Mateo 2 - KNTP

Kwiya kwa Bamaana

¹ Kabiji Yesu, byo asemenwe mu Betelema wa mu Yudea mu myaka ya Heloda mfumu, ponkapo Bamaana ba ku musela basolomokele ku Yelusalema

² ne kwipuzha amba, “Lelo uji kwepi wasemwa Mfumu wa Bayudea? Mambo kabangabanga kanji twikamwene ku musela, kyo twaishila na kumupopwela.”

³ Ne Heloda mfumu pakumvwa, waubile kijikila, ne bonse bamu Yelusalema pamo.

⁴ Kabiji pa kwibakonkanya bang'anga bakatampe ne banembeshi, wibepwizhe amba, “Nanchi Kilishitu ukasemwa kwepi?”

⁵ Kepo abo bamukumbwile amba, “Mu Betelema wa mu Yudea, byonka byanembele ngauzhi amba,”

⁶ “Kabiji obewa Betelema wa mu kyalo kya Yuda, kechi wi mucheche wa mu binemanga bya mu Yuda ne. Mambo monka mobe mukafuma mfumu, ye ukekala kafunga wa bantu bami bena Isalela.”

⁷ Ponkapo Heloda wibechile kumbaji aba Bamaana, ne kumvwa waumvwine kine kimye kyo kamwekejilemo kabangabanga.

⁸ Kepo ebatumine ku Betelema amba, “Yainga, kamukebeshai bulongo ao mwana, kabiji pa kumutaana mukambuule, ne amiwa nkayeko nkamupopwele.”

⁹ Ne abo, pa kumumvwa mfumu, baimene kebaye kabiji ne aka kabangabanga, ko bamwene ku musela, ke kebatangijileko, poso byo kafikile pajinga mwana kaimene peulu.

¹⁰ Ponkapo pa kwikamona kabangabanga, basekejile na lusekelo lukatampe lwine!

¹¹ Kabiji pa kutwela mu nzubo bamwene Mwana kasa aji ne inanji Maliya, bamulambijile panshi ne kumupopwela. Ponkapo basolwele nsabo yabo ne kumupa bya bupetu, bya ngolode ne libona ne mola.

¹² Kabiji byo bebajimwine kwi Lesa mu kiloto amba, “Kechi mubwele kwi Heloda ne,” babwelele kwabo mu jishinda jikwabo.

Kunyemena kwa Yosefwa ne Maliya ne Mwana mu Ijipita

¹³ Kabiji byo bafumineko, ponkapo malaika wa Nkambo wamwekele kwi Yosefwa mu kiloto ne kumwambila amba, “Buuka, utwale mwana ne inanji, unyemene mu Ijipita, ukekale monka poso nkakubuule, mambo Heloda ukakeba mwana amba, amwipaye.”

¹⁴ Kabiji byo abuukile waimene bufuku wasendele Mwana ne inanji, ke baye ne kuya ku Ijipita,

¹⁵ waikelenga monka poso byo afwile Heloda. Kufikizha akya kyo a ambile Nkambo mu kanwa ka ngauzhi wanji amba, “Mu Ijipita momo naichile Mwanami.”

Kwipayiwa kwa baana bamu Betelema kwi Heloda

¹⁶ Kepo Heloda, pa kumona byo bamwendelekele ku Bamaana, wabuukile bingi bukaji. Ponkapo wakambiizhe kwibepaya baana ba bacheche bonse ba balume bamu Betelema, ne bamonse mumbaji, ba myaka ibiji, ne bakyangye kufikizha myaka ibiji monka mo aumvwijile mwaka ku Bamaana.

¹⁷ Kepo kyafikile kya ambile Yelemiya, ngauzhi amba,

¹⁸ “Mu Lama mwaumvwanyikile jiwi ja kujila majilo ne mabingo akatampe. Lachela kasa ebajila baana banji, ne kukana kumutekenesha pa muchima, mambo baafwa.”

Kubwela kwa Yosefwa ne Maliya ne Mwana kufuma mu Ijipita

¹⁹ Kabiji byo afwile Heloda, ponkapo malaika wa Nkambo wamwekele mu kiloto kwi Yosefwa mu Ijipita,

²⁰ amba, “Buuka, utwale mwana ne inanji, ubwele mu kyalo kya Isalela, mambo basakilenga kwipaya Mwana baafwa.”

²¹ Ne pa kubuuka wasendele Mwana ne inanji, kubwela mu kyalo kya Isalela.

²² Kabiji pakumvwa amba, Alakeleusa wamuswana shanji Heloda, walama kyalo kya Yudea, wachiine kuyako. Kabiji byo bamujimwine kwi Lesa mu kiloto, wasezhezhe ne kwiya mu kyalo kya Ngalilea

²³ kabiji pa kubwela, waikajile mu muzhi yebatela amba Nazala, kufikizha kya ambile bangauzhi amba, “Bakamutela amba mwina Nazala.”