Mateo 26 - KNTP

Kulangulukila jimo mwa kumwipayila Yesu

¹ Kabiji ponkapo Yesu byo apwishishe kufunjisha bino byambo byonse, wa ambijile baana banji babwanga amba,

² “Anweba mwayuka amba pakupita moba abiji ke Kijiilo kya Lupitailo, ne Mwana Muntu bakamusolola amba bakamupope pa musalabu.”

³ Ponkapo bang'anga bakatampe ne bakulumpe ba bantu bepwizhizhe pamo mu kipango kya ng'anga mukatampe, jizhina janji Kaifasa,

⁴ bamwikajiile kije Yesu, amba bamone mwa kumukwachila ne kumwipaya.

⁵ Kabiji ba ambile amba, “Kechi mu moba a kijiilo ne, kuchiina amba bantu baka lengelapo kiwowo.”

Yesu byo bamwitulwijile manyi ku Betani

⁶ Kabiji Yesu byo ajinga mu Betani, mu nzubo ya Shimona wa mbumba,

⁷ kwaishile mwanamukazhi mo ajinga wasendele ne musashi wa alabasita wa manyi a lupoto lukatampe, wietulwijile ku mutwe wa Yesu kasa aikala na kuja.

⁸ Pakuba baana babwanga pa kwikimona kibafichile ku michima ne kwamba amba, “Lelo abwe bono nabo bwabyepi?

⁹ Mambo ano manyi inge akapoteshiwe mali avula, ne kwiapana ku balanda.”

¹⁰ Yesu byo ekiyukile wibambijile amba, “Mwamukatezha kika mwanamukazhi? Mambo aye wangubila mwingilo wawaama.

¹¹ Ke pakuba balanda mukekala naabo moba onse, pakuba amiwa kechi nkekala nenu moba onse ne.

¹² Byo angitulwila ano manyi pa mubiji wami, wikyuba na mambo a kunengezhezha jimo kwa kuzhiikwa kwami.

¹³ Kine nemwambila namba konse konse ko bakasapwila ano Mambo Awama pano pantanda ponse, ne kino kyo auba uno mwanamukazhi nakyo kikambiwanga ke kya kumuvulukilako.”

Yudasa byo aswile kumusolola Yesu

¹⁴ Ponkapo umo wa mu ba jikumi na babiji jizhina janji Yudasa Isakaliota, wayile ku bang'anga bakatampe ne kwibepuzha amba,

¹⁵ “Musakukampa ka, umvwe nemusolwelaye?” Ne abo bamutongwejile mali makumi asatu.

¹⁶ Kufuma ku jonkaja juba wasakilenga mwa kumusolwela.

Kijiilo kyapeleleeko

¹⁷ Kabiji pa juba jitanshi ja kijiilo kya bashinkwa ba kubula mbizho, baana banji babwanga baishile kwi Yesu amba, “Kwepi ko mwasaka tukanengezhezhe jimo po musa kujiila kijiilo kya Lupitailo?”

¹⁸ Kumvwa aye amba, “Yainga mu muzhi ku muntu umo, mumwambile amba Mufunjishi wa amba amba, ‘Mwaka wami wafikila kala; monka mu nzubo yenu mo nsakujiila Kijiilo kya Lupitailo na baana bami babwanga?’”

¹⁹ Ne baana babwanga baubile monka mo ebabujiile Yesu, kabiji banengezhezhe jimo kijiilo kya Lupitailo.

²⁰ Ponkapo byo kyafikile ke mabanga waikajile na kuja na baana babwanga jikumi na babiji.

²¹ Kabiji byo bajiilenga, wibambijile amba, “Kine nemwambila namba, paji umo wa mwi anweba ukansolola.”

²² Ne abo baubile bingi bulanda, bonse ke bamwipuzhe umo, umo amba, “Lelo amiwanyi, Nkambo?”

²³ Kumvwa aye amba, “Yenka ye twataanta nanji pamo mu nsanyi, ye ukansolola.

²⁴ Mwana Muntu uya monka mo kyamunembelwa. Bino malwa kwiyewa umusolola Mwana Muntu! Kyamuwamina awa muntu inge kechi wasemekelwe ne.”

²⁵ Ponkapo Yudasa, yenka aye wamusolwele, wamwambijile amba, “Lelo amiwanyi, Laabi?” Kumvwa aye amba, “Wafikilapotu.”

²⁶ Byo bajiilenga, Yesu washikwile shinkwa, ne pa kumupesha watebawile ne kupana ku baana babwanga amba, “Tambulai jai, uno ye mubiji wami.”

