Mateo 21 - KNTP

Yesu byo atwelele mu Yelusalema kasa bamutota

¹ Kabiji byo bafikile kwipi na Yelusalema, pakufika ku Betefaji, ku Mutumba wa olivi. Ponkapo Yesu watumine baana babwanga babiji,

² ne kwibambila amba, “Yainga mu yewa muzhi ye mwatazhapo bilungi byenu, ne ponkapotu pa kutwelamo musa kutaana mbongolo ye bakasa, pamo na mwananji. Mwi bakasulule mwibandetele kuno.

³ Kabiji umvwe muntu wimwipuzha, mukamwambile amba, Nkambo wibasaka, ponkapotu ukebatuma kuno.”

⁴ Kino kyamweka amba kifike akya kya ambile ngauzhi amba,

⁵ “Buulai mwana wa Ziona wamukazhi amba, tala, Mfumu wobe byo abena kwiya ko uji! Wakooka muchima, kabiji waikala pa mbongolo, kabiji pa kituubala, mwana nyama wamwingilo.”

⁶ Ponkapo baana babwanga bayile bakobile monka mo ebambijile Yesu.

⁷ Baletele mbongolo ne mwananji, bebakupikile ne bivwalo byabo, kepo aikajilepo.

⁸ Ponkapo ne bakwabo bavula bamu jibumba ke baye na kwanshika bivwalo byabo mu jishinda, kabiji bakwabo nabo kasa bakosola misampi ya bichi ne kwiyanshika mu jishinda.

⁹ Ne mabumba atangijileko ne ajinga panyuma, kasa abijika amba, “Hosana kwi Mwana Davida! Atotwe awa wiya mu jizhina ja Nkambo! Hosana ne mwiulu mwine!”

¹⁰ Kabiji byo atwelele mu Yelusalema, muzhi yense wabuukile amba, “Ing'anyi wo?”

¹¹ Kumvwa mabumba amba, “Uno ye ngauzhi, Yesu wa ku Nazala wa mu Ngalilea.”

Yesu byo atokesheshe nzubo ya Lesa

¹² Kabiji Yesu wayile mu nzubo ya Lesa, wibapangilemo bonse bapoteshenga ne bapotelenga mu nzubo ya Lesa. Waalumwine ne matebulu a bapimpwilenga mali ne bipona bya boba bapoteshenga ba nkunda,

¹³ ne kwibambila amba, “Kyanembwa amba, Nzubo yami ikatelwa amba nzubo ya milombelo. Pakuba anweba mwiyalula ke jiyengo ja ba tupondo bapukula bintu.”

¹⁴ Kabiji bampofu ne balemana bamunangile mu nzubo ya Lesa, ne aye wibabukile.

¹⁵ Ponkapo bang'anga bakatampe ne banembeshi, pa kwibimona bya kukumya byo aubilenga, ne banyike kasa babijika monka mu nzubo ya Lesa amba, “Hosana kwi mwana Davida!” Ponkapo bazhingijile.

¹⁶ Ba mwambijile amba, “Mwaumvwa byo babena kwamba nyi?” Kumvwa Yesu amba, “Ee, nanchi mukyangye kutangapo nyi? Amba, mutunwa twa twanyike ne twana twa lukeke mo mwanengezhiwe kutota?”

¹⁷ Ponkapo wibashiile wafumine mu muzhi kaye ku Betani, wakekajile konkakwa.

Mukuyu wabujile kupanga bipangwa

¹⁸ Bino lukeelo, pa kubwela mu muzhi, waumvwine nzala.

¹⁹ Ne pa kumona mukuyu kunsa ya jishinda, wayileko kutaana kafwako makuyu, kwajingatu mabuula onka. Wikyambijile amba, “Kechi ukapangepo kipangwa nangwa kimotu ne, myaka yonse!” Ponkapotu kichi kyaumine.

²⁰ Ne baana babwanga pa kwikimona bakuminye amba, “Mukuyu wauma byepi ponkapatu?”

²¹ Kumvwa Yesu wibambijile amba, “Kine ne mwambila namba, kana muji na lwitabilo ne kuzhinauka ne, kechi mukooba kyonkakye kyaubiwapo ku mukuyu ne, mukambila nangwa uno mutumba amba ushikulwe, utayiwe mu kalunga ka mema, kikobiwa byonkabyo.

²² Kabiji byonse byo mukasakanga mu lulombelo na lwitabilo, mukebitambula.”

Byo baipwizhe Yesu na mambo a luusa lwanji

²³ Kabiji byo atwelele mu nzubo ya Lesa, bang'anga bakatampe ne bakulumpe ba bantu baishile ko aji ne kumwipuzha amba, “Ng'anyi luusa mo ubena kuubila bino bintu? Kabiji ng'anyi wakupa luno luusa?”

