Mateo 25 - KNTP

Kishimpi kya bazhike jikumi

¹ “Bufumu bwa mwiulu bwapashang'ana pamo nobe bazhike jikumi, basendele malampi abo, balupukile ke baye na kumutundaila musongoshi.

² Kabiji batanu bajinga bakosama, bakwabo batanu bajinga bamaana.

³ Mambo bakosama basendele malampi abo, bino kechi basendele manyi ne,

⁴ pakuba bamaana basendele manyi mu misashi yabo pamo na malampi abo.

⁵ Kabiji musongoshi byo abanjile kwiya, bonse ke bakunuke natulo.

⁶ “Kabiji pakachi ka bufuku kwaishile mbila amba, musongoshi ubena kwiya, lupukai mumutundaile.

⁷ Ponkapo abo bazhike bonse baimene, na kunengezha malampi abo.

⁸ Kepo bakosama bebambijile bamaana amba, ‘Mwitupeepo tumanyi, mambo malampi etu asaka kuzhima.’

⁹ Bino bamaana bakaine amba ‘Ine, kechi akumbane kwi atweba ne anweba pamo ne. Yainga ku bapotesha mukepotele enu.’

¹⁰ Byo bakikapotelenga musongoshi wafikile. Abo bamutengejilenga batwelele nanji na kuja kijiilo kya masongola kabiji bashinkile ne kibelo.”

¹¹ “Panyuma aba bakwabo bazhike nabo baishile amba ‘Mwane nkambo, betushinkwileko!’

¹² Kumvwa aye amba, ‘Kine nemwambila namba kechi nemuyuka ne.’

¹³ Byonkabyo ne anweba labainga ne kukenkenta, mambo kechi mwayuka kana ng'anyi juba nangwa kimye ne.”

Kishimpi kya matalenta

¹⁴ “Mambo bufumu bwa Lesa buji pamo nobe muntu waimene ne kuya ku ntanda ingi, wibechile bakalume banji ne kwibashiila bintu byanji.

¹⁵ Kabiji umo wamupeele matalenta atanu, mukwabo abiji, mukwabo umotu, monka mwayila mukonsha wabo kepo aimene kaye.

¹⁶ Ponkapotu aye watambwile matalenta atanu, wayile na kwiengijisha wakamwenejilemo matalenta akwabo atanu.

¹⁷ Byonkabyo ne aye watambwile abiji wakamwenejilemo akwabo abiji.

¹⁸ Kabiji aye watambwile umotu wakapoyile kimbo panshi, ne kufyapo mali a nkambo yanji.”

¹⁹ “Kabiji pakupitapo moba avula nkambo wa boba bakalume waishile na kwibabalulwilao.

²⁰ Ne aye watambwile matalenta atanu, pa kwiya waletele akwabo atanu amba, ‘Nkambo mwampele matalenta atanu talai, namwenamo matalenta akwabo atanu.’

²¹ Kumvwa nkambo yanji wamwambijile amba, ‘Wauba bulongo obewa kalume wawama ne wakishinka, mambo waikala wakishinka pa tucheche, nkakupa bukalama bwa pa byavula, twela mu lusekelo lwa nkambo yobe.’

²² Kabiji ne aye watambwile matalenta abiji, waishile amba, ‘Nkambo, mwampele matalenta abiji, talai namwenamo matalenta akwabo abiji.’

²³ Kumvwa nkambo yanji amba, ‘Kyawama obewa kalume wawama ne wakishinka, waikala wakishinka pa tucheche, nkakupa bukalama bwa pa byavula; twela mu lusekelo lwa nkambo yobe.’

²⁴ Kabiji ne aye watambwile lutalenta umotu waishile amba, ‘Nkambo nemuyukile anweba mwashinta, munowa po mwabujile kukusa, ne kubungizha po mwabujile kupuujila.

²⁵ Kabiji naubile moyo, kepo nakafiile lutalenta wenu panshi, talai lutalenta wenu we.’”

