Mako 4 - KNTP

Kishimpi kya njimi wakushilenga nkunwa

¹ Ne aye watatwile jibiji kufunjisha kunsa ya kizhiba. Kabiji kwamupwijile jibumba jikatampe bingi kepo a kanjijile mu bwato ne kwikala monka pa mema, kabiji jibumba jonse jajinga kumutunta kunsa ya kizhiba.

² Ne aye wibafunjishenga bintu byavula mu bishimpi, ne mu kufunjisha kwanji aye wibambijile amba.

³ “Umvwai! Njimi walupukile na kukusa nkunwa.

⁴ Kabiji byo a kushilenga nkunwa, imo yaponejile mu jishinda, ne bang'onyi baishile ne kwiija.

⁵ Ne nkunwa ikwabo yaponejile pa kibangabwe, pabula kuzhika mushiji. Ne kumena yamenene, mambo kechi pajinga mushiji wazhika ne,

⁶ kabiji pa kusaama juba yasokelwe, na mambo a kubula kwikizha mizhazhi, yaumine.

⁷ Ne nkunwa ikwabo yaponejile mu miba, kabiji miba pa kukoma yatatankenye nkunwa, ya kankelwe ne kusema.

⁸ Ne nkunwa ikwabo yaponejile mu mushiji wawama ne kusema yasemenenga kasa ikoma ne kuya na kuvula, imo yasemene makumi asatu ne ikwabo makumi atanu na jimo ne ikwabo kitoota kimo.”

⁹ Ne aye wibambijile amba, “Awa uji na matwi a kumvwa omvwe.”

Mambo ene a bishimpi

¹⁰ Kabiji Yesu byo aikajile bunke bwanji, abo bajinga kwipi ne aye ne ba jikumi na babiji, ba mwipwizhe mwayila byobya bishimpi.

¹¹ Ne aye wibambijile amba, “Kwi anweba kimupewa kuyuka akya kyafyamika kya bufumu bwa Lesa, pakuba kwi abo baji pangye byonse biji mu bishimpi,

¹² namba, “‘Kumona bamone, bino kumwesha ne. Ne kumvwa bomvwe, bino kukwatankanya ne. Kuchiina amba, bakalulukila kwi Lesa, ne mambo abo akalekelwa.’”

Yesu wibalumbulwila kishimpi kya wakushilenga nkunwa

¹³ Ne Yesu wibepwizhe amba, “Nanchi anweba kechi mwikiyuka kino kishimpi nenyi? Kabiji mukayuka byepi bishimpi byonse?

¹⁴ Njimi ukusa nkunwa ya mambo a Lesa.

¹⁵ Nkunwa yakushiwa mu jishinda bo bo bano, pa kwiomvwa Satana wiya ponkapotu, ne kwangata mambo akushiwa mwi abo.

¹⁶ Kabiji bano pamo byonkabyo bo boba bakushiwa nkunwa ya pa kibangabwe. Abo pa kwiomvwa mambo ponkapo be asekelela.

¹⁷ Nanchi byo babula mizhazhi mwi abo bene, bakoselamo kakimye kacheche, kabiji pakumweka bya malwa nangwa bya kupatwa na mambo a ano mambo, ponkapo betuntula.

¹⁸ Kabiji ne bakwabo bo boba bakushiwa nkunwa ya mu miba. Bano bo boba bomvwa mambo,

¹⁹ bino bya kusakasaka bya pano pantanda ne bya bujimbijimbi bwa bunonshi, ne kusakasaka kwa bintu bikwabo, pa kutwela bipaya aa mambo ne kupanga bipangwa ne.

²⁰ Ne bantu bakwabo bauba nobe boba bakushiwa nkunwa pa mushiji wawama. Beomvwa mambo ne kwiatambula ne kupanga bipangwa, bamo makumi asatu, bakwabo makumi atanu na jimo, ne bakwabo makumi jikumi.”

