Mateo 22 - KNTP

Kishimpi kya kijiilo kya masongola

¹ Kabiji Yesu wibeelele kishimpi kikwabo amba,

² “Bufumu bwa mwiulu bwapashang'ana na mfumu wateekele kijiilo kya masongola a mwananji.

³ Kabiji watumine bakalume banji na kwibeta abo bo aichile ku kijiilo kya masongola, bino bakaine kwiya.

⁴ Ponkapo watumine bakalume bakwabo amba, kabuulai abo bonalayile amba, talai napwisha kala kuteeka kijiilo kyami, ne bang'ombe bami ne banyama bami banuna naipaya, byonse byapya kala. Iyainga ku kijiilo kya masongola.

⁵ Pakuba bekipelwile bapalang'ene, umo ku bujimi bwanji mwine, mukwabo ku bintu byanji byo apotesha,

⁶ aba bashajilepo nabo bakwachile bakalume banji, bebayanjishishe, ne kwibepaya.

⁷ Ne mfumu wazhingijile bingi, waimenye bulemo bwanji, bwakonawine aba bambanzhi, bwasokele ne muzhi wabo.

⁸ Ponkapo wa ambijile bakalume banji amba, kijiilo kya masongola kyanengezhiwa, pakuba aba botwaichile kechi kibafwainwa ne.

⁹ Onkao mambo yainga ku mansanga a mashinda, bonse bo musakukatanako, mwibete ku kijiilo kya masongola.

¹⁰ Kabiji aba bakalume, pa kuya mu mashinda, bebapwizhizhe pamo bonse bo batainemo, ne babi ne bawama, ponkapo nzubo ya kijiilo kya masongola yayujile na benyi.

¹¹ “Aye mfumu pa kutwela amba mmone benyi, wamwenemo muntu wabula kuvwala kivwalo kya masongola.

¹² Wamwambijile amba, obewa mukwetu watwela byepi muno byo wabula kivwalo kya masongola? Kechi wamwene kya kwamba ne.

¹³ Ponkapo mfumu wibambijile bamwingilo banji amba, mukasai ku maboko ne ku maulu, mumutaye mu mfishi ya pangye. Mo mukekala majilo ne kwisuma ku meno.

¹⁴ Mambo baitwa bo bavula, pakuba basalululwa bo bacheche.”

Mambo a kupana musonko

¹⁵ Kepo Bafaliseo ke baye ne kuya na kunengezha mashinda a kumukwachilamo.

¹⁶ Kabiji bamutumijile baana babo babwanga ne bena Heloda, ne kumwambila amba, “Mufunjishi twayuka namba anweba mwi wa kine, kabiji mufunjishatu jishinda ja Lesa mu bukine, kechi muchiina muntu nangwa umo ne, mambo kechi muta muchima ku bilungi bya bantu ne.

¹⁷ Mwitubuule mwane, kana anweba mulanguluka byepi? Kizhila kusonka kwi Kesala nyi, inyi ne?”

¹⁸ Pakuba Yesu byo ayukile bubi bwa milanguluko yabo, wibambijile amba, “Mungesekela ka, anweba ba kamfutumfutu?

¹⁹ Mmweshai mali o mupana ku musonko.” Ponkapo bamuletejile ndenali imo.

²⁰ Ne aye wibambijile amba, “Lelo akye kipasha ne kinembelo bya kwa ng'anyi?”

²¹ Abo amba, “Bya kwa Kesala.” Kepo ebambijile amba, “Panai kwi Kesala bya kwa Kesala, ne kwi Lesa bya kwa Lesa.”

²² Pakumvwa byonkabyo bakuminye, bamushiile ke baye.

Kwipuzha mambo a kusanguka mu bafu

²³ Mu jonkaja juba kwaishile Basadusea kwi aye, bonkabo bamba amba, kafwako lusanguko lwa bafu.

²⁴ Ne abo bamwipwizhe amba, “Mufunjishi, Mosesa wa ambile amba, kana muntu wafwa, ne kushapo baana ne, mulongo wanji amuswane mukazhanji, asemenemo mwana wa mulongo wanji.

²⁵ Mwi atweba mwajinga baana bankazhi batanu na babiji. Mubeji wasongwele mukazhi, wafwiletu ne kushamo mwana ne; washiila nkasanji mukazhanji.

²⁶ Ne wa bubiji naye byonkabyo, ne wa busatu naye pamotu, kufikizha ne ku wa butanu na bubiji.

²⁷ Kabiji panyuma ne mwanamukazhi mwine naye wafwile.

²⁸ Nanchi pa kukasanguka bafu ukekala ke muka ng'anyi? Mu aba batanu na babiji, mambo bonse bamusongwele?”

²⁹ Kumvwa Yesu amba, “Mwaya mungi, mambo kechi mwayuka binembelo nangwa bulume bwa Lesa ne.

³⁰ Mambo pa kukasanguka bafu, kechi bakasongola, nangwa kusongolwa ne, kabiji bakekala pamo nobe bamalaika ba mwiulu.

³¹ Kabiji mwayila kusanguka kwa bafu, kechi mwatangilepo byo emwambijile Lesa nenyi amba,

³² amiwa ne Lesa wa Abulahama, ne Lesa wa Izaka, ne Lesa wa Yakoba? Aye Lesa kechi ye Lesa wa bafu ne, wa bomi.”

³³ Ponkapo mabumba pakumvwa bakuminye bingi mafunjisho anji.

Mukambizho mukatampe

³⁴ Kabiji Bafaliseo pakumvwa amba, wibashinkisha bulaka Basadusea, ponkapo bepwizhizhe pamo.

³⁵ Kepo umo wa kwabo, shayuka wa mizhilo, wamwesekele pa kumwipuzha amba,

³⁶ “Mufunjishi, nanchi mukambizho mukatampe wa mu buku wa Mizhilo ye wepi?”

³⁷ Kumvwa aye Yesu amba, “Ukamutemwa Nkambo Lesa wobe na muchima wobe yense, ne na mweo wobe yense, ne na maana obe onse.

³⁸ Awo ye mukatampe, ye mukambizho mutanshi.

³⁹ Kabiji wa bubiji waesakana nanji ye ye uno amba, ukatemwa mukwenu pamo byonka byowitemwa obewa mwine.

⁴⁰ Pa yo ino mikambizho ibiji po pa kishina kya mu buku yense wa Mizhilo, ne wa Bangauzhi ba Lesa.”

Kilishitu ye mwana ng'anyi?

⁴¹ Kabiji Bafaliseo sa bakipwila pamo, Yesu wibepwizhe amba,

⁴² “Anweba nanchi mulanguluka byepi na mambo a Kilishitu? Ye mwana ng'anyi?” Kumvwa abo amba, “Mwana Davida.”

⁴³ Aye wibepwizhe amba, “Mambo ka aye Davida na Mupashi umutela amba Nkambo?” Amba,

⁴⁴ “Nkambo waambila Nkambo yami amba, ikala ku kilujo kyami, poso mbiike balwanyi bobe munshi ya maulu obe?”

⁴⁵ “Umvwe kabiji Davida wamutelele amba ‘Nkambo.’ Leelo kabiji ye mwananji byepi?”

⁴⁶ Kabiji kechi pajinga muntu nangwa umo wayukile kumukumbula ne, kufuma ku joja juba kafwako muntu wachinchikile kumwipuzha bikwabo ne.