²⁶ “Kumvwa nkambo yanji wamwambijile amba, obewa kalume watama ne wa muleele, wayukile amba, nnowa po nabujile kukusa, ne kubungizha po nabujile kupujila,

²⁷ onkao mambo wafwainwe kukafya mali ami ku beengijisha, bino amiwa pa kwiya natambula mali ami ne akwabopo.

²⁸ Mwangatai lutalenta, mupe awa uji na matalenta jikumi.

²⁹ Mambo kwi aye uji naabyo ukapewa ne bikwabo, ukekala na byavula; kabiji awa wabulabyo, bakamwangata ne byo aji naabyo.

³⁰ Kabiji mutayai kalume ye nabula kumwenamo mu mfishi ya pangye, mo mukekala majilo ne kwisuma ku meno.”

Juba ja kije

³¹ “Mwana Muntu byo akeya mu lukumo lwanji, na bamalaika bonse pamo, ukekala pa jitanda janji ja lukumo,

³² kabiji mikoka yonse ya bantu ba pano pantanda ikapwilakena ko aji. Ne aye ukebabanya umo ku mukwabo, byonka byo abanya kafunga mikooko ne bambuzhi.

³³ Kabiji ukeifungila mikooko konka ku kilujo kyanji, ne bambuzhi nabo ku kipiko kyanji.

³⁴ Ponkapo Mfumu ukebambila ba ku kilujo kyanji amba iyai, anweba mwapeshiwa kwi Bataata! Swanai bufumu bo emutujila kufuma ku ntendekelo ya pano pantanda.

³⁵ Mambo najinga na nzala, mwampele bya kuja, naumvwine kilaka, mwampele bya kutoma, najinga mwenyi, mwantambwile,

³⁶ namwene bwamba mwamvwikile, nakolelwe mwaishile na kummona, najinga mu kaleya, mwaishile kumpempula.”

³⁷ “Kepo baoloka bakamba amba ‘Nkambo, ng'anyi kimye kyo twimumwene na nzala ne kwimupa bya kuja? Nangwa na kilaka ne kwimupa bya kutoma?

³⁸ Kabiji ng'anyi kimye kyo twimumwene bwenyi, ne kwimutambula? Nangwa na bwamba ne kwimuvwika?

³⁹ Kabiji ng'anyi kimye kyo twimumwene na kukolwa, nangwa mu kaleya, ne kwiya na kwimupempula?’

⁴⁰ Kabiji Mfumu pa kwibakumbula, ukebambila amba, ‘Kine nemwambila namba, monka mo mwamubijile umo wapelaako wa bano balongo bami, mo mwangubile ne amiwa.’

⁴¹ Ponkapo ukebambila abo ba ku kipiko kyanji amba, ‘Fumaiko kwi amiwa, anweba mwafingwa, yainga mu mujilo wa myaka ye banengezhezha Diabola ne bamalaika banji!

⁴² Mambo najinga na nzala, kechi mwampele bya kuja ne, naumvwine kilaka, kechi mwampele bya kutoma ne,

⁴³ najinga mwenyi kechi mwantambwile ne, namwene bwamba, kechi mwamvwikile ne, nakolelwenga, najinga mu kaleya, kechi mwampempwile ne.’”

⁴⁴ “Ponkapo ne abo nabo bakamukumbula amba ‘Nkambo, ng'anyi kimye kyo twimumwene nangwa na nzala, nangwa na kilaka, nangwa mwenyi, nangwa na bwamba, nangwa na kukolwa, nangwa mu kaleya, ne kwimukwasha ne?’

⁴⁵ Ponkapo ukebambila amba ‘Kine, nemwambila namba, monka mo mwabujile kumuubila umo wapelaako wa bano, mo mwabujile kungubila ne amiwa.’

⁴⁶ Kabiji bano bakaya ku lukabisho lwa myaka. Pakuba baoloka bakaya ku bumi bwa myaka.”