²⁷ Kabiji washikwile katomeno nako, ne pa kusanta, wibapele amba, “Shilang'anai anweba bonse,

²⁸ mambo ano o mashi ami a lulayang'ano, aichikila bavula mu kwibalekela mambo.

²⁹ Kabiji amiwa nemwambila namba, kechi nkatomapo jibiji bino bipangwa bya mung'anzang'anza ne, poso mu jonkaja juba jo nkatoma angi apya ne anweba monka mu bufumu bwa Bataata.”

³⁰ Kabiji byo baimbile lwimbo, balupukile ke baye ku Mutumba wa olivi.

Yesu byo a ambile na mambo a kumukana kwi Petelo

³¹ Ponkapo Yesu wibambijile amba, “Bufuku bwa leelo anweba bonse musakwituntula pe amiwa, mambo kyanembwa amba, ‘Nkepaya kafunga, ne kisaka kya mikooko kikapalang'ena mungye.’

³² Nangwa byonkabyo pa kusangulwa amiwa, nkatangilako ku Ngalilea.”

³³ Kabiji Petelo wamwambijile amba, “Bonse nangwa basakwituntula pe anweba, amiwa kechi nketuntula nangwa pacheche ne.”

³⁴ Yesu wamwambijile amba, “Kine nemwambila namba, bonka buno bufuku shikombwe kasa akyangye kukookola, musakunkana jisatu.”

³⁵ Kumvwa Petelo amba, “Amiwa nangwa mfwe nenu, kechi nsakwimukana ne!” Ne bonse baana babwanga ba ambile byonkabyo.

Yesu byo alombele mu Ngesemani

³⁶ Kabiji Yesu waishile naabo kuntu kutelwa amba Ngesemani, kepo ebambijile baana banji babwanga amba, “Ikalai pano, byo nakiya na kulomba.”

³⁷ Kabiji wasendelepo ba Petelo ne baana ba Zebede bonse babiji, watatwile kupopomenwa ne kunemenwa mu muchima wanji.

³⁸ Ponkapo wibambijile amba, “Muchima wami waubisha bulanda usaka ne kufwa, ikalai pano, mulabenga pamo ne amiwa.”

³⁹ Kabiji waendeleko pacheche, wakuvumene panshi na kulomba amba, “Taata, umvwe kyakonsheka kubiwa, kano katomeno kampitaile! Byonkabyo kechi kyasaka muchima wami ne, poso kyasaka muchima wenu.”

⁴⁰ Kabiji wabwelele ku baana babwanga, wibataine kasa balaala, wamwambijile Petelo amba, “Nanchi, kechi wakonsha kulaba pamo ne amiwa nangwa awala umo nenyi?

⁴¹ Labainga ne kulomba, kuchiina amba mwakatwela mu lweseko. Kine muchima waswa, pakuba mubiji wanekena.”

⁴² Wayile na kulomba jibiji amba, “Taata, umvwe kano katomeno kechi kakonsha kumpitaila ne, poso nekatome, kyaswa muchima wenu kyubiwe.”

⁴³ Kabiji wabweleleko jibiji wibataine kasa balaala, mambo meso abo anemene natulo.

⁴⁴ Kabiji wibashiile jibiji kabwele na kulomba jabusatu, kapituluke mu byambo bimotu.

⁴⁵ Ponkapo waishile ku baana banji babwanga, ne kwibambila amba, “Mwakilaala na kukokoloka nyi? Talai! Kimye kyafika kala, Mwana Muntu ubena kusololwa mu maboko a bandengamambo.

⁴⁶ Imanai, tuyenga talai! Wa kunsolola kaji pepi!”

Kukwatwa kwa Yesu

⁴⁷ Byo akyambilenga, talai, Yudasa umo wa mu ba jikumi na babiji, waishile na jibumba jikatampe, jasenda mapoko ne tukonkolo, jafumine ku bang'anga bakatampe ne bakulumpe ba bantu.

⁴⁸ Kabiji awa wamusolwele wibabujiile jimo kayukilo amba, “Yenkawa ye nkafyompa i ye, mumukwate!”

⁴⁹ Ponkapotu byo afikile kwi Yesu ne kumwambila amba, “Mutende Laabi!” Kabiji wamufyompele.

⁵⁰ Kabiji Yesu wamwambijile amba, “Obewa mukwetu, uba kyo waishila.” Ponkapo baishile, bamupimpukijile Yesu ne kumukwata.

