Mateo 12 - KNTP

Mambo a juba ja Sabado

¹ Mu oa moba Yesu wapichile mu majimi mu juba ja Sabado. Kabiji baana banji babwanga bajinga na nzala ne abo batatwile kuchimuna mitwe ya kajo ne kuja.

² Pakuba Bafaliseo pa kwikimona, ba mwambijile amba, “Talai, baana benu babwanga babena kuuba kyazhila mu juba ja Sabado.”

³ Kabiji aye wibambijile amba, “Kechi mwatangilepo byaubile Davida, byo aumvwine nzala, ne abo boajinga naabo nenyi?

⁴ Byo atwelele mu nzubo ya Lesa ne kuja bashinkwa ba ku meso a Lesa, bazhila kujako nangwa aye, nangwa bo ajinga naabo, poso bonka bang'anga?

⁵ Nangwa kechi mwatangilepo nenyi, mu buku wa mizhilo amba, bang'anga baji mu nzubo ya Lesa bazhilulula ja Sabado, kabiji babinga?

⁶ Nanchi nemwambila namba, pano ponka po aji umo wakila nzubo ya Lesa.

⁷ Kabiji umvwe mwajikuyuka mwayila kino amba, nsaka lusa kechi kitapisho ne, umvwe kechi mwaji kwibazhachisha bantu babula mambo ne.

⁸ Ke pakuba Mwana Muntu ye Nkambo wa juba ja Sabado.”

Kubukwa kwa muntu wa kuboko kwapapa

⁹ Kabiji wafumineko, ne kutwela watwelele mu shinagoga yabo,

¹⁰ kabiji mwajinga muntu wa kuboko kwapapa. Ne abo bamwipwizhe amba, “Kyawama kubuka muntu mu juba ja Sabado nyi?” Amba bamone mwa kumushiina.

¹¹ Kumvwa aye wibakumbwile amba, “Lelo kuji ng'anyi mukwenu ukekala na mukooko umo, umvwe waponena mu kiimbo mu juba ja Sabado, ukabula kumukwata ne kumutuntulamo?

¹² Muntu kechi wakila mukooko mu buneme nyi? Nanchi kyo kyawama kuuba byawama muja Sabado.”

¹³ Ponkapo wamwambijile awa muntu amba, “Tanyikai kuboko kwenu.” Ne aye wikutanyikile; ne kuboko kwakosele ke kutuntulu, pamo na kukwabo.

Kalume wasalululwa wa Lesa

¹⁴ Kabiji Bafaliseo, pa kulupukamo, bamwikajiile kije amba, bamone mwa kumonawina.

¹⁵ Kabiji Yesu, byo ekiyukile, wafumineko, ne bavula bamulondejilenga; ne aye wibabukile bonse,

¹⁶ ne kwibakambizha amba, kechi babuule bantu amba ye Mwana Lesa ne.

¹⁷ Kufikizha kya ambile ngauzhi Isaya, amba,

¹⁸ “Talai, wamwingilo wami ye nasalulula, mutemwe wami, moamwena lusekelo muchima wami. Nkabika Mupashi wami pe aye, ne aye ukebabuula Bangentila bunchiba mambo bwaoloka.

¹⁹ Kechi ukapachikanga ne, nangwa kubijikisha ne, kabiji jiwi janji kechi bakejumvwa mu mikwakwa ne.

²⁰ Jitete jafyotoka kechi ukejichimuna ne, nangwa muzhinge ufutumuka kechi ukamuzhima ne. Poso akatume bunchiba mambo bwanji bwaoloka. Mu kushinda byonse,

²¹ ne Bangentila bakaketekela mu jizhina janji.”

Yesu ne Belezebuba

²² Ponkapo baleetele umo kwi aye, muntu wanonkelwe ku mudemona, wajinga mpofu ne kamaama. Ne aye wamubukile kyakuuba kamaama ka ambe ne kwamba, ne kumona kamone.

²³ Kepo mabumba onse akuminye bingi, ne kwipuzha amba, “Lelo uno kechi ye mwana Davida nenyi?”

²⁴ Pakuba Bafaliseo, pa kwikyumvwa, ba ambile amba, “Uno kechi wibapangamotu bademona ne, poso na bulume bwa Belezebuba, mfumu wa bademona.”

²⁵ Kabiji aye, byo ayukile michima yabo mo yayila, wibambijile amba, “Bonse bufumu bwialukila bwine bonaika; kabiji nangwa muzhi nangwa nzubo bialukila bine kechi bikekala ne.

²⁶ Kabiji umvwe Satana apangemo Satana, wialukila mwine; pano bufumu bwanji bukekala byepi?

