Mateo 24 - KNTP

Yesu byo a ambile na mambo a konaika kwa Nzubo ya Lesa

¹ Kabiji Yesu walupukile mu nzubo ya Lesa kaye ne kuya, kabiji baana banji babwanga baishile ko aji amba, tumumweshe byashimikwa nzubo ya Lesa.

² Kumvwa aye wibambijile amba, “Mubena kwibimona bino byonse, kine nemwambila namba, kechi pakashaala nangwa jibwe jikatentakana pa jikwabo jo bakabula kupalang'anya ne.”

Mambo a kumanyikwa ne byamalwa

³ Kabiji byo aikajile pa Mutumba wa olivi, baana babwanga baishile kwi aye kumbaji amba, “Tubuulai bino bintu bikamweka ng'anyi mwaka? Kabiji ng'anyi kayukilo ka kwiya kwenu, ne ka juba jikapelaako?”

⁴ Kumvwa Yesu amba, “Jimukai kuchiina amba nangwa umo wakemutwala mungi.

⁵ Mambo bavula bakeya mu jizhina jami amba, ‘Amiwa yami Kilishitu!’ Kabiji bakebatwala mungi bavula.

⁶ Kabiji byo mukomvwa makondo ne nkuwa ya makondo, kechi mukakamwe ne. Mambo bino byafwainwa kumweka, mpelo kasa ikyangye kufika.

⁷ Mambo mukoka ukemeena mukoka mukwabo, ne bufumu bukemeena bufumu bukwabo, kabiji kukekala bipowe bya nzala ne bitentanshi kwavula.

⁸ Nanchi bino byonse ko kuntatwilo ya bisanso.

⁹ “Ponkapo bakemufikizha mu malwa ne kwimwipaya. Kabiji bakemushikwa ku mikoka yonse ya bantu pa jizhina jami.

¹⁰ Ne bavula baketuntula, bakesolola bene na bene, ne kwishikwa bene na bene.

¹¹ Kabiji bangauzhi ba bubela bavula bakeya, ne kwibatwala mungi bavula,

¹² Kabiji na mambo a bubi bukavula, butemwe bwa bavula bukayanga na kukepa.

¹³ Bino awa ukakoselamo kufika ne kumpelo ye ukapuluka.

¹⁴ Kabiji ano Mambo Awama a bufumu aka sapwilwa pano pantanda ponse mwa kwibashiina ba mu mikoka yonse ya bantu, bino mpelo ikafike.”

Malwa akatampe

¹⁵ “Kabiji pa kwikimona akya kya bunya kileeta lonaiko kya ambile Danyela ngauzhi, kasa kyaimana mwazhila” (awa utanga, muleke omvwe!)

¹⁶ “Ponkapo aba baji mu Yudea bakanyemene ku mitumba.

¹⁷ Aye uji pa mutenge kechi akekile amba, akasende biji mu nzubo yanji ne.

¹⁸ Ne yewa uji mu bujimi, naye kechi akabwele na kushikula munkukumba wanji ne.

¹⁹ Kabiji malwa kuboba bakekala na memi ne boba bakamwishanga baana mu oa moba!

²⁰ Lombai amba, po mukanyemanga kechi kikekale mu bang'ondo ba mashika ne, nangwa mu juba ja Sabado ne!

²¹ Mambo mu oa moba kukekala malwa akatampe, a kuuba kala kechi kwajingapo akwabo a byonkabyo ne, nangwa kufuma ku ntendekelo ya pano pantanda kufika ne pano, ne myaka yonsetu kechi akekalako a byonkabyo ne.

²² Kabiji aa moba inge ne kwiachibako ne, kafwako muntu nangwa umo ukapuluka ne. Pakuba na mambo a basalululwa bakeachibako aa moba.”

²³ “Pa kyokya kimye umvwe muntu akemwambile amba, ‘Talai! Kilishitu uji kuno,’ nangwa amba, ‘Kuno!’ Kechi muketabe ne.

²⁴ Mambo kukamweka ba kilishitu ba bubela, ne bangauzhi ba bubela, kabiji bakamwesha biyukilo bikatampe ne bya kukumya, mu kwibatwala mungi basalululwa, umvwe kyakonsheka kuubiwa.

²⁵ Umvwai! Nemubuujila jimo.”

²⁶ “Kabiji umvwe bakemwambila amba, ‘Talai, uji mungye!’ Kechi mukayeko ne, nangwa kwamba amba, ‘Talai, uji mu mazubo a mukachi!’ Kechi muketabe ne.

