Mako 5 - KNTP

Kubukwa kwa mwina Ngalasene wanonkelwe ku bademona

¹ Kabiji bafikile ku bushiya bwa kizhiba, mu ntanda ya Ngalasene.

² Byo afumine mu bwato ponkapotu kwamusambakene muntu wafumine ku bilende wajinga na mupashi wabiipa

³ ao muntu waikelenga ku bilende kabiji kafwako wakonsheshe kumukasa nangwa na munyololo ne;

⁴ mambo bamukashile javula na mashimbi a ku maulu ne minyololo, aya minyololo wiichibawilenga, ne mashimbi a ku maulu wiamokawilenga. Kabiji kafwako muntu wajinga na ngovu ya kumufwomona ne.

⁵ Bufuku ne mute wapitang'ananga mu bilende ne mu mitumba kasa abijika ne kwichibaula na mabwe.

⁶ Byo a mumwene Yesu kasa aji kwalepa, wamunyemejile ne kumupopwela,

⁷ ne kubijika na jiwi jikatampe amba, “Lelo nanchi, ikika kyo musaka kwi amiwa, Yesu Mwana Lesa Mwine Wakila? Nemulomba kwi Lesa namba kummanyika amiwa ne.”

⁸ Wa ambile byo byo mambo Yesu wa ambile amba, “Fuma mu muntu, obewa mupashi wabiipa!”

⁹ Ne Yesu wamwipwizhe amba, “Jizhina jobe wi ng'anyi?” Kumvwa aye amba, “Jizhina jami ne nzhita, mambo twavula!”

¹⁰ Kabiji wamusashijile javula amba kechi mwitupange muno mu ntanda ne.

¹¹ Bino ku mutumba kwajinga ne jitanga jikatampe ja bankumba kasa baja.

¹² Ponkapo bamusashijile amba, mwitutume tukatwele mu bankumba.

¹³ Ne Yesu waswile, ne abo bapashi babipa bafuminemo, bakatwelele mu bankumba. Ne jitanga jonse, jaji pepi biumbi bibiji, jakunkulukile mukolo lubilo, ne kuloba mu kalunga.

¹⁴ Ne bajishishenga bankumba banyemene bakabulang'ene mu muzhi ne mu majimi. Ne bantu baishile na kumona akya kyamwekele.

¹⁵ Kabiji baishile kwi Yesu ne kumona awa muntu wanonkelwe kala na nzhita ya bademona. Kasa aikala konka kasa avwala, ne muchima wanji kasa alubuluka bulongo, kabiji abo baubile moyo.

¹⁶ Ne abo bekimwene bebabujile byaubiwe kuyewa muntu wanonkelwe na bademona, ne mambo a ba nkumba.

¹⁷ Kabiji batatwile kumusashijila amba afume mu ntanda yabo.

¹⁸ Ne Yesu byo asakile kukanjila mu bwato, ne muntu wajinga na bademona, wamusashijile amba, “Ngyenga nenu!”

¹⁹ Pakuba Yesu kechi waswile ne wamwambijile amba, “Yanga kwenu ku balongo bobe, ukebabule abya bintu bikatampe byo a kuubila Nkambo, ne byo a kuubila lusa.”

²⁰ Ponkapo wayile ne kutatula kutaya mbila mu Ndekapolisa abya bintu bikatampe byo amubijile Yesu, ne bonse bakuminye.

Mwana Yelusa ne kubukwa kwa mwanamukazhi wakwachile ku kivwalo kya Yesu

²¹ Kabiji Yesu wa abukijile jibiji ku bushiya na bwato. Ne bantu bavula bamupwijile sa aji kwipi na kizhiba.

²² Ponkapo kwaishile ne umo mukulumpe wa shinagoga, jizhina janji Yelusa, ne aye pa kumumona Yesu waponene panshi ku maulu anji,

²³ ne kumusashijila bingi amba, “kaana kami kakazhi kaji pepi na kufwa, mwiye mwikabike maboko enu kapuluke kamone bumi!”

²⁴ Ne aye wayile nanji. Ne jibumba jikatampe ja mulondejilenga kasa ja mubumba.

²⁵ Kabiji kwajinga mwanamukazhi wajinga na kikola kya kupita mashi myaka jikumi na ibiji,

²⁶ kabiji wamwene bya malwa byavula kufuma ku bashayuka ba michi bavula, aye watayile bintu byanji byonse byo ajinga nabyo, bino kikola kyanji kyaijilengakotu palutwe.

²⁷ Byo aumvwine nkuwa ya Yesu, waishile kunyuma yanji mu jibumba ne kukwata ku kivwalo kya Yesu.

²⁸ Mambo wa ambile amba, “Inge nakwatatu nangwa ku kivwalo kyanji nsa kubukwa.”

²⁹ Kabiji ponkapotu ne mashi alekele kupita, kabiji waumvwine mu mubiji wanji amba wabukiwa ku kikola kyanji.

³⁰ Ponkapo Yesu wayukile amba bulume bwandupuka, onkao mambo waalulukile mu jibumba ne kwipuzha amba, “Ng'anyi wakwata ku bivwalo byami?”

³¹ Kabiji baana banji babwanga bamukumbwile amba, “Mwamona bantu byo bemubumba, mambo ka kyo mwaipwizha amba wimukwata ng'anyi?”

³² Bino Yesu watajile konse konse amba amone wikyuba kino kintu.

³³ Pakuba mwanamukazhi waubile moyo ne kuzakama pakuyuka akya kyamubilwa, waishile ne kupona panshi mu kyenyi kyanji, ne kumubula byonse bya kine.

³⁴ Ne aye wamwambijile amba, “Mwanami lwitabilo lobe lwa kupulusha. Yanga mu mutende, ne kubukiwa ku kikola kyobe.”

³⁵ Bino Yesu byo akyambilenga bino, kwaishile bafumine ku nzubo ya mukulumpe wa shinagoga, amba “Mwanenu wafwa. Mambo ka kumukatazha Mufunjishi ne pano?”

³⁶ Kabiji Yesu pakumvwa byo ba ambile, wamwambijile mukulumpe wa shinagoga amba, “Kuuba moyo ne, itabilaitu.”

³⁷ Kabiji kechi waswishishe nangwa umo kumulondela ne, posotu Petelo ne Yakoba ne Yoano mulongo wanji.

³⁸ Bafikile ku nzubo ya mukulumpe wa shinagoga, wataine kiwowo, bantu kasa bajila mabingo ne kuwowakana.

³⁹ Byo atwelele wibambijile amba, “Mambo ka kyo mubena kuwowakena na kujila? Mwana kechi wafwa ne walaalatu mutulo.”

⁴⁰ Ponkapo abo bamusekelenga ne kumwendeleka. Pakuba aye wibalupwile bonse pangye wasendelekotu shanja mwana ne inanji ne bo ajinga naabo ne kutwela mwajinga mwana.

⁴¹ Ne pa kumukwata pa kuboko wamwambijile amba, “Talifa kumi!” Kyalumbulula amba, “Kashimbi, na kwambila namba, buuka.”

⁴² Ponkapotu kashimbi wabuukile ne kwenda kaende (myaka yanji yajinga jikumi jimo ne ibiji). Kabiji ponkapotu bakuminye bingi na kukumya kukatampe.

⁴³ Bino aye wibakainye pakatampe amba, “Kafwako wafwainwa kwikiyuka kino ne.” Ne aye wibambijile amba, “Mupai kajo aje.”