Mako 6 - KNTP

Yesu byo bamulengulwile ku Nazala

¹ Aye wafumineko kabiji wayile ku muzhi wanji, ne baana banji babwanga bamulondejile.

² Ne byo jafikile juba ja Sabado watatwile kufunjisha mu shinagoga. Ne bavula pa kumumvwa bakuminye bingi ne kwipuzha amba, “Lelo bino bintu wibifumya pi? Kabiji wapewa byepi ano maana? Ne ino mingilo ya bulume yoabena kwingila na maboko anji yayila muka?

³ Nanchi uno kechi ye sendwe wa mbao, mwana Maliya, koloja ba Yakoba, ne Yosesa, ne Yudasa, ne Shimona? Ne banyenga yanji ke tuji naabo monka muno nenyi? Kabiji betuntwile na mambo a aye.”

⁴ Kumvwa Yesu wibambijile amba, “Ngauzhi kechi wabulwa buneme ne, poso monka mu muzhi wanji, ne mu balongo banji, ne mu nzubo yanji.”

⁵ Kabiji akwa kechi wakonsheshe kuuba mwingilo wa bulume ne, poso kubika maboko anji pa bamo bakolwa ne kwibabuka.

⁶ Ne aye wa kuminye, mambo a milengulwila yabo. Kabiji wapitang'enenga mu mizhi yonse na kufunjisha.

Yesu byo atumine baana babwanga jikumi ne babiji

⁷ Ponkapo wibechile ba jikumi ne babiji, ne kwibatuma babiji, babiji. Kabiji wibapele luusa pa bapashi babipa

⁸ kabiji wi bakayinye amba, “Kusenda nangwa kimo pa lwendo ne, poso mukombo yenka, nangwa kusenda shinkwa ne, nangwa fukuta ne, nangwa mali mu bikwama byenu ne.

⁹ Pakuba mukavwale makwabilo, kechi muvwale minkukumba ibiji ne.”

¹⁰ Kabiji wibambijile amba, “Monse mu nzubo mo mukatwela mukekale monka poso byo mukafuma mu yewa muzhi.

¹¹ Kabiji konse konse ko bakabula kwimutambula, nangwa kwimumvwa, mukafumeko kabiji mukakunte lukungu lwa ku maulu enu, kya kwibashiina.”

¹² Ponkapo bayile na kusapwila amba, bantu balapile.

¹³ Kabiji bapangile bademona bavula mu bantu, ne kwibashinga manyi bavula bakolwa ne kwibabuka.

Lufu lwa Yoano Mubatishi

¹⁴ Ne mfumu Heloda wikyumvwine, mambo jizhina ja Yesu jakumbene konse. Bamo ba ambile amba, “Yoano Mubatishi wasanguka mu bafu, kyo kyo aikeela na buno bulume bubena kwingila mwi aye.”

¹⁵ Pakuba bakwabo ba ambile amba, “Ye Elaija.” Kabiji bakwabo ba ambile amba, ye ngauzhi, byonka byajinga bangauzhi bakala.

¹⁶ Pakuba Heloda byo aumvwine wa ambile amba, “Ye Yoano Mubatishi ye natapile wasanguka.”

¹⁷ Mambo Heloda mwine watumine miluwe amba bamukwate Yoano, kabiji wamukashile mu kaleya. Mambo Heloda wasongwele Helodiasa muka Filipa mulongo wanji.

¹⁸ Mambo Yoano wamwambijile Heloda amba, “Kizhila anweba kusongola muka mulongo wenu.”

¹⁹ Kabiji Helodiasa wamubijile mfika, kabiji wasakile kumwipaya, bino wakankelwe.

²⁰ Aye Heloda wamuchiinenga Yoano, byo ayukile amba wajinga muntu waoloka ne wazhila, wa mulamine bulongo. Kabiji Heloda watemenwe kuteleka byambo bya kwa Yoano na lusekelo nangwa wakatazhiwe bingi mu muchima wanji, pa kumumvwa.

²¹ Bino pa juba ja kusemwa kwanji Heloda, Helodiasa wamwene jishuko. Heloda watekele kijiilo kya ba bilolo banji, ne bakulumpe ba nzhita, ne bakulumpe bamu Ngalilea.

²² Kabiji mwana wamukazhi wa kwa Helodiasa byo atwelele na kuzha, ne kumutokesha pa muchima Heloda ne benyi banji. Ne mfumu wamwambijile awa kamwale amba, “Ndombe byonse byo usaka, ne amiwa nsakukupa.”

²³ Kabiji wachipile amba “Byonse byo usa kundomba, nsa kukakupa kufika ku lubaji lumo lwa bufumu bwami.”

²⁴ Ne aye walupukile ne kwipuzha bainanji amba, “Lelo ikika kyonsa kulomba?” Kumvwa aye amba, “Mutwe wa kwa Yoano Mubatishi.”

²⁵ Ponkapotu watwelele lubilo mwi mfumu, ne kwamba amba, “Bampe ponka pano mutwe wa Yoano Mubatishi pa muchiba”

²⁶ Ne mfumu kyamubile bingi bulanda, byonkabyo kechi wakaine kumupa mutwe wakwa Yoano ne, mambo a luchipo ne boba bo aikajile naabo ku tebulu.