²⁴ Kumvwa Yesu wibambijile amba, “Ne amiwa nsa kwimwipuzha jipuzho, kana mumbuule, ne amiwa nsa kwimubuula luusa mo ngubila bino.

²⁵ Nanchi lubatizhilo lwa kwa Yoano lwafumine pi? Lwafumine kwiulu nyi, inyi lwafumine ku bantu?” Ponkapo baambang'ene abo bene na bene amba, “Umvwe twambe namba lwa mwiulu aye usa kwamba amba mambo ka o mwabujile kumwitabila?

²⁶ Kabiji umvwe twambe namba lwa ku bantu, twachiina jibumba, mambo bonse bamwitabila Yoano amba wajinga ngauzhi.”

²⁷ Ponkapo bamukumbwile Yesu amba, “Kechi twayuka ne.” Kumvwa Yesu naye amba, “Nanchi ne amiwa kechi nemubuule luusa lo ngubilamo bibye ne.”

Kishimpi kya baana babiji

²⁸ “Pano anweba mulanguluka amba ka? Muntu umo wajinga na baana babiji babalume, waishile ku mubeji amba mwanami yanga ukengile mu bujimi bwa ming'anzang'anza leelo.

²⁹ Aye mwananji wakaine amba amiwa ne mwane. Kabiji panyuma walapila, kaye.

³⁰ Kabiji waishile ku wa bubiji, wamwambijile muntu mumotu. Aye waitabile amba ee mwane nkambo ngya, bino kuya ne.

³¹ Pabano babiji, ng'anyi waubile kyaswa muchima wa shabo?” Kumvwa abo amba, “Mutanshi.” Kumvwa Yesu amba, “Kine nemwambila namba, basonkeshi ne bankende bakemukilaila kukatwela mu bufumu bwa Lesa.

³² Mambo Yoano waishile kwi anweba mu jishinda ja bololoke kabiji anweba kechi mwamwitabijile ne; pakuba basonkeshi ne bankende bamwitabijile, kabiji anweba pa kwikimona, kechi mwalapijile panyuma amba tumwitabile ne.”

Kishimpi kya bujimi bwa ming'anzang'anza

³³ “Umvwai kikwabo kishimpi. Kwajinga muntu mwina nzubo wajimine bujimi bwa ming'anzang'anza, wabikileko ne luvimba, wapoyileko ne kya kufiinamo binyu, ne kutungilapo kyamba. Ne kwibusha ku bakalama, kabiji wayile ku ntanda ingi.

³⁴ Mwaka pakufika pepi papiila bipangwa, watumineko bakalume banji ku bakalama ba bujimi amba kaletai bipangwa byami.

³⁵ Ponkapo bakalama bebakwachile bakalume banji, umo bamupumine, mukwabo bamwipayile, kabiji ne mukwabo naye bamwashile mabwe.

³⁶ Kabiji watumineko bakalume bakwabo bakijile batanshi mu kuvula, kabiji abo nabo bebobile pamotu.

³⁷ Kabiji kyapeleleeko watumineko mwananji amba, bakamunemeka mwanami.

³⁸ Pakuba bakalama pa kumona mwana, ba ambile amba au ye nswanyi, twayai tumwipaye, twangate buswanyi bwanji!

³⁹ Ne pa kumukwata bamutayile pangye ya bujimi bwa ming'anzang'anza ne kumwipaya bamwipayile.

⁴⁰ Nanchi pa kwiya aye mwina bujimi bwa ming'anzang'anza, bakalama ukeboba byepi?”

⁴¹ Abo bamukumbwile amba, “Aba batama ukebonauna kyatama pelu! Ne bujimi bwa ming'anzang'anza ukebushiila bakwabo bakalama, abo bakamupanga bipangwa pa mwaka wabyo.”

⁴² Yesu wibambijile amba, “Nanchi kechi mwatangilepo biji mu binembelo nenyi? Amba.” “Jibwe jo basujile bashimika jo jonka jaalukile ke mutwe wa jikonka. Kino kyafumine kwi Nkambo kabiji kyokya kukumya ku meso etu!”

⁴³ “Onkao mambo nemwambila namba, Bufumu bwa Lesa bakemwangatabo, bakebupana ku mukoka ukapanga bipangwa byabo.”

⁴⁴ “Awa ukaponena pa jo jino jibwe ukachimauka, pakuba awa ye jikaponena ukavingakanatu.”

⁴⁵ Kabiji bang'anga bakatampe ne Bafaliseo pakumvwa bishimpi byanji, ponkapo bayukile amba, yetu abena kwambila.

⁴⁶ Basakile kumukwata, bino bachiinenga mabumba mambo bamutelele amba Ngauzhi wa Lesa.