⁵ Kabiji kufuma pa kushinkimana juba kwaishile mfishi yakumbene ponse pano pantanda, kufika ne pa kulemba juba.

⁴⁶ Kabiji pa kulemba juba, Yesu wabijikile na jiwi jikatampe amba, “Eli, Eli, lema sabakatani?” Ko kuuba amba, “Lesa wami, Lesa wami, wandekela ka?”

⁴⁷ Bamo baimene konka byo baumvwine ba ambile amba, “Uno ubena kwita Elaija!”

⁴⁸ Ponkapotu umo wa mwi abo wayile lubilo, wakashikwile shipanja, ne kumuyuzha na binyu byasasa, ne kumusomeka ku jitete ne kumupa amba afyompeko.

⁴⁹ Kabiji bakwabo ba ambile amba, “Kilekai tumone kana Elaija usakwiya na kumupulusha.”

⁵⁰ Kabiji Yesu wabijikile jibiji na jiwi jikatampe ne kuleka walekele mweo wanji.

⁵¹ Kabiji ponkapo kipembe kya mu nzubo yazhila ya Lesa kyatabukile ke bibiji, kufuma peulu ne kufika panshi. Ne mushiji watenkene ne mabwe nao alalaikile,

⁵² ne bilende nabyo bya lajikile; kabiji mibiji yavula ya bazhijikwa bafwiile kala, nayo yasangwilwe.

⁵³ Ke balupuke mu bilende byo asangukile Yesu, batwelele mu muzhi wazhila ne kumweka ku bantu bavula.

⁵⁴ Kabiji mukulumpe wa bashilikale, ne abo bo ajinga naabo na kumutala Yesu, pa kwikimona kitentanshi, ne bintu byaubilwe, ke moyo mukatampe amba, “Kine uno wajinga Mwana Lesa!”

⁵⁵ Kabiji kwajinga banabakazhi bavula kasa baimana kwalepa na kumutala, bonkaba bamulondejilenga Yesu kufuma ku Ngalilea na kumwingijila.

⁵⁶ Mwi abo mwajinga Maliya wa ku Magadala, ne Maliya inanja Yakoba ne Yosefwa ne ina baana ba Zebede.

Kubikwa kwa Yesu mu kilende

⁵⁷ Kabiji juba pakufika mabanga, kwaishile munonshi mwina Alimatea, jizhina janji Yosefwa, ne aye wajinga mwana wabwanga wa Yesu.

⁵⁸ Aye wakamulombele Pilato mubiji wa Yesu. Pilato kepo akambiizhe amba bamupe.

⁵⁹ Kabiji Yosefwa wasendele mubiji wa Yesu, wamupombele mu kisapi kyatoka kya linenyi,

⁶⁰ ne kumubika monka mu kilende kyanji mwine kya katataaka, kyoasongele mu jibwe. Ne aye wa alumwijileko jibwe jikatampe ku kibelo kya kilende kabiji wafumineko.

⁶¹ Kwajinga Maliya wa ku Magadala ne Maliya mukwabo, baikajile kasa batalang'ana na kilende.

⁶² Kabiji juba jalondejilepo, jo juba jalondakana na ja kunengezhezha jimo bya kijiilo, bang'anga bakatampe ne Bafaliseo bapwijile kwi Pilato amba,

⁶³ “Mwane nkambo twavuluka byo a ambile awa mujimbijimbi byo akijinga mumi amba, pakupitapo moba asatu ukasanguka.

⁶⁴ Onkao mambo mukambizhe amba kilende bekilame bulongo poso jikafike juba ja busatu, kuchiina amba baana banji babwanga bakamwangatamo, ne kwibabuula bantu amba wasanguka mu bafu. Byonkabyo bujimbijimbi bwapelaako bukakila butanshi.”

⁶⁵ Pilato wibambijile amba, “Bakalama muji naabo yainga, ne kwikilamisha byonka byo mwayuka kuuba.”

⁶⁶ Kabiji ke baye ne kuya, bekilamine kilende, ne kubikako kateetesho ku jibwe, bakalama kasa baji konka.