Mateo 15 - KNTP

Mizhilo ya bashakulu

¹ Kepo Bafaliseo ne banembeshi baishile kwi Yesu bafumine ku Yelusalema amba,

² “Mambo ka baana benu babwanga bazhilulwila mizhilo ya bashakulu? Mambo kechi bowa ku maboko pa kuja kajo ne.”

³ Kumvwa aye amba, “Ne anweba mambo ka mwazhilulwila mukambizho wa Lesa na mambo a mizhilo yenu?

⁴ Mambo aye Lesa wa ambile amba, nemeka bashobe ne bainobe kabiji amba, wambila bya mwenga bashanji nangwa bainanji, wafwainwa kufwa.

⁵ Pakuba anweba amba, umvwe muntu wibambila bashanji nangwa bainanji amba, kya bupe kyo mwaketekela kutambula kwi amiwa, ne kilambula kala kwi Lesa, ponkapo aye wakasuluka ku muzhilo wa kwibanemeka bashanji ne bainanji.

⁶ Mo monka mo mwazhilulwila muzhilo wa Lesa na lufunjisho lwenu.

⁷ Anweba ba kamfutumfutu! Nanchi kine Isaya wimwambijile bulongo amba!”

⁸ “Bano bantu bannemekatu amiwa na byatunwa byabo, pakuba michima yabo iji kwalepa ne amiwa.

⁹ Byatu byo bampopwela, byo bafunjisha mafunjisho a mikambizho ya bantu!”

Bintu bimuzhilulula muntu

¹⁰ Ponkapo Yesu waichile jibumba ne kwibambila amba, “Umvwai ne kukwatakanya!

¹¹ Kitwela pa kanwa kechi kimuzhilulula muntu ne, kana kilupuka mu kanwa, kyo kimuzhilulula muntu.”

¹² Kepo baana babwanga baishile ne kumwambila amba, “Mwayuka amba betuntula Bafaliseo pakumvwa ao mambo nyi?”

¹³ Kumvwa aye amba, “Bintu byonse byabula kujimba Taata wa mwiulu bakebiyokola.”

¹⁴ “Balekai! Bo bantangi ba bupofu. Kabiji umvwe mpofu atangijile mukwabo mpofu, bonse babiji basakuponena mu kimbo.”

¹⁵ Kumvwa aye Petelo amba, “Betulumbulwileko kino kishimpi.”

¹⁶ Kumvwa aye wibambijile amba, “Nanchi ne anweba kechi mwaumvwisha nenyi?

¹⁷ Kechi mwayuka amba, akya kitwela pa kanwa kipitaila monka munda, kabiji kitayiwa kungye nenyi?

¹⁸ Pakuba kilupuka mu kanwa kifuma mu muchima, akya kyo kimuzhilulula muntu.

¹⁹ Mambo mukachi mu michima ya bantu mo mulupuka milanguluko yatama, ne kwipayang'ana, ne bukende, ne bulalelale, ne bwivi, ne bubela, ne bya mwenga.

²⁰ Abino byo bizhilulula muntu. Kabiji kuja kwakubula kowa ku maboko kechi kuzhilulula muntu ne.”

Lwitabilo lwa mwanamukazhi mwina Kenana

²¹ Kabiji Yesu pa kufumako, wayile mumande a ku Tila ne Shidona.

²² Ponkapo mwanamukazhi mwina Kenana wafumine mu kyonkakya kyalo, wabijikizhe amba, “Nkambo, Mwana Davida, bangubileko lusa! Mwanami wamukazhi bamumanyika bingi ku mudemona.”

²³ Pakuba aye kechi wa mukumbwile ne. Ne baana banji babwanga baishile na kumusashijila amba, “Mwambilai, ayenga! Mambo ubena kwitulondela na kubijikizha!”

²⁴ Kepo Yesu a mwambijile amba, “Kechi bantuma ku bonse ne, poso ku mikooko yaeleka ya bena Isalela.”

²⁵ Pakuba aye mwanamukazhi waishile ne kumupopwela amba, “Nkambo nkwashaiko!”

²⁶ Kumvwa Yesu amba, “Mambo kechi kyafwainwa kwangata kajo ka baana ne kwikataya ku bakabwa ne.”

²⁷ Kumvwa aye amba, “Ee Nkambo, nangwa byonkabyo bakabwa baja bukuuku bulakata ku tebulu wa bankambo yabo.”

²⁸ Kepo Yesu wamukumbwile amba, “Obewa mwanamukazhi, lwitabilo lobe lukatampe! Kikubilwe kyo usaka.” Kabiji mwananji wapulukile ponkapo mu kyonkakya kimye.

Kubukwa kwa bantu bavula

²⁹ Kabiji Yesu pa kufumako, wayile ku kizhiba kya Ngalilea. Wakanjijile pa mutumba ne kwikala ponka.

³⁰ Kabiji mabumba akatampe aishile ko aji, baleetele ne balemana maulu, ne bampofu, ne ba kamaama, ne balemana maboko, ne bavula bakwabo, bebatujile ku maulu anji; ne aye wibabukile bonse.

³¹ Ne mabumba akuminye bingi byo bamwene ba kamaama kebambe, balemana maboko nabo ke batuntulu, balemana maulu nabo ke bende, bampofu nabo ke bamone, ponkapo batumbijikile Lesa wa Isalela.

Mambo a kwibajisha bantu biumbi bina

³² Kabiji Yesu wibechile baana banji babwanga ne kwibambila amba, “Nejumvwina lusa jibumba, mambo baikala pamo ne amiwa ke moba asatu, kabiji kechi baji na bya kuja ne. Amiwa kechi nasaka kwibemanya sa baji na nzala ne, kuchiina amba, baakatembukila pa jishinda.”

³³ Baana banji babwanga bamwambijile amba, “Nanchi atweba twikafumye pi kajo kavula ka kujiisha jino jibumba jikatampe muno mungyetu?”

³⁴ Kepo Yesu ebambijile amba, “Muji na bashinkwa banga?” Kumvwa abo amba, “Batanu na babiji, ne tumasabi tumo tucheche.”

³⁵ Ponkapo aye wijikambiizhe jibumba kwikala panshi.

³⁶ Kabiji watambwile bashinkwa batanu na babiji ne tumasabi, ne pa kusanta wibatebawile ne kupana ku baana banji babwanga, ne baana babwanga nabo ke bapane ku mabumba.

³⁷ Kabiji bonse bajiile ne kwikuta. Ne abo baana babwanga batolawile bibese byashajilepo, mitaasa itanu na ibiji yayuula.

³⁸ Abo bajiile bajinga biumbi bina bya baana balume, bya kubula kubikako baana bakazhi ne baana.

³⁹ Kabiji wiemenye mabumba, kaye ne kuya mu bwato, wayile mu ntanda ya Mangadana.