Mateo 20 - KNTP

Kishimpi kya bamingilo baingijilenga mu bujimi

¹ Mambo bufumu bwa mwiulu bwapashang'ana na muntu mwina nzubo wakelejile lukelo na kumona bamingilo ba kwingila mu bujimi bwanji bwa ming'anzang'anza.

² Kabiji byo aumvwang'ene naabo bamwingilo, mu juba jimo ndenali imo, wibatumine mu bujimi bwanji.

³ Kabiji pepi na awala wabusatu walupukile jibiji, wamwene bakwabo baimanatu babula bya kuuba pa kisankanyi,

⁴ ne aye wibambijile amba, ne anweba yainga mu bujimi bwa ming'anzang'anza, nsakwimufweta kyonka kyafwainwa kwimupa. Ke baye ne kuya.

⁵ Kabiji ne pa kushinkimana juba, ne pa kulemba juba walupukile, waubile byonka byo ajikuuba.

⁶ Kabiji ne mabanga, juba pa kutwala pa bichi walupukile, wibataine bakwabo baimanatu babula bya kuuba, wibambijile amba, mambo ka o mwaimenatu juba jonse?

⁷ Kumvwa abo amba, mambo kafwako muntu witupa mwingilo ne. Kumvwa aye amba, nanchi ne anweba yainga mu bujimi bwa ming'anzang'anza.

⁸ “Kabiji byo bwaijile, mwina bujimi wamwambijile kapitao wanji amba wibete bamwingilo, utendekele bapelaako kwibafweta, bino wiye upe ne batanshi.

⁹ Kabiji pa kwiya ba pa kimye kya juba pa kutwala pa bichi, bonse batambwile ndenali imo, imo.

¹⁰ Kabiji pa kwiya batanshi, baketekejile amba, tusakutambula ne ikwabo, kabiji ne abo nabo batambwiletu pamo ndenali imo, imo.

¹¹ Kabiji pa kwiitambula, bamunenene mwina nzubo,

¹² amba bano bapelaako baji kwingila awala umo, kabiji wibesakanyatu pamo ne atweba baji kwingila juba jonse, sa tufwa na mute!

¹³ “Ponkapo wamukumbwile umo amba, mukwetu kechi nakuubila kibi ne. Nanchi kechi twaji kumvwang'ana nobe pa ndenali imo nenyi?

¹⁴ Shikula yobe uyenga, kyo kyaswa muchima wami kumupa wapelaako pamo ne obewa.

¹⁵ Kizhila nyi kuuba byo nasaka kuuba na bintu byami, inyi wangubila kichima amiwa pakuba kyawama?

¹⁶ Byonkabyo bapelaako bakekala ke batanshi, ne batanshi ke bapelaako.”

Yesu wa ambile jabusatu na mambo a lufu lwanji

¹⁷ Kabiji Yesu byo ayilenga ku Yelusalema, wasendele baana banji babwanga, ne kwibambila mu jishinda amba,

¹⁸ “Talai tubena kuya ku Yelusalema, kabiji Mwana Muntu bakamusolola ku bang'anga bakatampe ne ku banembeshi, ne abo bakamufwisha nao a lufu,

¹⁹ ne kumupana ku Bangentila, kabiji ne abo nabo bakamuuba mwenga, ne kumututaula, ne kumupopa pa musalabu, kabiji mu juba ja busatu ukasangulwa.”

Byalombele ba Yakoba ne Yoano

²⁰ Ponkapo inanja baana bakwa Zebede, waishile na baana banji babalume na kumupopwela, ne kumulomba kintu.

²¹ Ne aye Yesu wamwipwizhe amba, “Usaka ka?” Kumvwa aye amba, “Ambai amba, bano baana bami babalume babiji bakekale mu bufumu bwenu, umo ku kuboko kwenu kwa kilujo, ne mukwabo ku kipiko kyenu.”

²² Pakuba Yesu wamwambijile amba, “Kechi mwayuka kyo musaka ne. Mwakonsha kutoma katomeno kontoma amiwa nyi?” Ne abo bamwambijile amba, “Twakonsha.”

²³ Kumvwa aye amba, “Kine mukatoma aka katomeno kontoma amiwa, pakuba kwikala ku kilujo kyami nangwa ku kipiko kyami, kechi kyo kyami kya kupana ne, kyokya bonkaba bo banengezhezhakyo jimo kwi Bataata.”

²⁴ Kabiji baana babwanga bakwabo jikumi pa kwikyumvwa, bebazhingijile aba banabankazhi babiji.

²⁵ Kabiji Yesu wibechile ko aji ne kwibambila amba, “Mwayuka amba, bamfumu ba Bagentila bebobila bantu babo bunkambo, kabiji bakulumpe babo nabo bebobila luusa.

²⁶ Pakuba kechi kiji byonkabyo mwi anweba ne. Bino aye wasaka kwikala mukulumpe wenu, ekale ke wamwingilo wenu;

²⁷ ne aye wasaka kwikala mutanshi pa bonse, ekale ke muzha wenu,

²⁸ byonka byo aishile Mwana Muntu, kechi waishile amba, bamwingijile ne, poso amba ebengijile, ne kupana mweo wanji ke kya kukuula bavula.”

Kubukwa kwa bampofu babiji

²⁹ Kabiji pa kufuma mu Yeliko, jibumba jikatampe ja mulondejilenga.

³⁰ Kabiji ponkapo, bampofu babiji baikajile ku jishinda, pakumvwa amba, Yesu ubena kupita, babijikile amba, “Nkambo betubile lusa! Anweba Mwana Davida!”

³¹ Kabiji jibumba jibakainye amba bazhindamepo. Bino abo kepo bakolomokeshe na kubijika amba, “Nkambo betubile lusa! Anweba Mwana Davida!”

³² Ponkapo Yesu waimene, wibechile amba, “Ikika kyo musaka nemubile?”

³³ Kumvwa abo amba, “Nkambo, twasaka meso etu alabe.”

³⁴ Kabiji Yesu, wibobijile lusa, wibakwachile pa meso abo, kabiji ponkapotu ke balabe, ne kumulondela ke bamulondele.