⁵¹ Kabiji ponkapo, umo wa aba bajinga ne Yesu wasomwene mpoko yanji, watanyikile kuboko kwanji, wamukampile muzha wa ng'anga mukatampe ne kumukopola kutwi.

⁵² Ponkapo Yesu wamwambijile amba, “Somekai mpoko yenu, mambo bonse basenda mapoko bakafwa ku mpoko.

⁵³ Nanchi mwalanguluka amba, nabula kukonsha kusashijila Bataata, ponka pano bantumina mazhita a bamalaika akila jikumi na abiji nyi?

⁵⁴ Kabiji kana byonkabyo binembelo bikafika byepi, amba bino byafwainwa kumweka?”

⁵⁵ Ponkapo Yesu wiambijile mabumba amba, “Anweba mwaiya na mapoko ne na tukonkolo na kunkwata nobe ne kapondo nyi? Moba onse naikalanga nenu mu nzubo ya Lesa na kwi mufunjisha, anweba ne kunkwata ne.

⁵⁶ Kabiji bino byonse byamweka amba, binembelo bya bangauzhi bifike.” Ponkapo baana babwanga bonse bamushiile ne kunyema.

Yesu byo aimene mukije

⁵⁷ Ponkapo abo bamukwachile Yesu bamutwajile kwi Kaifasa, ng'anga mukatampe, ko bapwijile banembeshi ne bakulumpe ba bantu.

⁵⁸ Kabiji Petelo wamulondejilenga katwezhimina ne ku kipango kya ng'anga mukatampe, watwelele monka, waikele na bakalama amba, mmone mo bisa kupwila.

⁵⁹ Kabiji bang'anga bakatampe ne ba mukije bonse ke baye na kukeba bya bubela bya kumushiina Yesu amba bamwipaye;

⁶⁰ kabiji kechi bebimwene ne, nangwa batumonyi ba bubela bavula baishile. Kabiji panyuma kwaishile babiji amba,

⁶¹ “Awe wa ambile amba, nakonsha kukundula nzubo yazhila ya Lesa, ne kwiishimukulula mu moba asatu.”

⁶² Ponkapo ng'anga mukatampe waimene, ne kumwambila amba, “Lelo obewa ne kukumbulapo pa bino bintu byo bakushiina nenyi?”

⁶³ Kabiji Yesu wazhindaminepotu. Ne aye ng'anga mukatampe wamwambijile amba, “Nakuchipisha kwi Lesa mumi, tubuule kana yobe Kilishitu Mwana Lesa?”

⁶⁴ Kumvwa Yesu amba, “Wafikilapotu. Nanchi nemwambila namba, palutwe mukamona Mwana Muntu kasa aikala ku kilujo kya Bulume, kasa eya mu makumbi a mwiulu.”

⁶⁵ Ponkapo ng'anga mukatampe watabwile bivwalo byanji amba, “Wamuuba Lesa mwenga! Ikika kyo tusakila batumonyi? Talai, pano mwaumvwa mwenga wanji!

⁶⁶ Mwalanguluka byepi?” Kumvwa abo amba, “Wafwainwa kufwa.”

⁶⁷ Ponkapo bamushipijile mate mu meso anji, ne kumupuma binkonyi, bakwabo nabo bamupumine mapi

⁶⁸ amba, “Aulanga, obewa Kilishitu, ng'anyi wakupuma?”

Petelo byo amukaine Yesu

⁶⁹ Kabiji Petelo wakikajile pangye mu kipango ne kamwale waishile ko aji amba, “Ne anweba mwajinga na Yesu mwina Ngalilea.”

⁷⁰ Pakuba aye wakaine ku meso a bonse amba, “Kechi nayuka kyo wa amba ne.”

⁷¹ Kabiji byo alupukile pa kibelo, kamwale mukwabo wamumwene, wibambijile bajinga ponka amba, “Uno naye wajinga na Yesu mwina Nazala.”

⁷² Kabiji wakaine jibiji ne kuchipa amba, “Kechi namuyuka ao muntu ne.”

⁷³ Pakupitapo kimye kicheche aba baimene ponka baishile ne kumwambila Petelo amba, “Kine anweba mwi wa kwaabo, mambo mulaka wenu wimusolwesha.”

⁷⁴ Ponkapo watatwile kwifinga ne kuchipa amba, “Amiwa kechi namuyuka ao muntu ne.” Kabiji ponkapotu shikombwe wakookwele.

⁷⁵ Ne Petelo wavulukile mambo a mwambijile Yesu amba, “Shikombwe kasa akyangye kukookola, usakunkana jisatu.” Ponkapo walupukile ne kujila bingi.