²⁷ Ne amiwa umvwe mpangamo bademona na bulume bwa Belezebuba, nanchi baana benu bebapangamo na bulume bwa kwa ng'anyi? Onkao mambo kyo kyo basakwikajila ke ba mitonyi benu.

²⁸ Amiwa byo mpangamo bademona na Mupashi wa Lesa, nanchi pano bufumu bwa Lesa bwaiya pe anweba.

²⁹ “Nangwa muntu akakonshe byepi kutwela mu nzubo ya kilobo ne kupukula bintu byanji, poso patanshi wamukasa kilobo, bino akonshe kupukula bya mu nzubo yanji.”

³⁰ “Awa wabula wa kwami, ye mulwanyi wami, kabiji awa wabula kubungizha pamo ne amiwa, ye upalang'anya.

³¹ Byonkabyo nemwambila namba, mambo onse ne mwenga yense bikebalekelwa bantu; pakuba awa umunena mwenga Mupashi kechi akamulekelwa ne.

³² Kabiji awa umunena bibi Mwana Muntu, ukalekelwao, pakuba awa umunena bibi Mupashi Wazhila, kechi ukalekelwao ne, nangwa muyino myaka, nangwa mu myaka ikeya.

Kichi ne bipangwa byakyo

³³ “Wamisha kichi, ne bipangwa byakyo bikawama; nangwa tamisha kichi, ne bipangwa byakyo bikatama; mambo kichi kiyukanyikwa na bipangwa byakyo.

³⁴ Anweba kisaka kya milolo, mukonsha byepi kwamba byawama byo muji babi! Pakuba monka mo byayujila mu muchima ne kanwa kambila monka.

³⁵ Muntu wawama mu bunonshi bwanji bwawama ulupula byawama; kabiji muntu mubi mu bunonshi bwanji bwatama, ulupula byatama.”

³⁶ “Kabiji nemwambila namba, byambo byonse byatu byo ba amba bantu, bakebitotolola mu juba ja kije.

³⁷ Mambo baka kubingisha ku byambo byobe, kabiji ku byonka byambo byobe baka kufwisha nao.”

Byo basakile kiyukilo

³⁸ Ponkapo bamo banembeshi ne Bafaliseo ba mwambijile amba, “Mufunjishi, tusaka kumona kiyukilo kwi anweba.”

³⁹ Kumvwa Yesu amba, “Kisemi kibi ne kya bukende kikeba kiyukilo. Bino kechi kikapewa kiyukilo ne, poso kyonkakya kiyukilo kya Yona, ngauzhi.

⁴⁰ Mambo byonka byajinga Yona moba asatu, mute ne bufuku, munda mwa jisabi jikatampe; byo akooba ne Mwana Muntu ukekala moba asatu, mute ne bufuku, munda mwa mushiji.

⁴¹ Banabalume bena Ninevwa bakemana mukije na kino kisemi, ne kwikizhachisha, mambo abo balapijile pa kusapwila kwa Yona, kabiji talai, wamukila Yona uji ponka pano.

⁴² Kabiji awa mfumu wamukazhi wa ku kabeta ka ku bulenge ukemana mukije na ba mukino kisemi, ne kwikizhachisha, mambo aye wafumine kwapela ntanda kwiya na kumvwa maana akwa Solomone kabiji talai, aye wamukila Solomone uji ponka pano!

Mupashi wabiipa byo abwela

⁴³ “Mupashi wabiipa, byo afuma mu muntu, upitang'ana kwabula mema na kusaka pa kukokolokela, byo abula kwipataana,

⁴⁴ wa amba amba, nanchi nsakubwela monka mu nzubo yami yo nafuminemo kabiji byo aiya, watana kafwamo, mwalambatu myaa, bapyangamo ne kunengezhamo.

⁴⁵ Ponkapo uya nakuletelapo bapashi bakwabo batanu na babiji bamukila mu kubipa, kabiji batwela ne kwikala monka. Ne bwikalo bwapelaako bwa yewa muntu bwakila butanshi mu kubipa. Byo byo kikekala ne kino kisemi kibi.”

Yesu ne balongo banji

⁴⁶ Kabiji byo a kyambilenga na mabumba, ponkapo inanji ne balongo banji baimene pangye na kumukeba amba, bambe nanji.

⁴⁷ Kabiji umo wamwambijile amba, “Umvwai! Bainenu ne balongo benu baimana pangye amba, besambe nenu.”

⁴⁸ Kumvwa aye wamukumbwile amba, “Lelo bamama bo bang'anyi? Ne balongo bami bo bang'anyi?”

⁴⁹ Kabiji pa kutongola ku baana banji babwanga, wibambijile amba, “Talai! Bamama ne balongo bami!

⁵⁰ Mambo aye uba kyaswa muchima wa Taata wa mwiulu, awa ye mulongo wami, ye nyenga yami, kabiji ye mama.”