Mako 7 - KNTP

Bisho bya bashakulu

¹ Kabiji byo bapwijile ko aji Bafaliseo ne bamo banembeshi bafumine ku Yelusalema,

² abo bamwene bamo baana banji babwanga sa baja na maboko a zhilululwa, ko kuba amba, kwakubula kowa ku maboko.

³ (Pakuba Bafaliseo, ne bonse Bayudea, kechi baja kwa kubula kowa ku maboko ne, mambo a kulama kisemwa kya bashakulu babo,

⁴ pa kufuma ku kisankanyi kechi baja ne, poso patanshi baowa. Ne kuuba bintu bikwabo bya kishakulu, byo balondela, bya kovwa tutomeno ne mapuki ne bijiilo bya mukuba ne pobekala pa kuja).

⁵ Kabiji Bafaliseo ne banembeshi ba mwipwizhe amba, “Mambo ka baana benu babwanga kechi balama mizhilo ya bashakulu ne, byo baja kwakubula kowa ku maboko?”

⁶ Kumvwa aye wibakumbwile amba, “Isaya wimwambijile bulongo anweba ba kamfutumfutu amba! “‘Bano bantu bannemekatu amiwa na byatunwa byabo, pakuba michima yabo iji kwalepa ne amiwa.

⁷ Ke kyatutu abo kumpopwela amiwa, mambo bafunjisha kisemwa kya bantu!’

⁸ “Mwaleka mukambizho wa Lesa, bino mwalamako bya kisemwa kya bantu.”

⁹ Kabiji wibambijile amba, “Muji na jishinda jawama ja kulengulwilamo mukambizho wa Lesa pakuba amba, mulame kisemwa kyenu!

¹⁰ Mambo Mosesa wakambiizhe amba, unemeke bashobe ne bainobe, kabiji amba, wambila bashanji nangwa bainanji bya mwenga wafwainwa kufwa.

¹¹ Pakuba anweba amba, umvwe muntu wibambila bashanji nangwa bainanji amba kya bupe kyo mwaketekela kutambula kwi amiwa, ‘Kobana’ (kyalumbulula amba, kyapanwa kala kwi Lesa),

¹² anweba kechi mwamuswisha kukwasha bashanji nangwa bainanji ne.

¹³ Byonkabyo mwaalula mambo a Lesa ke atu na kisemwa kyenu kyo mufikizha ku bantu. Ne anweba muba ne bikwabo byavula bya byonkabye.”

Bintu bimuzhilulula muntu

¹⁴ Ponkapo Yesu waichile jibumba ko aji ne kwibambila amba, “Ng'umvwai anweba bonse, mumvwishe.

¹⁵ Kafwako kintu kya pangye ya muntu kitwela munda kyayuka kumuzhilulula ne, pakuba akya kilupuka mukachi ka muchima kyo kimuzhilulula muntu.”

¹⁶ Kana muntu uji na matwi omvwe.

¹⁷ Byo atwelele mu nzubo kufuma ku jibumba, baana banji babwanga bamwipwizhe na mambo a kino kishimpi.

¹⁸ Kumvwa aye wibambijile amba, “Nanchi ne anweba kechi mwaumvwisha nenyi? Kechi mwayuka amba, akya kya pangye kitwela munda ya muntu kechi kyayuka kumuzhilulula ne,

¹⁹ mambo kechi kitwela mu muchima wanji ne poso mundatu, kabiji kitayiwa kungye?” (Byo a ambile bino wazhilulwile kajo konse.)

²⁰ Kabiji aye wa ambile amba, “Akya kilupuka mu muntu kyo kimuzhilulula muntu.

²¹ Mambo mukachi, mu michima ya bantu mo mulupuka milanguluko yatama, bulalelale, ne bwivi ne kwipayang'ana, ne bukende,

²² ne bya lunkumbwa, ne bubipisho, ne bujimbijimbi, ne bya bunya, ne kichima, ne bubela, ne bwitote, ne ku kosama.

²³ Bino bintu byonse byatama bilupuka mukachi, byo bizhilulula muntu.”

Lwitabilo lwa mwanamukazhi mwina Sailofenisha

²⁴ Kabiji wafumineko ne kuya ku ntanda ya kwipi na Tila Ne Shidona. Ne byo atwelele mu nzubo kechi wasakile muntu nangwa umo kuyuka ne, nangwa byonkabyo kechi wakonsheshe kwifya ne.

²⁵ Bino ponkapo mwanamukazhi wajinga na mwana mucheche wajinga na mupashi wabiipa pakumvwa, waishile na kuponena ku maulu anji.

²⁶ Aye mwanamukazhi wajinga mugiliki mwina Sailofenisha. Ne aye wamusashijile amba, bamupangemo demona mu mwananji.

²⁷ Kumvwa Yesu wamwambijile amba, “Lekai patanshi baana baje. Mambo kechi kyafwainwa kwangata kajo ka baana ne kwikataya ku bakabwa ne.”

²⁸ Pakuba aye wamukumbwile amba, “Ee Nkambo, ne bakabwa nabo baji munshi ya tebulu baja bukuuku bulakata pa kuja baana.”

²⁹ Kumvwa aye wamwambijile amba, “Na mambo a kino kyambo yanga, mudemona wafumamo kala mu mwanobe.”

³⁰ Ponkapo wayile ku nzubo yanji ne kutaana mwana sa alaala pa mwanya ne mudemona sa afumamo kala.

Kubukwa kwa muntu washinka matwi wajinga na kantabula

³¹ Kabiji wafumineko ku ntanda ya kwipi na Tila ne kupichila mu Shidona kuya ku kizhiba kya Ngalilea, kupichila mu kibunji kya mu Ndekapolisa.

³² Kabiji bamuletejile muntu umo washinka matwi wajinga na kantabula, bamusashijile amba amubiike maboko.

³³ Ne aye wamutwajile kwapela jibumba bunke bwanji, watwezhezhe minwe yanji mu matwi anji byo ashipile mate wamukwachile pa lujimi.

³⁴ Ponkapo watajile mwiulu ne kwikizha kyefu, ne kumwambila amba, “Efafata,” Kokuuba amba, “ashinkuke!”

³⁵ Ponkapotu matwi anji ashinkukile, ne kantabula ka lujimi wanji kachibikile, ne kwamba ka ambe bulongo.

³⁶ Kabiji Yesu wibakainye amba kechi babuule muntu nangwa umo ne, pakuba byo atwajijile na kwibakanya, ne abo bakoselekotu na kwikisampwishatu.

³⁷ Ne abo bakijishetu mu kukumya amba, “Wauba byonse bulongo! Walenga bashinka matwi kumvwa, ne ba kamaama kebambe.”