Mateo 14 - KNTP

Lufu lwa Yoano Mubatishi

¹ Mu oa moba mfumu Heloda waumvwine nkuwa ya Yesu.

² Wa ambijile bamwingilo banji amba, “Ao iye Yoano Mubatishi, wasanguka mu bafu, kyo kyo aikeela na buno bulume bubena kwingila mwi aye.”

³ Mambo Heloda wamukwachile Yoano ne kumukasa, wamutayile mu kaleya na mambo Heloda wasongwele Helodiasa muka Filipa mulongo wanji.

⁴ Mambo Yoano wamwambijile amba, “Kizhila anweba kumusongola Helodiasa!”

⁵ Kabiji wasakile kumwipaya, bino wachiine jibumba ja bantu mambo abo bamutelele amba, “Ngauzhi wa Lesa.”

⁶ Kabiji byo jafikile juba joasemekejilwemo Heloda, mwana wakwa Helodiasa, wamukazhi wazhileenga mukachi, ne kumutokesha pa muchima Heloda.

⁷ Ponkapo Heloda wachipile amba, “Kyonka kyo usa kungipuzha nsakukupakyo!”

⁸ Kabiji monka mwamubujiile inanji wa ambile amba, “Bampe mutwe wa kwa Yoano Mubatishi pa muchiba!”

⁹ Ne aye mfumu kyamubile bingi bulanda, bino na mambo onka a kuchipa kwanji, ne na mambo aboba bo aikajile naabo na kuja, wakambiizhe amba, “Kamupai.”

¹⁰ Ponkapo wibatumine na kumuchiba mutwe Yoano monka mu kaleya.

¹¹ Kabiji waletele mutwe wanji pa muchiba, ne kumupa awa kamwale, ne aye wamutwajile kwi inanji.

¹² Ponkapo baana banji babwanga baishile na kusenda mubiji wanji ne kumuzhiika, kabiji bayile na kumubuula Yesu.

Kwibajisha bantu biumbi bitanu

¹³ Kabiji Yesu pa kwikyumvwa wafumineko, kaye mu bwato ne aye watuntukijile mungye mwa bunke bwanji. Ponkapo mabumba a bantu pakumvwa byobyo, bamulondejile ja panshitu bafumine mu mizhi.

¹⁴ Byo afumine mu bwato wamwene jibumba jikatampe, wibobijile lusa, kabiji wibabukile bakolwa.

¹⁵ Ponkapo juba pakufika mabanga, baana banji babwanga baishile ko aji amba, “Muno mungyetu, kabiji bwaila kala, mwibambile bantu baye mu mizhi, bakepotele bene bya kuja.”

¹⁶ Kumvwa Yesu amba, “Kechi kyafwainwa baye ne, yenka anweba mwibape bya kuja.”

¹⁷ Kumvwa baana babwanga amba, “Kuno tujitu na bashinkwa batanu ne masabi abiji.”

¹⁸ Ponkapo aye amba, “Ndetelaibyo kuno.”

¹⁹ Kabiji wakambiizhe mabumba amba, ikalai pa nsono. Ne pa kushikula bashinkwa batanu ne masabi abiji, watajile mwiulu ne kwibipesha. Kepo atebawile bashinkwa ne kupana ku baana banji babwanga, ne baana babwanga nabo ke bapane ku mabumba.

²⁰ Ne bonsetu bajiile, ne kwikuta baikuchile. Kabiji batolawile bibese byashajilepo bilukwa jikumi na bibiji byayula.

²¹ Aba bajiile bajinga kampe biumbi bitanu bya banabalume bya kubula kubikako banabakazhi ne banyike.

Yesu byo a endele pa mema

²² Ponkapo Yesu wa ambijile baana babwanga amba, bakanjile mu bwato babukile ku bushiya, aye kasa akimanya mabumba amba ayenga.

²³ Byo apwishishe kwiemanya mabumba, wakanjijile ku mutumba kwa bunke na kulomba. Ne juba pakufika mabanga, wakijingatu konka bunke bwanji.

²⁴ Kabiji bwato bwafikile pakachi ka kizhiba kufuma ku kitulu, ne manyaki ebakatezhe; mambo lubesha wapupilenga ku bwato.

²⁵ Kabiji mu kilo kya buna kya kumakya Yesu waishilenga ko baji, kasa enda pa mema.

²⁶ Kabiji baana babwanga byo bamumwene kasa enda pa mema, ba akaminwe bingi amba, “Kipuku!” Ke batame miteto na moyo.

²⁷ Ne Yesu wibambijile amba, “Kechi mube moyo ne, ye amiwa bano, kuchiina ne.”

²⁸ Kumvwa Petelo amba, “Nkambo kana ye anweba, ng'ambilai ngiye ko muji kasa ng'enda pa mema.”

²⁹ Kumvwa aye amba, “Iyainga.” Kabiji Petelo wafumine mu bwato, kaende ne pa mema kaye kuji Yesu.

³⁰ Bino byo amwene lubesha kabiji aye ke moyo, watatwile kwibila, ponkapo witamina amba, “Nkambo, mpulushaiko!”

³¹ Ponkapotu Yesu watanyikile kuboko kwanji, ne kumukwata amba, “Anweba ba kalwitabilo kacheche mwazhinaukila ka?”

³² Kabiji byo bakanjijile mu bwato, ponkapo lubesha wikilekele.

³³ Ne abo bajinga mu bwato bamupopwejile amba, “Kine, anweba mwi Mwana Lesa.”

Kubukwa kwa bakolwa mu Ngenesaleta

³⁴ Byo ba abukile ku bushiya, bayile ku ntanda ya Ngenesaleta.

³⁵ Ne banabalume ba konkakwa byo bamuyukile, batumine jiwi monse mu oa mande ne kuleeta bonse bakolwa.

³⁶ Ne kumusashijila amba, bakwatengatu nangwa kunsa ya kivwalo kyanji, kabiji bonse mobavujila bakwachileeko, babukilwe ke batuntulu.