Mateo 23 - KNTP

Bafunjishi ba mizhilo ne Bafaliseo

¹ Ponkapo Yesu wiambijile mabumba ne baana banji babwanga amba,

² “Banembeshi ne Bafaliseo baikala pa kipona kya Mosesa.

³ Onkao mambo bintu byonse byo bemwambila, mwibyubenga ne kwibilama. Bino kechi mulondele byubilo byabo ne, mambo abo bebyambatu ne kwibyuba ne.

⁴ Kabiji bakasa bisendwa byanemesha byakatazha kusenda, bebitwika pa bipuzhi bya bantu, pakuba abo bene kechi baswa kukwatakotu nangwa na munwe ne.

⁵ Kabiji mingilo yabo yonse beyuba amba, bebamone ku bantu. Kabiji babayisha mfilaketele yabo, ne kunungulula mikonko ya bivwalo byabo!

⁶ Bebitemwa bifulo bya buneme ku bijiilo, ne bipona bya buneme mu mashinagoga,

⁷ ne kwibemuna pa bisankanyi, ne kutelwa ku bantu amba, ‘Laabi.’

⁸ Kabiji anweba kechi mutelwe amba ‘Laabi’ ne, mambo mufunjishi wenu umotu, ne anweba bonse mwi balongo na balongo.

⁹ Kabiji kechi muteele umo wa pano panshi amba, ‘Taata’ ne, mambo Shenu umotu, yenka uji mwiulu.

¹⁰ Nangwa kechi mutelwe amba, ‘mufunjishi’ ne, mambo mufunjishi wenu umotu yenka Kilishitu.

¹¹ Kabiji wakila mu bukulumpe wakila mwi anweba ukekala ke kalume wenu.

¹² Kabiji awa witumbijika mwine ukapelulwa; ne yewa wipelula mwine ukatumbijikwa.”

¹³ “Pano malwa enu, anweba banembeshi ne Bafaliseo, ba kamfutumfutu! Mambo mwibashinkila bantu ku bufumu bwa mwiulu, mambo kechi mutwela anweba bene ne, nangwa kwibaleka basaka kutwela amba batwele ne.”

¹⁴ “Malwa enu, anweba banembeshi ne Bafaliseo, ba kamfutumfutu! Mambo mwangata mazubo a banabakazhi bafwilwa, ne mambo a kusaka kujimbaika bantu mulepesha milombelo yenu, kyo kyo mukazhachilwa kyakila!”

¹⁵ “Malwa enu, anweba banembeshi ne Bafaliseo, ba kamfutumfutu! Mambo mupitang'ana ponse pa mema ne pa ntanda amba twalule umo, kabiji pa kumwalulula mwamulenga ke mwana wa Ngehena, wimukijisha ne anweba bene.”

¹⁶ “Malwa enu, anweba bantangi ba bumpofu, mwamba amba, wa kuchipa nzubo yazhila ya Lesa, wachipatu, pakuba wa kuchipa ngolode ya mu nzubo yazhila ya Lesa, wilengela mambo.

¹⁷ Anweba ba bilubi ne bampofu! Nanchi kyanema ikika, ngolode nyi? Inyi nzubo yazhila ya Lesa yazhijikile ngolode?

¹⁸ Kabiji mwamba amba, wa kuchipa kyakusokelapo bitapisho wachipatu, kabiji wa kuchipa mulambu uji ponka wilengela mambo.

¹⁹ Anweba bampofu! Kyanema ki ka? Awa mulambu nyi? Inyi kyakusokelapo bitapisho kizhijika mulambu?

²⁰ Onkao mambo wa kuchipa kyakusokelapo bitapisho, wachipakyo ne bintu byonse biji ponka.

²¹ Kabiji wa kuchipa nzubo yazhila ya Lesa, wachipa ne mwine waikalamo.

²² Kabiji wa kuchipa mwiulu, wachipa jitanda ja Lesa, ne mwine waikalapo.”

²³ “Malwa enu, anweba banembeshi ne Bafaliseo, ba kamfutumfutu! Mambo mulambula bifikizha mu bujikumi mu minti ne mu ndeelo ne mu kamuni, kabiji byanema bya mizhilo, bunchiba mambo bwaoloka, ne lusa, ne bukishinka mwibileka kwibyuba. Abyo byo mwafwainwa kuuba, ne bikwabo nabyo kechi mwafwainwa kwibileka ne.

²⁴ Anweba bantangi ba bumpofu, mususako kabwibwi, kabiji ngamela mumumina!

²⁵ “Malwa enu, anweba banembeshi ne Bafaliseo, ba kamfutumfutu! Mambo movwa pangye ya katomeno ne muchiba, kabiji mukachi mwayula bwivi ne lwiso.

²⁶ Obewa Mufaliseo mpofu, patanshi ovwa katomeno mukachi, ne pangye pakatokela pamo!

²⁷ “Malwa enu anweba banembeshi ne Bafaliseo, ba kamfutumfutu! Mambo mwapashang'ana nobe bilende byo bashinga na mpemba, pangye bimweka kuwama, bino mukachi mwayula bikupa bya bantu baafwa ne byatama byonse.

²⁸ Byonkabyo ne anweba mwamweka ku bantu pamo nobe baoloka, kabiji mukachi mwayula bukamfutumfutu ne bubi.

²⁹ “Malwa enu anweba banembeshi ne Bafaliseo, ba kamfutumfutu! Mambo mwibishimika bilende bya bangauzhi, ne kunengezha bilende bya baoloka,

³⁰ ne kwamba amba, inge twaikajilenga mu moba a bashakulu betu, inge kechi twaumvwang'ene naabo pa kwichila mashi a bangauzhi ne.

³¹ Onkao mambo mwishimuna anweba bene amba, mwi baana ba aba baipayile bangauzhi.

³² Nanchi yuzhai kyokya kipimo kya bashakulu benu.

³³ Anweba milolo, anweba baana ba balunkungwe, mukapuluka byepi ku lukabisho lwa mu Ngehena?

³⁴ Byonkabyo talai, nemutumina bangauzhi bami ne bamaana, ne banembeshi, kabiji bamo mukebepaya ne kwibapopa pa misalabu, kabiji bakwabo mukebatutaula mu mashinagoga enu, ne kwibapanga mu mizhi yenu.

³⁵ Amba akafike mashi a baoloka bonsetu aichikile pano panshi pe anweba, kufuma ku mashi a Abela waoloka, ne kufika ku aa mashi a Zakaliya mwana Balakiya, ye mwaipayijile pakachi aku nzubo yazhila ya Lesa aku nako kyakusokelapo bitapisho,

³⁶ Kine nemwambila namba, bino bintu byonse bikekifikila kino kisemi!

Yesu byo ajijile na mambo a Yelusalema

³⁷ “Obewa Yelusalema, Yelusalema! Wipaya bangauzhi, ne kwibaasa mabwe aba bo bemutumina! Javula bingi jo nasakile kwibakonkenya baana bobe pamo nobe kyaje ukonkenya twana twanji mwine mu byapi byanji, kabiji anweba kechi mwaswile ne!

³⁸ Talai! Nzubo yenu imushajila ke masala.

³⁹ Mambo nemwambila namba, kechi mukammona palutwe ne, poso mukambe amba, atotwe awa wiya mu jizhina ja Nkambo.”