Mateo 11 - KNTP

¹ Kabiji Yesu byo apwishishe kwibakambizha baana banji babwanga jikumi na babiji, wafumineko wayilenga na kufunjisha ne kusapwila muyoya mizhi.

Baluwe bafumine kwi Yoano

² Aye Yoano pakumvwa mu kaleya mo ajinga mingilo ya Kilishitu, watumineko baana banji babwanga.

³ Bamwipwizhe Yesu amba, “Yenu i ye wasakile kwiya nyi? Inyi tukitengelenga ungi?”

⁴ Kumvwa Yesu wibakumbwile amba, “Yainga, kamubulai Yoano byo mwaumvwa ne byo mwamona;

⁵ bampofu babena kumona, ne balemana ke bende; bambumba babukwa, ne bakishinka matwi ke bomvwe; bafu basangulwa, ne balanda basapwilwa Mambo Awama.

⁶ Kabiji watokwa awa wabula kumona kya kwituntulako mwi amiwa!”

⁷ Bano byo bafumineko, Yesu watatwile kwiambila mabumba na mambo a Yoano amba, “Nanchi mwayile mungye na kumona ka? Jitete jo babena kusunkenya kulubesha nyi?

⁸ Lelo nanchi mwayile na kumona ka? Muntu wavwala bivwalo byawamisha nyi? Talai! Bavwala bivwalo byawamisha bekala mu bipango bya bamfumu.

⁹ Amwai, nanchi mwayile na kumona ka? Na kumona ngauzhi nyi? Ee, kine nemubula namba, aye wakila ngauzhi.

¹⁰ Uno Yoano i ye ye kyanembelwa amba, ‘Tala! Natangizha muluwe wami palutwe yobe, ye ukanengezhezha jimo jishinda palutwe yobe.’

¹¹ Kine nemwambila namba, mu basemwa ku banabakazhi kafwako wakila Yoano Mubatishi ne. Nangwa byonkabyo awa mucheche mu bufumu bwa mwiulu ye wamukila.

¹² Kabiji kufuma ku moba a Yoano Mubatishi ne kufika ku jino juba, bufumu bwa mwiulu bebubila mukoyo, ne bantu bamukoyo bebutambula na lupata.

¹³ Ke pakuba buku wa mizhilo ne bangauzhi ba Lesa bonse baawilenga na Mupashi kufika ne kwi Yoano;

¹⁴ kabiji kana anweba muji na michima ya kwikitambula, uno ye Elaija, walayilwe kwiya.

¹⁵ Awa uji na matwi a kumvwa, omvwe!”

¹⁶ Kabiji Yesu wa ambile amba, “Nanchi, ing'anyi kintu kyo nkapashang'anya na ka kino kisemi? Kyapasha pamo nobe banyike baikala pa bisankanyi, bebeta bakwabo amba,

¹⁷ atweba twimwimbila ng'oma, bino anweba ne kuzha ne! Atweba twajila mabingo, pakuba anweba ne kujila ne!

¹⁸ Mambo Yoano kechi wanangile kuja nangwa kutoma ne, kabiji ba ambile amba, uji na mudemona!

¹⁹ Mwana Muntu aye waiya kasa aja ne kutoma, kabiji bamuneena amba, ‘Talai ye kiji ne kitomi, mulunda wa basonkeshi ne bandengamambo!’ Bino maana beabingisha ku mingilo yao.”

Mizhi ya milengulwila

²⁰ Ponkapo watatwile kwiinena bibi mizhi mo akizhizhe kuuba mingilo yanji ya bulume, mambo kechi balapijile ne amba,

²¹ “Malwa obe, Kolazeni! Malwa obe, Betesaida! Mambo umvwe mingilo ya bulume yaingijilwe mwenu, inge yamwekele mu Tila ne mu Shidona, umvwe balapijile kala ne kuvwala bisapi bya majilo ne kwipukula buto!

²² Amiwa nemwambila namba, mu juba ja kije bya malwa, bya bena Tila ne Shidona bikakepako, kechi bikesakana na byenu ne!

²³ Ne obewa Kapenama! Ukasuntulwa kufika mwiulu nyi? Bakakwikizha panshi! Mambo aya mingilo ya bulume yamwekele mwenu, inge yamwekele mu Sodoma, inge ukijipo ne buji leelo!

²⁴ Kabiji nemwambila namba, mu juba ja kije bya malwa bya kyalo kya Sodoma bikakepako, kechi bikesakana na byenu ne!”

²⁵ Pa kyonkakya kimye Yesu wa ambile amba, “Nemutota anweba Taata, Nkambo wa mwiulu ne wa pano panshi, mambo mwibifiile bino bintu ku bamaana ne ku bamilangwe, ne kwibisolola ku baana ba bacheche.

²⁶ Mo monka Taata, mo kimuwamina anweba bene.”

²⁷ “Bataata bampele amiwa bintu byonse. Kabiji kafwako nangwa umo wamuyuka Mwana byo aji ne, kanatu bonka Bataata, nangwa wayuka Bataata byo baji ne, kana yenka Mwana, ne boba bantu bo aswa Mwana kwibasolwelaye.”

Iyai konji

²⁸ “Iyai konji, anweba bonse basulwila na mingilo ne kunemenwa, ne amiwa nkemukokolosha.

²⁹ Tambulai kikonkoji kyami ne kufunda kwi amiwa; mambo amiwa ne kimote ne wakooka muchima, ne anweba mukamona kukokoloka kwa michima yenu.

³⁰ Mambo kikonkoji kyami kyawama, ne kisendwa kyami kyapeela.”