²⁷ Ponkapotu mfumu watumine mushilikale wa mu bakalama banji ne kumukambizha amba, a kalete mutwe wakwa Yoano. Kabiji wayile na kumuchiba mutwe monka mu kaleya,

²⁸ kabiji waletele mutwe wanji pa muchiba ne kumupa awa kamwale, ne aye wapaine kwi inanji.

²⁹ Kabiji baana banji babwanga byo baumvwine, baishile na kusenda mubiji wanji ne kumuzhiika mu kilende.

Yesu byo a jishishe bantu biumbi bitanu

³⁰ Kabiji batumwa byo bepwizhizhe pamo konka kwi Yesu, bamubujile byonse byo baubilenga ne byo bafunjishenga.

³¹ Kabiji aye wibambijile amba, “Twayai kwa bunke bwetu mukokoloke.” Mambo kwajinga bantu bavula baishilenga ne kuya, kabiji bakankelwe ne kimye kya kuja.

³² Kabiji bayile na bwato kwa bunke bwabo.

³³ Bino bavula bebamwene byo bayilenga, kabiji bebayukile, ne abo bonse bapichile lubilo kungye kuya konka, bafumine mu mizhi yonse, kabiji bafikile bukiji Yesu ne baana banji babwanga kasa bakyangye kufika.

³⁴ Ne aye pa kutuntuka wamwene jibumba jikatampe, wibobijile lusa, mambo bajinga pamo nobe mikooko yabula kafunga. Ponkapo watatwile kwibafunjisha byavula.

³⁵ Kabiji juba byo jaji pepi kuzhika, baana banji babwanga baishile ko aji amba, “Muno mungyetu kabiji bwaila kala.

³⁶ Mwibambile bantu baye mu majimi ne mu mizhi iji kwipi, bakepotele bene bya kuja.”

³⁷ Bino aye wibakumbwile amba, “Yenka anweba mwibape bya kuja baje.” Kumvwa abo amba, “Tuye tukapote bashinkwa naba ndenali bitoota bibiji twibape baje nyi?”

³⁸ Kumvwa aye amba, “Nanchi bashinkwa bo muji naabo, baji banga? Kamonai.” Kabiji byo bayukile bamubujile amba “Baji batanu ne masabi abiji.”

³⁹ Kabiji aye wibakambizhe amba, ikalai panshi mu bilumbiji, bilumbiji pa nsono ya munyemvu.

⁴⁰ Ponkapo baikele mu bilumbiji bya bitoota, ne bya makumi atanu, atanu.

⁴¹ Ne aye watambwile bashinkwa batanu ne masabi abiji, ne pakutala mwiulu wapesheshe, kabiji watebawile bashinkwa, ne kupana ku baana banji babwanga amba, bapane ku bantu, kabiji ne masabi abiji nao wibabenye bonse.

⁴² Kabiji bajiile bonse ne kwikuta.

⁴³ Kepo batolawile bilukwa byayula bibese, jikumi na bibiji ne masabi pamo.

⁴⁴ Bantu bajiile bashinkwa bajinga biumbi bitanu bya banabalume.

Yesu byo a endele pa mema

⁴⁵ Ponkapo Yesu wa ambijile baana banji babwanga amba, bakanjile mu bwato, babukile ku bushiya batangilepo ku Betesaida, aye mwine washajile na kwimanya mabumba.

⁴⁶ Ne pa kwabana naabo, wayile ku mutumba na kulomba.

⁴⁷ Kabiji byo jafikile ke mabanga, bwato bwafikile pakachi ka kizhiba, aye Yesu kasa aji kumutunta bunke bwanji.

⁴⁸ Kabiji byo ebamwene amba bakatazhiwa pa kuvuwa bwato mambo mwela wibakatezhe, pepi mu kilo kya buna kya kumakya aye waishile kwi abo kasa enda pa mema. Kabiji washi ake bapitaile,

⁴⁹ pakuba abo byo bamumwene kasa enda pa mema, balangulukile amba, kipuku, ne kwitamina miteto.

⁵⁰ Mambo bonse bamumwene ne michima yabo keilukute. Ponkapotu Yesu wibambijile amba, “Kechi mube moyo ne, ye amiwa bano. Kuchiina ne!”

⁵¹ Ponkapo wakanjijile mu bwato mo bajinga, ne luvula lwalekele ne abo bakuminye bingi mu michima yabo,

⁵² mambo kechi bayukile mwayijile kuvuzha kwa banshikwa ne, mambo michima yabo yakosele.

Kubukwa kwa bakolwa mu Ngenesaleta

⁵³ Byo ba abukile ku bushiya bayile ku ntanda ya Ngenesaleta, kabiji bakashile bwato ku kitulu.

⁵⁴ Ne pa kufuma mu bwato, ponkapotu bantu bamuyukile,

⁵⁵ kabiji bayile lubilo monse mumande aji kwipi, ne kusenda bakolwa pa makila, ne kwibatwala ko bamumvwine amba, koko aji.

⁵⁶ Ne monse mo atwelele mu mizhi icheche ne ikatampe, ne mu majimi, batujilenga bakolwa pa bisankanyi, ne kumusashijila amba, bakwatengatu nangwa kunsa ya kivwalo kyanji; kabiji bonse mobavujila bakwachileeko babukilwe ke batuntulu.