Mateo 10 - KNTP

¹ Kabiji wibechile baana banji babwanga jikumi na babiji ko aji, ne kwibapa luusa lwa kupangamo bapashi babipa, ne lwa kubuka bikola bya misango yonse ne bulema bwa misango yonse.

Batumwa jikumi ne babiji

² Kabiji mazhina a batumwa jikumi na babiji o ano; mutanshi, Shimona, yebateela ja Petelo, ne Andeleo mulongo wanji, ne Yakoba mwana Zebede, ne Yoano mulongo wanji;

³ ne Filipa, ne Batolomo, ne Tomase, ne Mateo wajinga musonkeshi; ne Yakoba mwana Alefesa, ne Tadeusa,

⁴ ne Shimona (Muzelote), ne Yudasa Isakaliota, yenka wamusolwele Yesu.

Kutumwa kwa bajikumi ne babiji

⁵ Bano ba jikumi na babiji Yesu wibatumine, ne kwibalaya amba, “Kechi muye mu jishinda jaya ku Bangentila ne, nangwa kutwela mu muzhi wa bena Samaliya ne.

⁶ Muye ku mikooko yaeleka ya bena Isalela.

⁷ Kabiji pa kuya, kasa musapwila amba, bufumu bwa mwiulu bwafwenya ke pepi!

⁸ Kabukai bakolwa, kasangulai bafu, kabukai bambumba, kapangaimo bademona mu bantu. Mwatambulatu, panaitu.

⁹ Kechi mwikebele mali nangwa a ngolode, nangwa a siliva, nangwa a mukuba a mu bikwama byenu ne;

¹⁰ nangwa fukuta wa lwendo nangwa mikangyo ibiji, nangwa makwabilo, nangwa mukombo ne. Mambo wamwingilo wafwainwa kajo kanji.

¹¹ “Ne mu mizhi yonse yo mukatwelamo, nangwa mukatampe nangwa mucheche, mukepuzhemo muntu wafwainwa, ye mukekalangako poso mwaimana ke lwendo.

¹² Pa kutwela mu nzubo bemunai.

¹³ Kabiji umvwe nzubo yafwainwa, kibusa kyenu kikale monka, kabiji umvwe yabula kufwainwa, kibusa kyenu kikemubwelele.

¹⁴ Kabiji wabula kwimutambula, ne kumvwa byambo byenu ne, pa kulupuka mu yoya nzubo, nangwa mu yewa muzhi, kakuntai lukungu lwa ku maulu enu.

¹⁵ Kine nemwambila namba, mu juba ja kije bya malwa bya kyalo kya Sodoma ne Gomola bikakepako kechi bikesakana na bya yewa muzhi ne!”

Bya lumanamo bibena kwiya

¹⁶ “Talai! Nemutuma pamo nobe mikooko mu misuka. Byonkabyo mwikale bajimuka pamo nobe milolo, ne kukooka pamo nobe ba nkunda.

¹⁷ Kabiji jimukai na bantu, mambo bakemufikizha ku bije, ne kwimututaula mu mashinagoga.

¹⁸ Kine bakemuleeta ku bene bandamakyalo ne ku bamfumu na mambo a amiwa, kikekala ke mwa kwibasapwila ne ku Bangentila pamo.

¹⁹ Kabiji byo bakemufikizha konka, kechi mukabambishishe jimo michima yenu amba, tusakukaamba amba ka, nangwa amba, tusakukaamba byepi ne; mambo kikemupewa mu kyonkakya kimye kyo mukamba.

²⁰ Mambo kechi anweba mukamba ne, poso Mupashi wa Shenu ye ukambanga mwi anweba.”

²¹ “Mambo muntu ukafikizha mulongo wanji ku lufu; ne shanji naye ukasolola mwananji; ne baana nabo bakebabuukila bebasema ne kwibepayisha.

²² Kabiji bakemushikwa ku bantu bonse pa jizhina jami. Bino awa ukakoselamo kufika ne kumpelo, ye ukapuluka.

²³ Kabiji pa kukemupata mu muzhi umo, mukanyemene ku muzhi mukwabo, mambo kine nemwambila namba, kechi mukakumbanye mizhi yonse ya Isalela Mwana Muntu kasa akyangye kwiya ne.

²⁴ “Awa ufunda kechi wakila yewa umufunjisha ne, nangwa muzha kechi wakila nkambo yanji ne.

²⁵ Kyamuwamina awa ye bafunjisha kufika pa kipimo kya yewa umufunjisha, ne muzha naye afike pamo nobe nkambo yanji. Umvwe bamunenene mwina nzubo amba Belezebuba, kechi bakakizhepo kwibanena ba munzubo yanji nenyi?

Wafwainwa kubilwa moyo

²⁶ “Byonkabyo kwibachiina abo ne. Mambo kapaji kyo bazhikapo, kikabula kusololwa ne; nangwa kyafyamika, kikabulwa kuyukanyikwa ne.

²⁷ Kyonemubula mu mfishi mwikyambe pa mute; kabiji kyo mumvwa mu kutwi, mwikitayile mbila pa mutenge.

²⁸ Abo bepaya mubiji ne kukankalwa kwipaya mweo kwibachiina ne; muchiinai aye wakonsha konauna mubiji ne mweo pamo mu Ngehena.

²⁹ Nanchi tung'onyi tubiji kechi bapota na ka jali kamo nenyi? Kafwako nangwa kamo kakapona panshi kwakubula kuyuuka Shenu ne.

³⁰ Kabiji ne nsuki yenu yonse ya ku mitwe beibala.

³¹ Byonkabyo kechi mube moyo ne; mambo mwanema kukila tung'onyi twavula.”

Kumwitaba Kilishitu

³² “Byonkabyo awa ukangitabila ku meso a bantu, ne amiwa nkamwitaba ku meso a Taata wa mwiulu.

³³ Kabiji awa ukankana ku meso a bantu ne aye naye amiwa nkamukaana ku meso a Taata wa mwiulu.”

Kechi mutende ne, mpoko

³⁴ “Kechi mulanguluke amba, naiya kuleeta mutende pano pantanda ne. Kechi naiya kuleeta mutende ne, poso mpoko.

³⁵ Ke pakuba naiya kwabanya muntu ne shanji, mwana wamukazhi naye ne inanji, mulokazhi naye ne inanjivyala;

³⁶ kabiji balwanyi bamuntu bakekala ba mukisemi kyanji mwine.

³⁷ “Watemwisha bashanji ne bainanji kukila byo antemwa amiwa kechi wamfwainwa ne; kabiji watemwisha mwananji wamulume nangwa wamukazhi kukila byo antemwa amiwa, kechi wamfwainwa ne.

³⁸ Kabiji wabula kushikula musalabu wanji ne kundondela, kechi wamfwainwa ne.

³⁹ Awa usaka kupulusha mweo wanji ukamutaya; kabiji awa utaya mweo wanji pe amiwa ukamumona.”

Mfweto

⁴⁰ “Awa wimutambula anweba untambula ne amiwa; kabiji untambula amiwa, umutambula ne aye wantuma.

⁴¹ Awa utambula ngauzhi wa Lesa mu jizhina ja ngauzhi, ukatambula mfweto ya ngauzhi wa Lesa. Kabiji utambula muntu waoloka na mambo a kuuba amba, ye waoloka, ukatambula mfweto ya waoloka.

⁴² Kabiji awa ukapana nangwa tumematu twa munyango, mu jizhina ja mwana wabwanga, ku kamo ka tuno twana tucheche, amba katome, kine nemwambila namba, kechi akabulwe kutambula mfweto yanji nangwa pachechetu ne.”