Mateo 16 - KNTP

Ba Faliseo byo basakile kumona kya kukumya

¹ Kabiji kwaishile Bafaliseo ne Basadusea, kasa bamweseka na kumulomba amba ebamweshe kiyukilo kya mwiulu.

² Kumvwa aye amba, “Umvwe ke mabanga, anweba amba, kesha bukakya bulongo, mambo jiulu jachila.

³ Ne lukeelo amba, leelo kuji mvula, mambo jiulu jachila ne kufinda. Mwayuka kutolela maana ku jiulu, kabiji biyukilo bya ino myaka kechi mwibiyuka ne.

⁴ Kisemi kibi ne kya bukende kikeba kiyukilo. Bino kechi kikapewa kiyukilo ne, poso kiyukilo kya Yona.” Ponkapo wibashiile kaye.

Mbizho ya Bafaliseo ne Basadusea

⁵ Baana banji babwanga byo ba abukijile ku bushiya bwa kizhiba, balubileko kusenda kajo.

⁶ Kepo Yesu ebambijile amba, “Tekanyai, kabiji jimukai ku mbizho ya Bafaliseo ne ya Basadusea.”

⁷ Batatwile kwisamba abo bene na bene amba, “Kechi twasenda shinkwa ne.”

⁸ Kabiji Yesu, pa kwikiyuka, wibambijile amba, “Anweba ba kalwitabilo kacheche, mambo ka o mubena kwisambila anweba bene na mambo a kubula shinkwa!

⁹ Anweba ne pano ponse kuyuka nangwa kuvuluka na boba bashinkwa batanu ne biumbi bitanu bya bantu, ne mitaasa kana yaji inga yo mwatolele?

¹⁰ Nangwa boba bashinkwa batanu na babiji ne biumbi bina bya bantu, ne mitaasa kana yaji inga yo mwatolele?

¹¹ Mambo ka kyo mwakankelwa kuyuka amba, kechi naji kwambang'ana mambo a bashinkwa ne? Jimukai ku mbizho ya Bafaliseo ne Basadusea.”

¹² Ne abo kepo bayukile amba, kechi witwambila amba, jimukai ku mbizho ya bashinkwa ne, poso ku mafunjisho a Bafaliseo ne Basadusea.

Petelo byo asolwele lwitabilo lwanji

¹³ Kabiji Yesu byo aishile mumande a ku Kesalea Filipai, waipwizhe baana banji babwanga amba, “Mwana Muntu bantu bamuteela amba ng'anyi?”

¹⁴ Kumvwa abo amba, “Bamo bamba amba, Yoano Mubatishi, bakwabo nabo amba Elaija, bakwabo nabo amba Yelemiya, nangwa umo wa mu bangauzhi.”

¹⁵ Kumvwa aye wibambijile amba, “Pakuba anweba muntela amba, ng'anyi?”

¹⁶ Kumvwa Shimona Petelo amba, “Anweba mwi Kilishitu, Mwana Lesa mumi.”

¹⁷ Ne Yesu wamwambijile amba, “Mwatokwa anweba ba Shimona mwana Yona! Pakuba kechi buntunshi bwa nyama ne mashi bo bwi musolwelakyo ne, poso Taata uji mwiulu.

¹⁸ Ne amiwa namba, anweba mwi ba Petelo, kabiji pa jonka jino jibwe po nkatunga kipwilo kyami, ne binzhilo bya kalunga kechi bikekishinda ne.

¹⁹ Nkemupa bakii ba bufumu bwa mwiulu; kyo mukakasa pano pantanda ne mwiulu kikakaswa; kabiji kyo mukakasulula pano pantanda ne mwiulu kikakasululwa.”

²⁰ Ponkapo wibafunjile baana banji babwanga amba, kechi babuule muntu nangwa umotu amba uno ye Kilishitu ne.

Yesu waambila jimo mambo a kumanama ne lufu lwanji

²¹ Kufuma pa kyonkakya kimye Yesu watatwile kwibafunjisha baana banji babwanga amba, “Kyamfwainwa amiwa nkaye ku Yelusalema, nkamaname na byamalwa byavula ku bakulumpe ne ku bang'anga bakatampe ne ku banembeshi ne kwipayiwa, kabiji mu juba ja busatu nkasangulwa.”

²² Ponkapo Petelo wamutwajile kumbaji ne kutatula kumukanya amba, “Nkambo, akyo kizhila! Kechi kikemumwekela ne!”

²³ Pakuba aye wa alulukile ne kumwambila Petelo amba, “Fuma kwi amiwa Satana! Mambo obewa milanguluko yobe kechi yaimana pa bintu bya Lesa ne, poso ku bya bantu.”

²⁴ Ponkapo Yesu wibambijile baana banji babwanga amba “Umvwe muntu usaka kundondela, ekane mwine, ashikule musalabu wanji ne kundondela.

²⁵ Mambo awa usaka kupulusha mweo wanji ukamutaya, pakuba awa ukantayila amiwa mweo wanji, ukamumona.

²⁶ Lelo muntu nangwa wanonka ntanda yonse umvwe wataya mweo wanji ukamwenamo ka? Kabiji namba, ikika kyo akapana muntu kya kupimpula na mweo wanji?

²⁷ Mambo Mwana Muntu ukeya mu lukumo lwa ba Shanji na bamalaika banji, po po akafweta muntu yense monka mwayila mingilo yanji.

²⁸ Kine nemubuula namba, po baji bamo baimana pano, bakabula kumona lufu nangwa pacheche ne, poso bakamone Mwana Muntu kasa eya mu bufumu bwanji.”