²⁷ Mambo byonka byuba kubeesha kwa mvula kufuma ku musela ne kumweka ku muzhika, byo kikekala ne pa kwiya Mwana Muntu.

²⁸ “Kuji mubiji wafwa ko kukapwilakena makubi.

Kwiya kwa Mwana Muntu

²⁹ “Kabiji ponkapotu pakupita aa malwa, juba jikaaluka ke mfishi, ne ng'ondo naye kechi ukakema ne, ne tubangabanga twa mwiulu tukaponanga, ne bya bulume bya mwiulu bikasunkeena.

³⁰ Kabiji ponkapo kikamweka kiyukilo kya Mwana Muntu mwiulu, kabiji mikoka yonse ya pano panshi ikajila miteto, bakamumona Mwana Muntu kasa eya mu makumbi a mwiulu na bulume ne na lukumo lukatampe.

³¹ Kabiji ukebatuma bamalaika banji na jiwi jikatampe ja ntolompita, ne abo bakebapwizha pamo basalululwa banji kwibafumya ku makonka ana a panopantanda, ne monse mwapela jiulu.

Byakufunda ku kichi kya mukuyu

³² “Kabiji pano fundai kishimpi ku kichi kya mukuyu. Misampi yakyo byo inekena ne kusapuka mabuula, ke kayukilo amba pano mayoo aji pepi.

³³ Byonkabyo ne anweba byo mukamona bino bintu byonse yukai amba kaaji pepi, ponka pa kibelo.

³⁴ Kine nemwambila namba, kino kisemi kechi kikapite ne, poso bino byonse bikafike.

³⁵ Jiulu ne ntanda bikapita, pakuba byambo byami kechi bikapite nangwa pachechetu ne.

Kafwako wayuka kimye nangwa Juba ne

³⁶ “Pakuba aja juba nangwa kimye kafwako wayuka ne, nangwa bamalaika ba mwiulu, nangwa Mwana ne posotu bonka Bataata.

³⁷ Kabiji byonka byo kyajinga mu moba a Nowa, byo kikekala ne pa kwiya Mwana Muntu.

³⁸ Mambo aa moba kasa akyangye kwiya muyuulo, bajiilenga ne kutoma, basongwelenga ne kusongolwa, kufika ne ku joja juba joatwelele mu bwato Nowa,

³⁹ nanchi kechi bayukile ne poso byo aishile muyulo, ne kwibasenda bonse shata! Byonkabyo byo bikekala ne pa kwiya Mwana Muntu.

⁴⁰ Mu akya kimye kukekala baana balume babiji mu bujimi bumo; umo bakamusenda, ne mukwabo bakamusha.

⁴¹ Banabakazhi babiji bakapelanga pamo, umo bakamusenda, ne mukwabo bakamusha.

⁴² “Onkao mambo ne anweba mulabenga ne kukenkenta mambo kechi mwayuka juba jo akeshilamo Nkambo yenu ne.

⁴³ Kabiji yukai kino amba umvwe mwina nzubo wayukijile jimo pakeshila ngivi, inge walabilenga ne kukenkenta ne kuleka nzubo yanji amba beisabe ne.

⁴⁴ Ne anweba mwikale ba kutengela jimo, mambo Mwana Muntu ukeya pa kimye kyo mwabula kuketekela.

Kalume wa kishinka ne wabula wa kishinka

⁴⁵ “Lelo awa kalume wa kishinka ne wa maana ye ng'anyi, ye apa nkambo yanji bukulumpe bwa bantu ba ku nzubo yanji, amba apanenga kajo pa kimye kyafwainwa?

⁴⁶ Watokwa awa kalume uba, nkambo yanji pa kwiya wamutaana kasa oba byonkabyo.

⁴⁷ Kine, nemwambila namba ukamupa bukulumpe bwa bintu byanji byonsetu.

⁴⁸ Bino umvwe kalume watama walanguluka mu muchima wanji amba, ‘Nkambo yami wabanda kwiya,’

⁴⁹ ne kutatula kupuma bakalume bakwabo, kaje ne kutoma pamo na bapendwa,

⁵⁰ nkambo ya yewa kalume ukeya mu juba jo abula kuketekela ne mu kimye kyo abula kuyuka.

⁵¹ Kabiji ukamututaula bingi, ne kumutongwela kumanyikwa pamo naba kamfutumfutu, po pakekala kujila ne kwisuma ku meno.”