Byakufunda ku lampi

²¹ Kabiji wibambijile amba, “Nanchi lampi bamuleeta amba tumubike munshi ya kilukwa, nangwa munshi ya mwanya, ne kumutuula pa kitulwapo lampi kyanji nenyi?

²² Mambo kafwako kintu kyafyamika ne, poso amba kikasololwe, nangwa kintu kyafyamika ne, poso amba kikayunyikwe ne kwiya patoka.

²³ Umvwe muntu uji na matwi a kumvwa, omvwe.”

²⁴ Kabiji wibambijile amba, “Jimukai nabyo mumvwa! Mu kyonkakya kipimo kyo mupiminamo bakwenu, mo monka mo mukapiminwa ne anweba, ne kukilapo.

²⁵ Mambo kwi aye uji naabyo, ukapewa ne bikwabo, kabiji kwiyewa wabulabyo, bakamwangata ne bicheche byo aji naabyo.”

Kishimpi kya kukoma kwa nkunwa

²⁶ Kabiji wibambijile amba, “Bufumu bwa Lesa buji nobe muntu wakusa nkunwa pa mushiji.

²⁷ Ulaala, ubuka, bufuku ne mute, ne nkunwa nayo imena kasa ikoma. Aye ne kuyuka mo imenena ne mo ikomena ne.

²⁸ Kabiji mushiji wiikomesha mwine, patanshi ke lubuula, kabiji ke musonso, kabiji ke kajo kene mu musonso.

²⁹ Bino pakupya kajo ponkapo ke kunowa, mambo kimye kyafika.”

Kishimpi kya lukunwa wa masitate

³⁰ Kabiji amba, “Tusa kwi bupashang'anya na ka bufumu bwa Lesa? Nangwa kishimpi ka, kyo twakonsha kwibwesakanya naabo kya kwi bulumbulula?

³¹ Buji nobe lukunwa wa masitate, aye byo bamubyala panshi, wakila nkunwa yonse ya pano panshi mu kukepa.

³² Nangwa byonkabyo pa kumubyala, ukoma ne kwikala ke kichi kikatampe kyakila byonse bya mu bujimi. Kekikome na misampi ikatampe kyakuuba ne bang'onyi ba mwiulu baiya na kulenga binsa byabo mu kimfutele kyakyo.”

³³ Kabiji mu bishimpi byavula bya byonkabye aye wibambijile mambo monka mo bayukijile kwi omvwina.

³⁴ Pakuba kwa kubula kishimpi kechi wibambijile kintu ne, kabiji byo baji kwa bunke bwabo aye wibalumbulwijile byonse baana banji babwanga.

Yesu byo a zhindamikile kipuupu

³⁵ Kabiji jonkaja juba pakufika mabanga, Yesu wa ambijile baana banji babwanga amba, “Twabukile ku bushiya bwa kizhiba.”

³⁶ Kabiji bashiile jibumba; bamusendele kasa aji naabo mu bwato, ne maato akwabo nao ajinga konka.

³⁷ Ne kipuupu kikatampe kya buukile, ne mema ke asampukile mu bwato, kyakuuba amba bwato bwaji pepi kuyula na mema.

³⁸ Ne aye wajinga ku ntonga ya kunyuma kasa alaala mutulo ne kushakamina pa mushamino. Kabiji baana banji babwanga bamubushishe ne kumwambila amba, “Mufunjishi, kechi mwituta muchima byo ke tuye na kufwa nenyi?”

³⁹ Kabiji Yesu wabuukile ne kukanya lubesha, ne kwiambila manyaki amba, “Zhindama; Nzo!” Ponkapo lubesha lwalekele, ne manyaki a zhindaminetu bulongo nzo.

⁴⁰ Kabiji wibambijile baana banji babwanga amba, “Mambo ka mwaubila moyo? Mukyangye kwikala na lwitabilo nyi?”

⁴¹ Ne abo baubile bingi moyo, ne kwambang'ana bene na bene amba, “Nanchi uno ye ng'anyi, pakuba nangwa lubesha ne kalunga byamukookela?”